Piotra Rudkoŭski: Papa Bieniedykt — myślar, ułada jaho abciažarvała. Šantaž vyklučany

— Pakul nieviadoma, što stała pryčynaj takoha rašeńnia. Što jon razhladaŭ takuju mahčymaść, stała jasna, kali jon naviedaŭ dla malitvy mahiłu papy Celestyna V [sialanski syn, CHIII st., abrany papam, kali jamu było 80 hadoŭ — NN] — adnaho ź niešmatlikich papaŭ, jakija abdykavali [h.zn. adraklisia pasady — NN]. Jozaf Ratcynhier u značnaj stupieni navukoviec, nastaŭnik, jaki słužyŭ Kaściołu i čałaviectvu svajoj intelektualnaj refleksijaj. Funkcyja pantyfika — kiraŭničaja, funkcyja kiraŭnika supolnaści — ciažka jamu davałasia.

— Jak vy dumajecie, ci paŭpłyvali na hetaje rašeńnie tyja skandały, jakija adbyvalisia ŭ Kaściole za apošni čas, ci moža być niešta schavanaje za hetaj adstaŭkaj?

— Vyklučana, što jon dziejničaŭ pad upłyvam cisku, šantažu. Tyja skandały i miedyjny rozhałas vakoł ich — jak nakont ksiandzoŭ-piedafiłaŭ, tak i finansavyja spravy, prodaž papskich dakumientaŭ jahonym dvareckim — mahli mieć psichałahičny ŭpłyŭ na papu, vyklikać dyskamfort. Pa składzie charaktaru Bieniedykt XVI ciažka pieranosiŭ takoje.

— Jon nie prahnuŭ ułady…

— Tak, jon dobra realizavaŭsia ŭ jakaści intelektuała, bahasłova, a funkcyja pantyfika ŭ ciažki pieryjad…

— Pieryjady nie byvajuć lohkimi. Vaźmicie pieryjad Jana Paŭła II — zamach na žyćcio, pahrozy atamnaj vajny, kamunizm, chałodnaja vajna, ajčyna pad akupacyjaj…

— Tak, Jan Pavał II dobra ŭpisaŭsia ŭ svoj čas. Heta pytańnie asabistych jakaściaŭ. Musić być paklikańnie jak dziaržaŭnaha čałavieka.

— Jan Pavał II zastavaŭsia na pasadzie da skonu, i jahonaja niamohłaść vyklikała spačuvańnie. Jon saboju nahadvaŭ nam pra patrebu šanavańnia, dapamohi starym, niamohłym, pra abmiežavańni ludskija. Bolšaść papaŭ zastavalisia na pasadzie da skonu, mała chto sychodziŭ raniej pad upłyvam chvaroby ci abstavinaŭ? Papa Bieniedykt vybraŭ inšuju darohu. Jak vy dumajecie, taki jahony vybar paŭpłyvaje na nastupnikaŭ? Jany buduć schilny nie zastavacca na pasadzie pažyćciova? Raniej manarchi taksama zvyčajna trymalisia na pasadzie da skonu, ciapier kiraŭniki dziaržavaŭ zvyčajna skančajuć svaje dziaržaŭnyja abaviazki, kali adčuvajuć niamohłaść.

— Takaja suhiestyja maje niemałoje ziernie racyjanalnaści. Na praciahu stahodździaŭ nie było tradycyi, kab papy abdykavali. Sioletni precedent moža paŭpłyvać na nastupnych pantyfikaŭ. Zrešty, u takim padychodzie niama ničoha zvyšnaturalnaha. Biskupam kaścioł navat rekamienduje sychodzić na spakoj u 75 hadoŭ.

Papu Bieniedykta ŭvohule charaktaryzavali takija jakaści jak pakora i chryścijanski realizm. Bieniedykt staŭ papam paśla vielmi papularnaha i miedyjnaha Jana Paŭła II i jon realistyčna aceńvaŭ svaju situacyju. Heta vyjaviłasia ŭ pieršaj ža jahonaj pramovie. Jon staraŭsia zrabić što moh u dušpastyrstvie.

— Chto moža stać novym papam?

— Pavialičvajecca imaviernaść, što im moža stać niejeŭrapiejec. Moža być, łacinaamierykaniec ci navat biskup z Afryki ci Azii.

— Papa Bieniedykt sustrakaŭsia z kiraŭnikom Biełarusi. U toj ža čas dahetul nie padpisany taki čakany kankardat. Vy pradbačycie niejkija źmieny ŭ adnosinach Vatykana i Biełarusi zaraz?

— Dumajecca, sutnasnych źmienaŭ nie budzie. Rolu ŭ adnosinach ihrajuć miascovaja kaścielnaja ijerarchija i apostalski nuncyj. Ad ich čerpaje svaju infarmacyju Vatykan.

— Vy dumajecie, Jozef Ratcynhier paśla adstaŭki sydzie ŭ klaštar? Ci moža tak stacca, što mienavita paśla adstaŭki papa Bieniedykt budzie adyhryvać bolšuju rolu jak dypłamat i, skažam, miratvorca? Pryhadvajecca, što papa Bieniedykt apiekavaŭsia ŭ tym liku biełaruskimi palitviaźniami, jahony nuncyj naviedaŭ ich u turmach — raniej takoha nie byvała.

— Dypłamatyja nie była mocnym bokam hetaha papy. Dumaju, chutčej, jon jašče prajavić siabie ŭ jakaści myślara.

— U pamiaci biełarusaŭ jon zastaniecca jak papa, jaki sustrakaŭsia z Alaksandram Łukašenkam i pacisnuŭ ruku Kolu.

— My, chryścijanie, adroźnivajem asobu čałavieka i jahonyja ŭčynki. Asoba zasłuhoŭvaje pavahi niezaležna ad učynkaŭ. Papa Jan Pavał II taksama cisnuŭ ruku ŭ tym liku Fidelu — jon cisnuŭ ruku asobie, a nie dyktataru.

* * *

Bieniedykt XVI (Jozaf Ratcynhier) zaniaŭ Śviaty Pasad uviesnu 2005 hoda. Jamu 85 hadoŭ, na Pasadzie jon pravioŭ 7 hadoŭ.

Sam jon niemiec, z Bavaryi. U hady vajny słužyŭ u Viermachcie, u zienitnym bataljonie.

Z 1946 pa 1951 Ratcynhier navučaŭsia teałohii i fiłasofii ŭ Miunchienskim univiersitecie. 29 červienia 1951 h. jon byŭ paśviačany ŭ śviatary. U 1953 hodzie abaraniŭ dysiertacyju pa spadčynie błasłavionaha Aŭhustyna.

U 1970 hodzie Ratcynhier staŭ adnym z aŭtaraŭ miemarandumu dzieviaci niamieckich teołahaŭ z patrabavańniem reformaŭ u katalickaj carkvy, u jakim, u pryvatnaści, utrymlivałasia prapanova ab admienie celibatu — zaroku biasšlubnaści, adnak paźniej jon źmianiŭ svaje pohlady.

Pantyfikat Bieniedykta XVI adznačyŭsia masavymi akcyjami pratestu musulman suprać jaho paśla jaho pramovy va ŭniviersitecie Rehiensburha ŭ vieraśni 2006 hoda, u jakoj papa pracytavaŭ słovy vizantyjskaha impieratara Manuiła II: «Pakažycie mnie, što novaha prynios Muchamied, i vy znojdziecie złoje i biesčałaviečnaje, naprykład, zahady miačom nieści vieru, jakuju jon prapaviedavaŭ».

Vybary novaha papy projduć pry začynienych dźviarach u sakaviku. U vybarach biaruć udzieł usie maładziejšyja kardynały. Za budučaha papu pavinny prahałasavać dźvie traciny kankłava plus adzin kardynał. Kali novy pantyfik abrany, pra heta apaviaščajuć biełym dymam z komina Sikstynskaj kapeły. Kali nivodzin z pretendentaŭ na Pasad nie nabiare patrebnaha minimumu hałasoŭ, z komina idzie čorny dym. Hety dym atrymlivajecca ŭ vyniku spalvańnia biuleteniaŭ hałasavańnia, da jakich dadajuć farbavalnik patrebnaha koleru.

Papa patłumačyŭ svajo rašeńnie admovicca ad Pasadu tym, što jamu niestavała siłaŭ dla pasady. Pišuć, što papa skazaŭ kardynałam, što «paśla doŭhaha rozdumu jon zrazumieŭ, što pavinien pakinuć Pasad, bo ŭ jaho bolš niama siły trymać jaho na plačach».

«Darahija braty, ja paklikaŭ vas na hetuju kansystoryju nie tolki dla taho, kab abviaścić ab troch kananizacyjach, ale taksama dla taho, kab paviedamić vam ab rašeńni vialikaj važnaści dla Kaścioła. Paśla taho jak ja šmat razoŭ dumaŭ ab adkaznaści pierad Boham, ja napoŭniŭsia upeŭnienaściu, što maje siły, uličvajučy maje hady, bolš nie mohuć dazvolić mnie vierna nieści svajo słužeńnie», — cytuje italjanskaja presa vystup Papy pierad kardynałami.

«Dobra viadoma, što hetaja pasada, fundamientam jakoj źjaŭlajecca duchoŭnaść, vymahaje nie tolki słovaŭ i spravaŭ, ale i pakut, i malitvaŭ», — skazaŭ pantyfik.

«Darahija braty, ja dziakuju vam ad usiaho serca za tuju luboŭ i ščyruju pracu, ź jakimi vy nieśli razam sa mnoj naša słužeńnie, ja prašu prabačeńnia za ŭsie svaje niedaskanałaści», — skazaŭ na zakančeńnie Bieniedykt XVI «spakojnym, ale stomlenym hołasam», adznačaje vydańnie.

• 0
• 0
• 0
• 0
• 0