Pačatak Vialikaha postu ŭ hreka-katalikoŭ

«Budziem paścicca dobrym pastom, pryjemnym Hospadu; Sapraŭdny post — adviarnieńnie ad złoha, ustrymlivaść jazyka, admaŭleńnie ad złości, adłučeńnie ad pažadańniaŭ, namovaŭ, many i łamańnia prysiahi. Admoviŭšysia ad hetaha ŭsiaho, post budzie sapraŭdnym pastom». (Viačernia paniadziełka pieršaha tydnia postu.)

U paniadziełak 11 lutaha biełaruskija kataliki vizantyjskaha abradu raspačynajuć Vialiki post. Dla viernikaŭ Čatyrydziasiatnica — heta čas asablivaj malitvy, postu, učynkaŭ miłasernaści i duchoŭnaj padrychtoŭki da śviata Paschi.

Pieradpaschalny post nazyvajuć vialikim nia tolki z pryčyny jaho praciahłaści, ale najpierš dziela jaho značeńnia ŭ žyćci Carkvy i kožnaha chryścijanina. Historyja Vialikaha postu maje doŭhuju i bahatuju tradycyju, jakaja siahaje apostalskich časoŭ. Pieršapačatkovaja praktyka abmiažoŭvała post adnym ci dvuma dniami, časam saraka hadzinami, potym adnym tydniem ci dvaccaćciu dniami, i paśla doŭhaj evalucyi ŭ IV stahodździ kančatkova aformiłasia u sučasnuju Čatyrydziasiatnicu.

Choć my i kažam pra 40-dzionny post, ale va Uschodniaj Carkvie jon tryvaje tolki 36 z pałovaj dzion. Siem dzion postu biez subot i niadziel — heta 35 dzion. Da hetaj ličby jašče treba dadać Vialikuju Subotu i pałovu nočy pierad śviatam Paschi, jakija taksama ličacca posnymi, i tady Čatyrydziasiatnica maje 36 z pałovaj dzion, što składaje adnu dziasiatuju kalandarnaha hoda. Lik 40 zdaŭna maje simvaličnaje značeńnie, i mienavita ŭ hetym značeńni jon uvajšoŭ u pieradpaschalny post.

Tradycyjnaja praktyka postu praduhledžvała admaŭleńnie ad miasa i małočnych praduktaŭ ciaham usiaho postu. Užyvańnie ryby taksama abmiažoŭvałasia subotami i niadzielami i śviatam Dabravieščańnia. Trochi čaściej dazvalaŭsia alej. Ježu možna było prymać tolki adzin raz na dzień. Najbolš strohim post byŭ u pieršy i apošni (Vialiki) tydni, a taksama ŭ paniadziełki, sierady i piatnicy.

Apošnim časam hreka-katalickaja carkva załahodziła strohija vialikaposnyja patrabavańni, choć i zaachvočvaje viernikaŭ pa mahčymaści trymacca bližej da tradycyjnych samaabmiežavańniaŭ. Dajučy palohku ŭ pytańniach ježy, carkva adnačasova zaklikaje viernikaŭ da ŭzmacnieńnia malitoŭnaha žyćcia, praktykavańnia duchoŭnych razvažańniaŭ, čaściejšaha ŭdziełu ŭ bohasłužbach, davańnia miłaściny i čaściejšaj spoviedzi i śviatoha pryčaścia.

• 0
• 0
• 0
• 0
• 0