Naša sieciŭnaja hramada hadaje, jak chutka i jakich mienavita čakać zakanadaŭčych zachadaŭ, skiravanych na ŭtajmavańnie "anarchii ŭ internecie". Naturalna, što mierkavańnie kiraŭnika dziaržavy: čaho, maŭlaŭ, Ministerstva infarmacyi čuchajecca, daŭno para prapisać status elektronnych medyjaŭ, kab sieciva nie było pamyjnicaj — padšturchnie čynoŭnikaŭ da bolej rašučych dziejańniaŭ.
Darečy, nie abaviazkova navat raspracoŭvać niejki novy zakon ci źmianiać zakon ab ŚMI. Užo jość prajekt "Ab infarmacyi, infarmatyzacyi dy infarmacyjnaj biaśpiecy", zdolny, jak ličać niezaležnyja eksperty, adčuvalna zacuhlać ŭeb-aktyŭnaść ajčynnaha ludu. Heny zakon i tak mierkavali vynieści na vosieńskuju sesiju. Darečy, eksperty Biełaruskaj asacyjacyi žurnalistaŭ, jakich hady ŭ rady zaprasili da abmierkavańnia, zdavałasia, pierakanali ŭžo aficyjny bok u niasłušnaści šerahu artykułaŭ (BAŽ tut dziejničaje tak: kali ŭžo nielha praduchilić jurydyčnyja navacyi, dyk varta chacia b minimizavać uron dla medyjnaj supolnaści). Ale zaraz raspracoŭščyki mohuć usio adkrucić nazad dy jašče i stražej "prapisać".
Naša načalstva spasyłajecca na mižnarodny dośvied rehulavańnia ŭeb-prastory. Dyk heta hledziačy jaki. Kali i tut budziem vučycca ŭ Kitaja (taki zaraz aficyjny lozunh:), to, kaniešnie, daloka zojdziem.
U Rasiei, miž inšym, admysłovaha zakonu pra internet niama, chacia sproby niešta takoje sklapać byli. Ale za sieciŭnuju volnicu zastupiŭsia Pucin, udała zhulaŭšy tut liberała. Prosta jon bolej abaznany ŭ hetaj sfery i razumieje, što brutalnyja zachady vialikaha efektu nie daduć. U Rasiei MOŽNA zarehistravać sajt jak srodak masavaj infarmacyi, kali sam žadaješ. I mnohija hetym karystajucca, kab zručniej było atrymlivać roznyja tam akredytacyi i h.d., to bok mieć vyhody ad statusu. Ale niama abaviazałaŭki. U nas ža — sami viedajecie, uva što vylivajucca roznyja rehistracyi-pierarehistracyi. Ułada kožny raz spraŭna "filtruje bazar":)
Uvohule ž efekt sumnieŭny. Voś hladziecie: uździejničać možna abo na sami sajty, abo na ludziej, što robiać hetyja sajty. Chakierskija specaperacyi tut nia metad, jany chiba dla kropkavaha ŭžyvańnia. Nu a blakavańnie resursaŭ lohka abyści praz usialakija tam proksi-servery dy — vo słoŭca, jazyk złamaješ!:) — a-na-ni-maj-ze-ry. Tearetyčna ŭsie "čajniki" ŭ nas pra hetyja štukiencyi viedajuć, ale pakolki hłušacca kramolnyja sajty hady ŭ rady, to kožny raz zdarajecca lohki stupar: b-blin hareły, kudy ja znoŭ zasunuŭ heny čortaŭ fajł z paradami na vypadak palityčnaj kibervajny?! Kali ž blakavańnie nabudzie systemny charaktar, naša publika — usio ž naščadki partyzanaŭ!:) — chutka ŭzabjecca na patajemnyja ściežki ŭ virtualnych huščarach:)
Možna zahnać u stojła rehistracyi šerah resursaŭ, što napampoŭvajucca kantentam u samoj Biełarusi. Ale i tut miaža ŭmoŭnaja. Zhadajcie, kali sprabavali pryściabacca da sajtaŭ niekatorych partyjaŭ, to ichnija lidery, choć i nia złaziać z tych ŭeb-bačynaŭ, artystyčna razvodzili rukami: nijakaha jurydyčnaha dačynieńnia nia majem, sajt robiać našy nieviadomyja prychilniki, mahčyma navat z Hvadełupy! Całkam piśmienny padychod:)
Plany aficyjnych ideolahaŭ razharnuć ekspansiju dziaržaŭnaj žurnalistyki u sieciva, kaniešnie, mohuć naškodzić tym raskručanym niedziaržaŭnym resursam, jakija hłucha, ekivokami zhadvalisia padčas havorki ŭ redakcyi "SB". Kiepska, kali suprać ich buduć užytyja pryjomy niesumlennaj kankurencyi. Ale ŭvohule kankuravać ź niepadcenzurnaj płyńniu kiravanaja dziaržavaju presa niazdolnaja pavodle vyznačeńnia. Pakul tam viadoŭca kazionnaha pseŭdabłohu ŭzhodnić z šefam kožny postynh:), niejki adviazany Lolik ci Bolik namałocić tuzin źjedlivych hitoŭ:)
Karaciej, droŭ u siecivie našy mudryja dziejačy nałamać mohuć, ale tatalnaj pieramohi nie atrymajuć. A ŭžo suśvietnaj słavy budzie pa samyja vušy. Tut i biez zakonu stabilna siadziać u "vorahach internetu". Darečy, "Repartery biaź miežaŭ", hetyja pirańni na varcie svabody słova:), učapilisia imhnienna. Zaraz prahresiŭnaja suśvietnaja supolnaść budzie stabilna prajadać uładam plech i na hety kont.
