Alaksandr Kazulin pa‑raniejšamu maje prablemy sa zdaroŭjem, śćviardžajuć jaho svajaki
«Maralny stan u jaho vydatny, jon aptymistyčny, badziory i absalutna spakojny, a voś fizyčny — dastatkova ciažki», — kaža Volha Kazulina, dačka palityka.
«Maralny stan u jaho vydatny, jon aptymistyčny, badziory i absalutna spakojny, a voś fizičny — dastatkova ciažki. Jon dahetul źviedvaje słabaść, sanlivaść, ź ciažkaściu zajmajecca z hantelami, a biehać abo hulać u futboł usio jašče nie moža: u jaho adrazu pačynajucca boli ŭ pazvanočniku, jakija addajucca ŭ nazie», — skazała Volha.
Pavodle jaje słoŭ, źniavoleny dahetul znachodzicca ŭ svojeasablivaj infarmacyjnaj błakadzie. «Tyja, chto ź im sustrakajecca, praktyčna adrazu ž pieravodziacca ŭ inšyja kałonii abo inšyja miescy ŭtrymańnia. Pryčym heta asabliva nie ŭtojvajecca, sami źniavolenyja kažuć: «Razmaŭlać z Kazulinym niebiaśpiečna». Dajšło da taho, što baćku banalna niama z kim zhulać u nastolny tenis», — paviedamiła dačka palityka.
A.Kazulin paćvierdziŭ infarmacyju byłoha deputata Pałaty pradstaŭnikoŭ Siarhieja Skrabca ab bojcy, što adbyłasia ŭ kałonii ŭ studzieni, zaznačyła Volha. Infarmacyja ab incydencie źjaviłasia ŭ niekatorych ŚMI tolki ŭ kancy červienia: na asłabiełaha ad praciahłaj haładoŭki A.Kazulina nibyta napaŭ aficer MUS i pačaŭ jaho źbivać. «Sproba nanieści ŭdar baćku była, ale jon paśpieŭ ŭchilicca ad udaru. Ciapier jon ličyć, što darma heta zrabiŭ, — možna było źniać paboi. Ale ciapier hety incydent vyčarpany», — skazała dačka Kazulina.
Jana taksama paviedamiła, što A.Kazulin zrabiŭ šerah palityčnych zajaŭ. «Ich treba jašče apracavać, pryvieści ŭ naležny vyhlad. U chutkim časie naša pres‑słužba zojmiecca hetym pytańniem, i my budziem danosić punkt hledžańnia našaha baćki na palityčnyja pracesy ŭ krainie da žurnalistaŭ i hramadstva», — zaznačyła Volha.
Nahadajem, 13 lipienia spoŭniŭsia roŭna hod z momantu vyniasieńnia prysudu A.Kazulinu. Sud pryhavaryŭ jaho da pazbaŭleńnia voli na piać z pałovaj hadoŭ z adbyvańniem pakarańnia ŭ papraŭčaj kałonii ahulnaha režymu.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary