Łukašenka: «Niekatoryja razmovy, jakija chodziać u pamiežnym viedamstvie, — heta poŭnaje tryźnieńnie»
Kiraŭnik dziaržavy abvierh, što Baječka nie maje da jaho dostupu.
Aficyjna jana nazyvałasia naradaj pa zaćviardžeńni rašeńnia na achovu dziaržaŭnaj miažy Biełarusi ŭ 2013 hodzie.
Jak adznačyŭ Łukašenka, raniej nieadnarazova i ŭ roznych farmatach razhladalisia pytańni arhanizacyi pamiežnaj biaśpieki.
«Padstavaj dla hetaha stali jak praviadzieńnie antybiełaruskaj sankcyjnaj palityki z boku Zachadu, pravakacyi, na miažy, tak i abvastreńnia prablem, źviazanych ź jaje abaronaj. Usio heta patrabuje asablivaj uvahi i surjoznaha analizu isnujučaj sistemy achovy našych rubiažoŭ, — skazaŭ kiraŭnik dziaržavy.— Situacyja z apošnim parušeńniem dziaržaŭnaj miažy [majecca na ŭvazie palot šviedskaha samalota ź Litvy 4 lipienia 2012 h. — NN] pryviała da nieabchodnaści pryniać strohija kadravyja rašeńni. Taksama mnoju byli dadzieny adpaviednyja daručeńni pa ŭdaskanaleńni sistemy zabieśpiačeńnia achovy miažy i palapšeńni mižviedamasnaj uzhodnienaści ŭ hetaj śfiery».
Alaksandr Łukašenka padkreśliŭ, što asablivaje značeńnie nadavałasia vypracoŭcy mier pa pavyšeńni efiektyŭnaści raboty pahranviedamstva, i ciapier nastaŭ čas pahladzieć, nakolki poŭna i jakasna vykonvajucca hetyja daručeńni.
Jon adznačyŭ, što pakolki achovu dziaržaŭnaj miažy zabiaśpiečvajuć nie tolki orhany pamiežnaj słužby, ale i bolšaść subjektaŭ sistemy harantavańnia nacyjanalnaj biaśpieki, mienavita hety skład kiraŭnikoŭ zaprošany na naradu. Kiraŭnik dziaržavy zapatrabavaŭ prainfarmavać ab tym, što zroblena i što jašče treba ažyćciavić dla nadziejnaha procidziejańnia jakija ŭźnikajuć vyklikam i pahrozam, jak raźvivajucca orhany pahransłužby i nakolki efiektyŭna prymianiajucca ich siły i srodki. «Jakija praktyčnyja miery pa ŭzmacnieńni achovy dziaržaŭnaj miažy (asabliva ŭ jaje pavietranaj prastory) raspačatyja inšymi dziaržaŭnymi orhanami? Jakija jašče zastajucca prablemy i jakija šlachi ich vyrašeńnia», — pytaŭsia Alaksandr Łukašenka.
Pry hetym Łukašenka padkreśliŭ, što čakaje ad udzielnikaŭ narady abjektyŭnaj acenki adpracavanaha na praciahu minułaha hoda miechanizmu ŭzajemadziejańnia pamiž usimi ŭciahnutymi ŭ praces achovy dziaržhranicy strukturami.
Alaksandr Łukašenka taksama prakamientavaŭ niekatoryja dadumki ŭ orhanach pahransłužby.«Vy viedajecie, što značyć dla mianie dziaržaŭnaja miaža. Napeŭna, byłych vajskoŭcaŭ naohuł nie byvaje, i heta adnosicca ŭ poŭnaj miery i da mianie. Ja — były pamiežnik. I hetym skazana šmat što. Na hetym hruntujecca majo asabistaje staŭleńnie da pamiežnaj słužby i da vajskovych ludziej u zialonych furažkach, — skazaŭ jon. — Tamu niekatoryja razmovy, jakija, jak mianie infarmujuć, chodziać u pamiežnym viedamstvie, što nibyta ciapierašni kiraŭnik pahranviedamstva nie maje dostupu da prezidenta — usio heta poŭnaje tryźnieńnie».
Łukašenka padkreśliŭ, što ŭ staršyni Dziaržpahrankamiteta jość pramaja suviaź z prezidentam u luby čas sutak. «Jon heta viedaje, i ja paprašu, vy daviadzicie da niekatorych svaich aficeraŭ. Dla mianie pałkoŭnik Baječka [Alaksandr Baječka] — heta taki ž aficer, jak i ŭsie papiarednija kiraŭniki pamiežnaj słužby. Usie siadziać za hetym stałom, ministry i vysokija słužbovyja asoby, usie majuć adnolkavuju suviaź z prezidentam «, — zajaviŭ Alaksandr Łukašenka.
«Chaču, kab heta pačuli ŭsie pamiežniki, jakija abaraniajuć i abaraniali našu krainu», — dadaŭ jon.
«Tamu ŭsie hetyja pustyja razmovy pavinny być spynieny, a pamiežniki pavinny zajmacca svajoj spravaj — chadzić pa apošnim mietry našaj ziamli i z honaram abaraniać mir i spakoj biełaruskaha naroda».
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary