Jak paviedamiŭ «Našaj Nivie» staršynia HA «Biełaruskaje dobraachvotnaje tavarystva achovy pomnikaŭ historyi i kultury» Anton Astapovič, siońnia ranicaj, 1 lutaha, jon atrymaŭ paviedamleńnie pra ŭklučeńnie jaho ŭ pracoŭnuju hrupu pa prajekcie «Uniasieńnie źmienaŭ u horadabudaŭničy prajekt detalovaha płanavańnia rekanstrukcyi, restaŭracyi, adnaŭleńnia i dobraŭparadkavańnia Histaryčnaha centra Minska».
«Siońnia, a 8-j ranicy ja atrymaŭ list ad Administracyi Centralnaha rajona Minska z adkazam na skarhi pra parušeńni padčas praviadzieńnia hramadskaha abmierkavańnia prajekta. U im nie było ni słova pra ŭklučeńnie mianie ŭ skład kamisii. Ja padumaŭ, što zaraz pryjdziecca znoŭku skardzicca, pisać listy ŭ prakuraturu., — kaža Anton Astapovič. — Ale ŭžo praź dźvie hadziny mnie patelefanavaŭ hałoŭny inžynier „Minskaj spadčyny“ Michaił Žych i paviedamiŭ što ja zaličany ŭ skład pracoŭnaj hrupy. Jany čamuści nazyvajuć heta „pracoŭnaj hrupaj“, choć pa zakonie heta zaviecca „kamisija pa praviadzieńni hramadskich abmierkavańniaŭ“. Taksama mnie paviedamili, što ŭ paniadziełak mianie čakajuć u Administracyi Centralnaha rajona. Tam kamisija budzie uskryvać urny z prapanovami i skarhami, rehistravać ich, pracavać ź imi i z prajektam dalej».
«Zaraz ja mahu skazać, što hramadski kantrol za abmierkavańniem prajekta zabiaśpiečany, choć i nie viedaju, ci ŭviali ŭ skład kamisii jakoha-niebudź inšaha pradstaŭnika hramadskaści akramia mianie. Vidać, hramadski cisk prynies svaje vyniki. I heta ŭžo dobra, što isnuje choć niejki dyjałoh. My ź Michaiłam Iosifavičam (Žycham) možam zajmać roznyja pazicyi, ale tym nie mienš my taksama zaŭsiody možam pryjści da dyjałohu. I ja aceńvaju heta pazityŭna», — dadaŭ Anton Astapovič.
Prajekt «Uniasieńnie źmienaŭ u horadabudaŭničy prajekt detalovaha płanavańnia rekanstrukcyi, restaŭracyi, adnaŭleńnia i dobraŭparadkavańnia Histaryčnaha centra Minska» i jaho hramadskaje abmierkavańnie pryciahnuła šmat uvahi praz supiarečlivyja prapanovy architektaraŭ: šmat žyłych damoŭ u centry horada prapanujecca źnieści, kab pabudavać na ich miescy abjekty inviestycyjnych damoŭ, jakija nie majuć nijakaj kulturnaj kaštoŭnaści.
Kamientary