Infahrafika Gazeta.pl.
Na hetaj schiemie možna bačyć, chto ŭ biudžet Jeŭrasajuza bolš płacić (aranžavym), a chto — atrymlivaje (sałatavym).
Suma datacyj pa roznych linijach paznačanaja na biełym fonie, suma vypłat u biudžet — na čornym.
Sistema subsidyj pradumanaja tak, kab vyraŭnać uzrovień raźvićcia krain Jeŭrasajuza. Pavodle raźlikaŭ, takoje vyraŭnoŭvańnie pryviadzie z časam da ŭzmacnieńnia ES jak cełaha, a taksama zabiaśpiečyć nacyjanalnuju biaśpieku ES jak u śfiery charčovaj samadastatkovaści, tak i ŭ infrastruktury i enerhietyčnaj palitycy.
Najbolšy donar ES — Niamieččyna.
Krainy ž Centralnaj i Uschodniaj Jeŭropy atrymlivajuć niemałuju dapamohu. Apošnija siem hadoŭ Polšča štohod atrymlivała ad ES kala 11 miljardaŭ jeŭra (=14 miljardaŭ dalaraŭ). Litva — kala 1,3 miljarda jeŭra (= 1,7 młrd dalaraŭ). Dla paraŭnańnia: Biełaruś u try razy bolšaja, čym Litva.
Suma datacyj raźličvajecca ŭ zaležnaści ad pamieru VUP krainy, patrebaŭ taho ci inšaha siektaraŭ, a taksama ŭmovaŭ, jakija kraina vyhandlavała ŭ časie składanych unutryjeŭrapiejskich pieramovaŭ. Litva na hrošy Jeŭrasajuza pieraabstalavała škoły i ŭniviersitety, razbudavała aeraporty, inviestavała ŭ turystyčnyja abjekty i aŭtatrasy. Vializnyja sumy atrymlivajuć ź jeŭrabiudžetu sialanie. Krajnie važnymi byli prajekty padłučeńnia enerhasietak da jeŭrasajuzaŭskich, što daje padušku biaśpieki na vypadak enerhietyčnaha šantažu.
Akurat siońnia ŭ Bruseli raspačaŭsia čarhovy samit Jeŭrasajuza, na jakim budzie pryniataje rašeńnie ab biudžecie na 2014–2020 hady. Brytanija, Niderłandy, Šviecyja i Finlandyja chacieli b źmianšeńnia abjomu jeŭrasajuzaŭskich vytrat. Francyja i biadniejšyja krainy, naadvarot, piarečać abrazańniu fondaŭ. Francyja atrymlivaje šmat na padtrymku svajoj vialikaj sielskaj haspadarki. A biadniejšyja krainy raźličvajuć na hrošy ź ES na roznyja patreby.