Da siami hadoŭ kalonii asudžany kiroŭca MAZa, jaki źbiŭ troch žančyn

Da siami hadoŭ pazbaŭleńnia voli 28 červienia pryhavaryŭ rajonny sud 27‑hadovaha vadziciela sielhaskaapieratyva «Chažova‑Ahra» Hienadzia Bandaryka, jaki ŭ listapadzie 2006 hoda ŭ vioscy Ciurli na aŭtamabili MAZ źbiŭ troch žančyn, što stajali na aŭtobusnym prypynku. Žančyny zahinuli na miescy zdareńnia.

Siem hadoŭ — maksimalnaje pakarańnie, praduhledžanaje Kryminalnym kodeksam za takoje złačynstva. Hienadź taksama na piać hadoŭ pazbaŭleny prava kiravać lubymi transpartnymi srodkami. Akramia hetaha, sud paličyŭ: Hienadź Bandaryk pavinien adbyvać termin źniavoleńnia ŭ kałonii va ŭmovach ahulnaha režymu, niahledziačy na toje, što zvyčajna za złačynstvy, ździejśnienyja pa nieaściarožnaści, prysudžajecca kałonija va ŭmovach pasialeńnia. Pryhavor pakul nie ŭstupiŭ u zakonnuju siłu, i asudžany maje prava jaho abskardzić u Minski abłasny sud

Nahadajem: 27 listapada 2006 hoda kala 14.45 aŭtamabil MAZ‑5551 na vialikaj chutkaści ruchaŭsia ŭ Ciurlach pa vulicy Savieckaj u bok Maładziečna. La aŭtobusnaha prypynku mašynu raptam paviało ŭprava. MAZ pierajechaŭ bardziur i ŭrezaŭsia ŭ paviljon prypynku. Zahinuli try žančyny, dźvie ź ich — rodnyja siostry. Pavodle zaklučeńnia sudmiedekśpierta, śmierć nastupiła imhnienna ad masavych traŭmatyčnych paškodžańniaŭ.

Paśla zdareńnia rabotniki dziaržaŭtainśpiekcyi znajšli ŭ kabinie hruzavika paŭbutelki vina. Ad vadziciela byŭ čutny pach śpirtnoha. Jon patłumačyŭ, što vypiŭ 200 hramaŭ vina ŭžo paśla avaryi, bo znachodziŭsia ŭ šokavym stanie. Da zdareńnia byccam by byŭ ćviarozy.

Na sudovym pasiadžeńni Hienadź Bandaryk śćviardžaŭ toje samaje. Jon nie pryznaŭ svaju vinu i patłumačyŭ, što kala 300 hramaŭ harełki vypiŭ napiaredadni viečaram. Ranicaj 27 listapada ramantavaŭ mašynu i śpirtnoha nie ŭžyvaŭ. Paśla abiedu vyjechaŭ u viosku Malinoŭščyna na śpirtzavod.

U Ciurlach, niedaloka ad aŭtobusnaha prypynku, u mašyny łopnuła zadniaje koła i jaje kinuła ŭprava. Hienadź kaža, što ŭdaryŭsia hrudźmi ab rul i jamu stała drenna. Kali pryjšoŭ u prytomnaść, u piaci mietrach pierad mašynaj ubačyŭ siłuety ludziej. Pa słovach abvinavačanaha, jon ničoha nie moh zrabić, zatarmazić nie paśpieŭ i najechaŭ na paviljon prypynku.

Pakazańni vadziciela MAZa abviarhaje zaklučeńnie ekśpierta, zhodna ź jakim, razhiermietyzacyja šyn pravaha piaredniaha i pravaha zadniaha kołaŭ uźnikła ŭ vyniku najezdu hruzavika na paviljon prypynku. Pierad trahiedyjaj mašyna była spraŭnaja. Pa vynikach miedycynskaha ahladu, jaki byŭ praviedzieny adrazu paśla zdareńnia, u kryvi vadziciela ŭtrymlivałasia amal dva z pałovaj pracenty ałkaholu.

Hetyja fakty, a taksama pakazańni śviedkaŭ dali sudu padstavu zrabić vysnovu: Hienadź Bandaryk u stanie ałkaholnaha apjanieńnia padčas ruchu pieravysiŭ chutkaść, straciŭ kantrol nad mašynaj, nie spraviŭsia z kiravańniem i ździejśniŭ avaryju. Jaho dziejańni treba kvalifikavać jak «parušeńnie praviłaŭ darožnaha ruchu, što paciahnuła za saboj śmierć troch čałaviek».

Svajaki zahinuŭšych žančyn paprasili sud spahnać ź sielhaskaapieratyva «Chažova‑Ahra», jakomu naležyć MAZ, kampiensacyju maralnaj škody na ahulnuju sumu ŭ 690 miljonaŭ rubloŭ. Sud pryniaŭ rašeńnie spahnać z «Chažova‑Ahra» kampiensacyju maralnaj škody svajakam zahinuŭšych na ahulnuju sumu ŭ 45 miljonaŭ rubloŭ.

Rehijanalnaja hazieta

• 0
• 0
• 0
• 0
• 0
• 0
• 0
• 0