16 lutaha Maryna Adamovič atrymała ad Mikałaja Statkieviča čarhovy list z mahiloŭskaj turmy. Žonka palityka pracytavała kavałak lista, jaki tyčycca čarhovaj, jak jana miarkuje, pravakacyi suprać palitviaźnia.
«Pieršaha čysła, jak ja zrazumieła, jamu pasprabavali padsadzić novaha susieda, jaki sam były supracoŭnik milicyi. I na jaho tam šmat skarhaŭ ad inšych sukamernikaŭ, što jon ich źbivaŭ. «Ale čałaviek toj tut doŭha nie zatrymaŭsia, chutka razabraŭsia ŭ sytuacyi, paprasiŭ prabačeńnia za pamyłku i staŭ prasicca vyjści». A samy klučavy skaz, jaki sapraŭdy mianie napružyŭ, heta voś taki: «Ja nie pisaŭ by tabie pra hety vypadak, bo ja ž nie pra ŭsie takija vypadki paviedamlaju. Ale mnie tut užo skazali, što pavodle hetaha vypadku, jak načalnik vyjdzie z adpačynku, buduć raźbiralnictvy. Kali mianie pryznajuć vinavatym u «cisku» jašče i na hetaha čałavieka, to z ulikam jaho pamieraŭ i specpadrychtoŭki, ja, mabyć, užo monstar niejki».
Maryna Adamovič nahadała, što raniej da Mikałaja Statkieviča ŭ kameru padsažvali viaźnia, ź jakim uźnik kanflikt, i heta adbiłasia na stanoviščy Statkieviča. Maryna Adamovič nie vyklučaje novych pravakacyj suprać jaje muža z-za taho, što jon admaŭlajecca padpisvać prašeńnie ab pamiłavańni na imia Alaksandra Łukašenki.
«Pra siabie Mikoła napisaŭ, što pačuvajecca dobra. Ciapier jamu šmat idzie listoŭ, ŭ tym liku adkazaŭ na jahonyja listy. Dasłała adkaz Iryna Chalip, jakaja paviedamiła, što tolki zaraz atrymała ad jaho vinšavańnie z Novym hodam, datavanaje jašče 23 śniežnia».
Były kandydat na prezydenta Mikałaj Statkievič asudžany na 6 hadoŭ źniavoleńnia za arhanizacyju mitynhu pratestu suprać falšavańnia vynikaŭ prezydenckich vybaraŭ 19 śniežnia 2010 hodu. Palityk abyvaje pakarańnie ŭ mahiloŭskaj turmie, kudy byŭ źmieščany jak złosny parušalnik režymu.
Kamientary