Dzień Iryny Kazulinaj zamiest Dnia abaroncaŭ ajčyny 14

Iryna Kazulina, fota Jeŭraradyjo

23 lutaha spoŭnicca 5 hadoŭ, jak nia stała Iryny Kazulinaj. Joj było tolki 48 hadoŭ.

Intelihientnaja žančyna, jakaja mahła b stać pieršaj łedzi, jakoj hanarylisia b biełarusy.

Mužnaja žančyna, jakaja adna ź pieršych u Biełarusi publična zajaviła pra svaju rakavuju chvarobu i dała prykład zmahańnia inšym.

Hodnaja žančyna, jakaja z uśmieškaj prychodziła ŭ studyju «Svabody» na onłajn-kanferencyju adrazu ž paśla sudu nad Alaksandram Kazulinym.

Viernaja žančyna, ź jakoj u jaje apošnija chviliny, dni i miesiacy nie było muža-palitviaźnia.

Razumnaja žančyna, jakaja ličyła niahodnym adkazvać na abražalnyja zakidy kiraŭnika Biełarusi nakont jaje siamji.

Kachanaja žančyna, jakaja dahetul u sercach jaje rodnych.

Jana pajšła ad nas piać hadoŭ tamu, a bol, jaki zastaŭsia, heta nia tolki bol Alaksandra Kazulina, jakoha vyzvalili na try dni, kab raźvitacca z žonkaj.

Heta bol palitviaźnia Źmitra Daškieviča, jakomu dali tolki 30 chvilinaŭ, kab raźvitacca sa svajoj maci Volhaj Daškievič u morhu. Joj było tolki 54 hady.

Bol palitviaźnia Alesia Bialackaha, jaki daviedaŭsia pra śmierć baćki tolki ŭ dzień pachavańnia, i jakoha pad kanvojem pryvieźli raźvitacca.

Bol palitviaźnia Alaksandra Małčanava, jakomu administracyja Žodzinskaj kalonii nie dazvoliła raźvitacca z maci Halinaj Małčanavaj. Joj było tolki 64 hady.

Bol i tryvoha, jakija, pierakananaja, pierapaŭniajuć palitviaźnia eks-kandydata na prezydenta Mikołu Statkieviča za svajho baćku, 85-hadovaha Viktara Statkieviča, jak i Źmitra Daškieviča za jahonaha baćku, 74-hadovaha Viačasłava Daškieviča.

Pamiataju balučy kryk maci palitviaźnia Fiodara Mirzajanava ŭ sudzie, kali jaje nie puścili na abviaščeńnie prysudu syna.

Pamiataju, jak paŭtara hoda tamu Ała Sańnikava, ledź strymlivajučy ślozy, čytała list svajho źniavolenaha syna Andreja Sańnikava z-za krataŭ na prezentacyi «svabodaŭskaj» knihi «Adzin dzień palitviaźnia. 2009–2011». Usie takija sceny nie pieraličyš, jak niemahčyma i vymierać bol usich palitviaźniaŭ i ich blizkich.

I ŭsio ž mnie čamuści ŭvieś čas zhadvajecca toj dzień piać hadoŭ tamu, kali ja daviedałasia pra śmierć Iryny Kazulinaj.

Heta było 23 lutaha, kali ŭ Biełarusi častka hramadztva śviatkuje tak zvany Dzień abaroncaŭ ajčyny i ŭzbrojenych siłaŭ Biełarusi.

A čamu b nie pasprabavać pierałamać zamšełuju savieckuju tradycyju i abvieścić 23 lutaha ŭ Biełarusi Dniom rodnych palitviaźnia ŭ honar Iryny Kazulinaj?

I ŭ hety dzień padtrymać usich tych, čyje rodnyja ciapier za kratami.

Hanna Souś, Radyjo Svaboda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH