Apazycyja pačała padrychtoŭku «Eŭrapiejskaha maršu». Manifestacyja projdzie na Pakroŭ, 14 kastryčnika.
Mižnarodny kaardynatar «Chartyi‑97» Andrej Sańnikaŭ miarkuje, što akcyja 14 kastryčnika stanie jašče adnym śviedčańniem ci hatovaja biełaruskaja ŭłada pajści na dyjaloh z apazycyjaj i Zachadam. «Stałaść ułady budzie vymiaracca hatoŭnaściu da kampramisu», — adznačyŭ Sańnikaŭ.
Lider AHP Anatol Labiedźka maje padobnaje mierkavańnie:
«Nielha lacieć tolki na adnym kryle, — pierafrazavaŭ Łukašenku staršynia AHP. — My musim mieć dobryja adnosiny nia tolki z Rasiejaj, ale z Zachadam. Praŭda, dziela hetaha patrebien dyjaloh i kankretnyja dziejańni z boku aficyjnaha Miensku, bo nielha cisnuć adnu ruku, kali druhaja trymaje klučy ad viaźnicaŭ, dzie ciapier siadziać Alaksandar Kazulin i Źmicier Daškievič».
Lider ruchu «Za svabodu» Alaksandar Milinkievič kaža, što «Eŭrapiejski marš» nielha ličyć tradycyjnaj dla biełaruskaj apazycyi akcyjaj supracivu.
«Heta budzie akcyja sa znakam jakaści. «Eŭrapiejski marš» nia budzie symbalizavać niejkuju baraćbu suprać niečaha, jon budzie symbalizavać viartańnie Biełarusi ŭ Eŭropu. Pierad nami staić pytańnie cyvilizacyjnaha vybaru, ci my budziem budavać novuju Bizantyjskuju imperyju, ci ŭklučymsia ŭ eŭrapiejskija intehracyjnyja pracesy. Bo niahledziačy ni na što, raście pracent biełarusaŭ, jakija chočuć u Eŭropu, chočuć žyć pa‑eŭrapiejsku. Ja pierakanany, što na akcyju 14 kastryčnika vyjdzie šmat ludziej, jakija zaśviedčać svoj vybar. U mianie tolki pazytyŭnyja ŭražańni ad ŭsiaho hetaha. Zarana havaryć pra śmierć abjadnanaj apazycyi. Kali my ŭ stanie pravodzić takija akcyi razam», — havoryć Milinkievič.
Manifestacyja projdzie na Pakroŭ, 14 kastryčnika. Heta dzień malitvaŭ da Maci Božaj, niabiesnaj zastupnicy.
Sacyjał‑demakrat Mikoła Statkievič kaža, što «Eŭrapiejski marš» u niejkaj stupieni stanie adkazam na ahresiŭnuju palityku, jakuju apošnim časam viadzie suprać Biełarusi Rasieja.
«Balans miž Zachadam i Ŭschodam užo niemahčymy, my prapuścili hety momant. Luby pavarot Biełarusi ŭ bok Eŭropy Rasieja paličyć varožym dla siabie. Tamu ciapier vybar vielmi prosty: Eŭropa ci Azija», — skazaŭ Statkievič.
Kali ŭłady ŭrešcie nie daduć dazvoł na praviadzieńnie «Eŭrapiejskaha maršu», to arhkamitet stvaryŭ pieramoŭnuju hrupu ŭ składzie Michaiła Maryniča, Jurja Chadyki i inšych, jakija buduć chadzić pa dziaržaŭnych ustanovach i pierakonvać dać dazvoł.
Amal usie zajaŭniki adznačali, što adnoj z hałoŭnych temaŭ «Eŭrapiejskaha maršu» stanie pytańnie ŭviadzieńnia šenhienskich vizaŭ krainami, što miažujuć ź Biełaruśsiu, a taksama ich koštu. «Kali siamja z čatyroch čałaviek źbirajecca adpačyć u Polščy, to tolki na vizy im treba budzie addać 240 eŭra — heta niepadjomnyja hrošy amal dla kožnaj biełaruskaj siamji. My budziem vieści pieramovy na hety kont u roznych eŭrapiejskich strukturach. Dla nas vielmi važna, kab jak maha bolej ludziej bačyła zachodniaje žyćcio», — kaža A.Milinkievič. «Kali va ŭładaŭ nie cikavaści da prablemy vizaŭ, to hetym musić zaniacca apazycyja», — padkreśliŭ A.Labiedźka.
Taksama mierkavałasia napiaredadni «Eŭrapiejskaha maršu» pravieści jašče i «Sacyjalny marš», jakija byŭ zaplanavany na kaniec vieraśnia, ale jaho praviadzieńnie adkładvajecca. Pakul papiaredniaj dataj jaho praviadzieńnia nazyvajecca 11 listapada.
Viktar Ivaškievič paviedamiŭ, što arhkamitet źbirajecca razasłać šerah zaprašeńniaŭ na akcyju 14 kastryčnika eŭrapiejskim palitykam, ale kankretnyja proźviščy pakul nazyvacca nia buduć.
Kamientary