Webmusic.by: skandał vakoł pieršaj biełaruskaj muzyčnaj anłajn-kramy

U Biełarusi adkryŭsia pieršy sajt, jaki prapanuje spampavać biełaruskuju muzyku za hrošy. Prajekt Webmusic.by stvaraŭsia ciaham hoda, adnak pierad zapuskam sajta ŭ sacyjalnych sietkach razhareŭsia łakalny skandał:

na sajcie źjaviŭsia adkryty katałoh biełaruskaj muzyki, ale bolšaść muzykaŭ navat nie viedała, što ich tvory ciapier možna spampavać za hrošy.

Adrazu ž uźnikli pretenzii, što tyčacca parušeńnia aŭtarskich i sumiežnych pravoŭ. Muzyčny krytyk Źmicier Biezkaravajny, jaki pieršym uźniaŭ pytańni da sajta, tak kamientuje situacyju:

«Pazicyja sajta takaja, što jany ŭsim płaciać praz Nacyjanalny centr intelektualnaj ułasnaści, ale pa-pieršaje jany biez uzhadnieńnia vykłali navat muzyku tych, chto nie padpisany na NCIU, ci, prynamsi, tvory nie padpisanyja na NCIU. Pa-druhoje, NCIU zajmajecca aŭtarskimi pravami, a kožny zapis maje jašče i sumiežnyja: heta pravy nie na muzyku i słovy, a na samu fanahramu, zapis. Dyk voś hetuju častku pravoŭ, jakoj za adsutnaściu łejbłaŭ vałodajuć artysty, jany naohuł praihnaravali. Bo absalutnaja bolšaść muzykaŭ u maim Fejsbuku piša, što ź imi nichto nie źviazvaŭsia i im heta vielmi nie padabajecca.».

Na dopis pra źjaŭleńnie sajta adhuknuli Alaksandr Pamidoraŭ, Jury Paŭłoŭski (z etna-trya «Trojca»), Atmaravi i šerah inšych muzykaŭ, ź jakimi damovy, prynamsi, na momant źjaŭleńnia dopisaŭ, zaklučany nie byli.

Narakajuć muzyki i na pamyłki ŭ trek-listach albomaŭ: pieśni časam dajucca ŭ vypadkovym paradku, jość pamyłki ŭ nazvach.

Stvaralnik Webmusic.by Viačasłaŭ Hulevič kaža, što nijakaha skandała nasamreč niama:

«Ja zajmajusia aŭtarskimi pravami voś užo 15 hadoŭ, — kaža spadar Viačasłaŭ. — Rynak nośbitaŭ ciapier amal źnik, tamu my vyrašyli stvaryć pieršy biełaruski sajt, dzie biełaruskuju muzyku možna spampavać za hrošy.

Heta ciažki prajekt, raspracoŭvaŭsia jon bolej za dva hady. Ciapier pravy na muzyku, jakija raniej naležyli firmam-vydaŭcam, „raźbiehlisia“ pa muzykach. Ciapier my padpisvajem ź imi kantrakty, padpisali bolej za sotniu. Mahčyma zastałosia 5–10 vykanaŭcaŭ, ź jakimi my nie paśpieli źviazacca».

Zaŭvažym, što, naprykład, albom Pamidorava, jaki byŭ vykładzieny z pamyłkami i biez papiaredniaj damovy z sajta pakul vydaleny.

Pa słovach spadara Hulakieviča, pretenzii da aficyjnaha zapusku sajta hučać jak nonsens.

«My praciahvajem źbirać kantrakty, štodnia padpisvajem niekalki novych. — kaža jon. — My pracujem praź NCIU, ale z tymi, chto tam nie zarehistravany, pracujem asabista. Pałova prybytku idzie na apłatu pravoŭ — 25 pracentaŭ aŭtarskich, 25 — sumiežnych».

Što tyčycca «pieraviernutych» trek-listoŭ, to heta pamyłka prahramy, jakaja zaraz aktyŭna vypraŭlajecca.

«Reč u tym, što choć sajt i pracuje, my jaho jašče nijak nie rekłamavali, i nie źbiralisia jaho raskručvać, pakul u nas nie budzie ŭsich pravoŭ. — kaža Hulevič. — Štodnia na sajt zachodzić tolki sto čałaviek, ale heta biez rekłamy. My zusim nie źbirajemsia kryŭdzić muzykaŭ, naadvarot, prosim źviartacca da nas».

Pry hetym Źmicier Biezkaravajny kaža, što daviedaŭsia pra adkryćcio sajta z pres-relizu, jaki jon atrymaŭ z nahody prezientacyi na sajcie Webmusic alboma hurtu «Pałac» «Koła hrukatała». Heta i stała nahodaj dla publikacyi ŭ błohu.

Źjaŭleńnie takoha sajta dla biełaruskaj internet-prastory — krok napierad: ale zastajecca pytańnie, ci budzie karystacca popytam elektronny prodaž pieśniaŭ, jakija možna znajści i ŭ volnym dostupie. I ŭsio ž taki aformlenyja zahadździa kantrakty dazvolili b paźbiehnuć niepryjemnaj situacyi, jakaja skłałasia jašče da aficyjnaha adkryćcia.

TOP-10 spampavanych pieśniaŭ na sajcie vyhladaje na siońnia tak:

• 1. Kohda My Nie Riadom — Timbigfamily & Lučana

• 2. Nie pieriediełaju- Rossohin

• 3. Dychanije — Dźmitryj Kałdun

• 4. Prosto Tak — Anžalika Ahurbaš

• 5 Nie Opozdaj — Volha Barabanščykava

• 6 D…ia sovietčikov — «Niejra Dziubiel»

• 7 Daždžami — BN

• 8 Biełtielekom — «Niejra Dziubiel»

• 9 1._nashe_letooriginal — «Ćviet Ałoe»

•10 ZvukSierdca — Palina Smołava