Na Minskaj CEC-5 nie paćviardžajuć i nie abviarhajuć infarmacyi pra avaryju novaj kitajskaj turbiny 12

Kab pieravieźci 392-tonnuju turbinu, umacoŭvali masty i vypisali śpiectechniku z Čechii i Minskaha zavoda kołavych ciahačoŭ.

Dyrektar Minskaj CEC-5 Uładzimir Kiško nie paćvierdziŭ i nie abvierh infarmacyju pra avaryju na pradpryjemstvie.

«Chto tam i što raspaŭsiudžvaje, my pakiniem heta biez kamientaroŭ», — skazaŭ jon na prośbu prakamientavać paviedamleńnie, raspaŭsiudžanaje sajtam charter97.org.

Sajt paviedamiŭ, što ź siaredziny śniežnia 2012 hoda siarod śpiecyjalistaŭ biełaruskaj enierhasistemy raspaŭsiudžvajecca infarmacyja ab vybuchu novaj kitajskaj turbiny na Minskaj CEC-5.

Havorka idzie pra turbinu, zmantavanuju ŭ miežach supolnaha prajekta RUP «Minskenierha» i Kitajskaj nacyjanalnaj karparacyi. Turbina taja važyć až 400 tonaŭ.

Pres-sakratar Ministerstva pa nadzvyčajnych situacyjach Vital Navicki adznačyŭ, što

vyjezdaŭ pažarnych u śniežni na CEC-5 nie było.

Heta aznačaje, što surjoznych zdareńniaŭ, dzie mahła b spatrebicca dapamoha vyratavalnikaŭ, nie zafiksavana. Ale heta nie vyklučaje imaviernaści nievialikich avaryj.

Kitajcy atrymali kantrakt na vykanańnie na Minskaj CEC-5 kompleksnaha budaŭnictva z prajektavańniem i kamplektacyjaj parahazavaha enierhabłoku mahutnaściu 399,6 MVt. U skład enierhabłoka ŭvachodziać hazavaja turbina M701F mahutnaściu 270 MVt, kacioł-utylizatar i paravaja turbina mahutnaściu 129,6 MVt. Košt budaŭnictva prakredytavaŭ kitajski bok, suma skłała 260,19 młn jeŭra. Enierhabłok uklučany na paralelnuju pracu z enierhasistemaj u śniežni 2011 hoda.

Pavodle čutak, adarvałasia łapatka turbiny i trapiła ŭ kamieru zharańnia. Čytač kaža, što vybuch byŭ čuvać navat u vakolicach CEC.

Nižej — videa, jak vieźli turbinu na CEC-5. Jaje dastavili vodnym šlacham da Biareziny. Dla pieravozki ž z raki na CEC pryjšłosia navat umacoŭvać niekatoryja masty.

CEC-5 — najnoŭšaja ciepłacentral Minska. Jana mieścicca za 40 km na paŭdniovy ŭschod ad horada kala pasiołka Družny. Jana zadumvałasia jak atamnaja CEC, ale paśla Čarnobyla płan źmianili. Simvaličny pusk novaha kitajskaha enerhabłoka ažyćciaŭlaŭ asabista Alaksandr Łukašenka. Heta vialiki prajekt: mahutnaść CEC-5 z puskam novaha enerhabłoka vyrasła ŭdvaja.

Navat kali avaryja na CEC i była, heta nijak nie pahražaje žyćciu i zdaroŭju ludziej ciapier.

Kastuś Matušyč; BiełaPAN; SH

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH