Zaviaršajecca rasśledavańnie pa spravie vybuchu pad Łahojskam

Zaviaršajecca rasśledavańnie pa spravie ab vybuchu ŭ žyłym domie ŭ Łahojskim rajonie ŭ lutym 2012 hoda. Pra heta na pres-kanfierencyi 24 studzienia paviedamiŭ staršynia Śledčaha kamiteta Biełarusi Valancin Šajeŭ.

Nahadajem, vybuch u trochpaviarchovym na try padjezdy panelnym internacie, što na terytoryi voinskaj čaści 30151 u vioscy Malinaŭka, prahrymieŭ dniom 8 lutaha. Było abvieščana, što adzin čałaviek zahinuŭ, čaćviora — paranienyja. Dzieviać kvater doma poŭnaściu razburanyja, a ŭsiaho ŭ domie 21 kvatera. Žycharoŭ doma časova zasialili ŭ sanatoryj «Rudnia» miedycynskaha centra MTZ u vioscy Januškavičy Łahojskaha rajona. Pa fakcie vybuchu była raspačata sprava pa častcy 3 artykuła 304 Kryminalnaha kodeksa (parušeńnie pravił pažarnaj biaśpieki).

Na nastupny dzień paśla vybuchu ŭ SK paviedamili, što śledstva adpracoŭvaje adnu asnoŭnuju viersiju — heta ŭciečka bytavoha hazu. Pavodle słoŭ žycharoŭ, na praciahu troch dzion byŭ čutny pach hazu ŭ hetym domie. Padčas rasśledavańnia pa hetaj kryminalnaj spravie praviedziena vymańnie aŭdyjopieramoŭ dyśpietčarskaj słužby hazu i žycharoŭ hetaha doma, jakija dazvolać adkazać na pytańnie, ci była infarmacyja pra pach hazu na praciahu niekalkich apošnich sutak. U SK taksama ŭdakładnili, što ŭ vyniku vybuchu adzin čałaviek zahinuŭ, jašče 15 paciarpieli. Bolš za 30 žycharoŭ raźmieščanyja ŭ sanatoryi «Rudnia».

Pavodle słoŭ Šajeva, jak ustanoŭlena ekśpiertami i sabranymi padčas rasśledavańnia materyjałami, pryčynaj vybuchu stała ŭzharańnie hazapavietranaj sumiesi, jakaja ŭtvaryłasia ŭ vyniku ŭciečki hazu ź sistemy hazazabieśpiačeńnia doma.

«Pavodle mierkavańnia śledstva, trahiedyju možna było b praduchilić, kali b rabotniki „Łahojskrajhazu“ svoječasova i naležnym čynam adreahavali na paviedamleńni, jakija pastupali ad žycharoŭ doma», — skazaŭ staršynia SK.

Adnamu z kirujučych rabotnikaŭ «Łahojskrajhazu» pradjaŭlena abvinavačańnie ŭ słužbovaj chałatnaści. Najbližejšym časam płanujecca pradjavić abvinavačańnie jašče adnamu rabotniku hetaha pradpryjemstva, skazaŭ Šajeŭ.

Pavodle słoŭ kiraŭnika SK, u vyniku vybuchu adzin čałaviek zahinuŭ, dva atrymali ciažkija cialesnyja paškodžańni, adzin — mieniej ciažkija cialesnyja paškodžańni i adzin — lohkija cialesnyja paškodžańni.

• 0
• 0
• 0
• 0
• 0