Spartyŭnyja žurnalisty Siarhiej Novikaŭ i Maksim Bierazinski razvažajuć pra aktualnyja padziei ŭ biełaruskim futbole.
29 studzienia vykankam Biełaruskaj fiederacyi futboła pryniaŭ dva rezanansnyja rašeńni. U nastupnym siezonie čempijanat budzie razyhryvacca pa schiemie ź dzialeńniem na «šaściorki». Paśla dvuch kołaŭ pieršynstva vierchniaja «šaściorka» budzie zmahacca za miedali i jeŭrakubki, nižniaja — za prava zastacca ŭ vyšejšaj lizie.
Druhoje rašeńnie — kolkaść lehijanieraŭ u kamandach čempijanata pavialičanaja z čatyroch da piaci, a rasiejcy i kazachi ŭvohule nie buduć ličycca čužymi. To bok čysta farmalna kamanda moža abychodzicca bieź nivodnaha biełarusa.
Źviartaje na siabie ŭvahu, što prajšli zaćviardžeńnie rašeńni, jakija łabiravaŭ uładalnik minskaha «Dynama» miljanier Juryj Čyž. Zatoje prapanovy hałoŭnaha treniera barysaŭskaha BATE Viktara Hančarenki byli całkam praihnaravanyja.BATE vystupaŭ za pašyreńnie elity z 12 da 16 kłubaŭ, a taksama za źmianšeńnie kolkaści lehijanieraŭ. «Ja chaču ŭ Jeŭropu, a dla hetaha mnie patrebnyja lehijaniery», — kazaŭ uładalnik «Trajpła».
«Kali ŭ kahości jość žadańnie vyvodzić tut niejkuju tendencyju, to kali łaska, ale ja b nie śpiašaŭsia», — kaža namieśnik hałoŭnaha redaktara «Priessboła» Siarhiej Novikaŭ.
«Ja b nie staŭ havaryć, što niekamu vyhadna, a kamuści — nie. Mnie zdajecca, što vykankam BFF razhladaŭ niaznačnyja pytańni, dekaratyŭnyja, a šyrejšyja — naprykład, jak pryciahnuć ludziej na stadyjon, jany nie abmiaroŭvali», — dadaje kiraŭnik sajta goals.by Maksim Bierazinski.
Pa jaho słovach, mietady pa pryciahvańni ludziej dobra viadomyja lubomu markietołahu. «Prapahanda čempijanatu, praca sa ŚMI, biłbordy.
U nas u čempijanacie ŭžo druhi siezon hulaje Alaksandr Hleb. Čamu niama nidzie pra toje, jakaja krutaja zorka pobač z nami?Pazicyja fiederacyi pa mienšaj miery niedalnabačnaja», — dadaje Bierazinski.
Ci zmoža niechta ŭ nastupnym siezonie ŭsurjoz pretendavać na toje, kab zabrać čempijonski tytuł u BATE? «Nie dumaju. Ciapierašniaja tranśfiernaja palityka minskaha «Dynama» jašče bolš pravalnaja, čym letaś. Kab na niešta pretendavać, to treba nabyvać lehijanieraŭ nie horšych, čym Bresan i Simič, jakija byli ŭ BATE», — havoryć Novikaŭ.
Bierazinski pahadžajecca: «Całkam moža skłaścisia situacyja, kali BATE zabiaśpiečyć sabie kamfortnuju pieravahu, niahledziačy na novaŭviadzieńni».
«Zajavy Juryja Alaksandraviča Čyža zaŭsiody hučnyja. Tym nie mienš, situacyja nie mianiajecca.Było šmat słovaŭ, što ŭ «Dynama» pryjeduć lehijaniery z top-čempijanataŭ, i dzie jany?» — kaža kiraŭnik goals.by.
Šmat hadoŭ pamiž BATE i «Dynama» isnavała vusnaja damoŭlenaść ab nienapadzie. To bok hulcy ź Minska nie pierachodzili ŭ Barysaŭ i naadvarot. Ciapier ža ŭ stan kamandy Juryja Čyža, musić, piarojdzie skandalny bramnik Alaksandr Hutar. Dyk moža heta pačatak vajny pamiž dvuma samymi ambicyjnymi kłubami krainy?
«Kolišni pierachod treniera Ihara Kryvušenki ŭ «Dynama» byŭ našmat bolš surjoznym, čym ciapier Hutara. Dla BATE strata Hutara nie nastolki vialikaja. Moža ŭ nastupnym siezonie vystralić zapasny bramnik BATE Ščarbakoŭ?» — havoryć Novikaŭ.
Cikava, što ŭ pieršaj pałovie dnia, kali prachodziŭ vykankam BFF, adbyvałasia narada ŭ Łukašenki pa sporcie.Kiraŭnik krainy patrabavaŭ, kab kolkaść lehijanieraŭ u ajčynnych kłubach pamienšała. Pa abiedzie ž BFF pavialičyła kvotu. «Ja nie pieražyvaju, što rašeńnie nie supała z patrabavańniem prezidenta, mianie chvaluje, što pryniatyja normy nie pojduć na karyść našaha futboła», — zaznačaje Bierazinski.
«Pierakanany, što ŭ vypadku pavieličeńnia kvoty na lehijanieraŭ kolkaść impartnaha sekand-chendu rezka ŭzraście. Datyčna rasiejcaŭ — toje ž samaje. Piać rasiejcaŭ druhoha ešałona ŭ kamandzie — niebiaśpiečna ŭtraja», — zhadžajecca Siarhiej Novikaŭ.
Pieramieny ŭ biełaruskim futbole saśpieli. Adnak heta jašče nie revalucyjnaja situacyja.
Kamientary