Vyzvaleńnia biełaruskich palitviaźniaŭ «čakaje nie tolki Jeŭrasajuz, ale i ŭvieś śviet»,zajaviŭ pasoł Italii Arnalda Abieci žurnalistam 22 sakavika ŭ Minsku.
Pry hetym jon adznačyŭ: praciahvajučy nastojvać na vyzvaleńni palitviaźniaŭ,
ES taksama šukaje «i inšyja kanały dla vypraŭleńnia situacyi, jakaja nikomu nie prynosić karyści».
«Ja zhodny ź mierkavańniem, što ŭsio ž nieabchodny dyjałoh. Heta nie aznačaje, što ja nie baču isnujučych niehatyŭnych momantaŭ, ale tak jak ja aryjentujusia na pošuk rašeńnia, jakoje zadavolić abodva baki, to ja na baku zachavańnia krytyčnaha dyjałohu.
Nielha začyniać dźviery, nieabchodna vykarystoŭvać usie najaŭnyja mahčymaści. Ale vyzvaleńnie palitviaźniaŭ abaviazkova pavinna adbycca», — padkreśliŭ Abieci.
Dypłamat nahadaŭ, što da taho, jak była žorstka razahnanaja akcyja pratestu paśla vybaraŭ 19 śniežnia 2010 hoda, Biełaruś i Jeŭrasajuz viali davoli paśpiachovy dyjałoh. Pa hetaj pryčynie zaraz Jeŭrasajuz «aścierahajecca rabić niejkija kroki i dziejańni da taho, jak buduć adpuščanyja palitviaźni», zajaviŭ pasoł Italii. «Sama ideja, što takija padziei mohuć znoŭ paŭtarycca, usprymajecca vielmi niehatyŭna», — skazaŭ Abieci.
Na pytańnie, jak jon stavicca da taho, što ministra zamiežnych spraŭ Biełarusi Uładzimira Makieja mohuć vyklučyć sa śpisu asob, jakim zabaronieny ŭjezd na terytoryju ES, Abieci adkazaŭ:
«Ja vielmi pavažaju spadara Makieja, liču jaho razumnym čałaviekam. Miarkuju, što jamu treba dazvolić ŭjezd u ES, kab była mahčymaść viadzieńnia dyjałohu».
Na ŭdakładniajučaje pytańnie, ci źjaŭlajecca heta vykazvańnie jaho asabistym punktam hledžańnia abo pazicyjaj Italii, Abieci padkreśliŭ: «Dumaju, što pazicyja Italii, i nie tolki Italii, mienavita takaja».
