Sioleta, u hod 150-hodździa paŭstańnia Kalinoŭskaha, tradycyjnuju ahulnanacyjanalnuju dyktoŭku možna pisać anłajn. Dyktoŭka projdzie 2 lutaha, u dzień naradžeńnia Kastusia Kalinoŭskaha, pa tekście jaho «Listoŭ z-pad šybienicy». Napiaredadni inicyjatar dyktoŭki Uładzimir Padhoł zaklikaŭ viadomych asobaŭ — litarataraŭ i mastakoŭ, vučonych i studentaŭ, hramadskich i palityčnych dziejačaŭ vystupić ź videazvarotam da biełarusaŭ i načytać znakamity tekst.
Na sajcie NN «Listy z-pad šybienicy» čytajuć piśmieńnik Uładzimir Arłoŭ, televiadučaja Zinaida Bandarenka, palityk i piśmieńnik Uładzimir Niaklajeŭ.
Listy z-pad šybienicy
Braty maje, mužyki rodnyja. Z-pad šybienicy maskoŭskaj prychodzić mnie da vas pisaci, i moža raz astatni. Horka pakinuć ziamielku rodnuju i ciabie, darahi moj narodzie. Hrudzi zastohnuć, zabalić serca, no nie žal zhinuć za tvaju praŭdu.
Prymi, narodzie, pa ščyraści majo słova pradśmiertnaje, bo jano jak z taho śvietu tolki dla dabra tvajho napisana.
Niamaš, bratki, bolšaha ščaścia na hetym śviecie, jak kali čałaviek u hałavie maje rozum i nauku. Tahdy jon tolka mahčymie žyci ŭ bahactvie, papraŭdzie, tahdy jon tolka, pamaliŭšyś Bohu, zasłužyć nieba, kali zbahacić naukaj rozum, razaŭje serca i radniu cełuju sercam palubić. No jak dzień z nočču nie chodzić razam, tak nie idzie razam nauka praŭdziva ź niavolaj maskoŭskaj. Dapokul jana ŭ nas budzie, u nas ničoha nie budzie, nie budzie praŭdy, bahactva i nijakaj nauki, — adno nami, jak skacinaj, varočać buduć nie dla dabra, no na pahibiel našu.
Dla taho, Narodzie, jak tolka kali pačuješ, što braty tvaje z-pad Varšavy bjucca za praŭdu j svabodu, tahdy i ty nie astavajsia zzadu, no, uchapiŭšy za što zmožaš, za kasu, sakieru, cełaj hramadoj idzi vajavaci za svajo čałaviečaje i narodnaje prava, za svaju ziamlu radnuju.
Bo ja tabie z-pad šebienicy kažu, Narodzie, što tahdy tolki zažyvieš ščaśliva, kali nad taboju Maskala ŭže nie budzie.
* * *
Ahulnanacyjanalnaja dyktoŭka pravodzicca ŭ Biełarusi šosty hod zapar pa inicyjatyvie fiłosafa Uładzimira Padhoła. Meta akcyi, pavodle jaho słoŭ, — prademanstravać pavahu da rodnaj movy. Pieršy raz dyktoŭka prajšła 25 sakavika 2008 hoda i była prymierkavanaja da 90-hodździa abviaščeńnia Biełaruskaj Narodnaj Respubliki. U napisańni dyktoŭki ŭziali ŭdzieł niekalki tysiač čałaviek, u tym liku pradstaŭniki dypmisij, jeŭrapiejskija i biełaruskija čynoŭniki.
