Rasija pastaviła dyjahnaz biełaruskaj ekanomicy

Pa vynikach hoda biełaruski ŭrad źbirajecca vyjści na bolš vysokija tempy (słavutyja 8,5%) rostu. U toj ža čas Rasija ličyć, što mahčymaści ekanamičnaj madeli Biełarusi abmiežavanyja, i prahnazuje na pieryjad da 2030 hoda adnosna nievysokija tempy jaje rostu.

Rasijski pohlad na biełaruskuju budučyniu

Pavodle dadzienych za pieršy kvartał, abjom biełaruskaha VUP u studzieni-sakaviku skłaŭ 123,3 trłn rubloŭ i pavialičyŭsia ŭ paraŭnańni ź pieršym kvartałam 2012 hoda ŭ supastaŭnych cenach na 3,5%.

Pieršy kvartał i letaś davaŭ abnadziejlivyja pakazčyki (rost VUP u studzieni-sakaviku2012-ha skłaŭ 3%), adnak pa vynikach hoda, nahadajem, ekanamičny rost źniziŭsia da 1,5%.

Jak budzie sioleta? Prahnozy roznyja. Adnak u rasijskim uradzie nie čakajuć vysokich pakazčykaŭ ekanamičnaha rostu ŭ Biełarusi.

«Va ŭmovach adsutnaści ŭździejańnia vonkavych i ŭnutranych šokaŭ mahčymaści rostu biełaruskaj ekanomiki da 2030 hoda aceńvajucca na ŭzroŭni 4%», — havorycca ŭ doŭhaterminovym prahnozie, jaki padrychtavała Minekanamraźvićcia Rasii.

A voś u Kazachstanie, jaki taksama ŭvachodzić u AEP, siaredniehadavyja tempy ekanamičnaha rostu, pavodle acenak Minekanamraźvićcia, mohuć być vyšejšyja. Na dumku śpiecyjalistaŭ rasijskaha ministerstva, u vypadku raźvićcia niesyravinnaj pramysłovaści siaredniehadavyja tempy rostu ekanomiki Kazachstana buduć składać kala 5,5%.

Pakazalna, što prahnozy ekśpiertaŭ pa raźvićci ekanomiki ŭ Kazachstanie praktyčna supadajuć z aficyjnymi, a voś pa Biełarusi karcina zusim inšaja.

Prahnozy ekanamičnaha rostu ŭ Biełarusi i Kazachstanie na 2013 h.

Prahnoznyja pakazčyki pa roście VUP, zapłanavanyja biełaruskim uradam, istotna adroźnivajucca ad acenak, jakija pryvodziać ekśpierty mižnarodnych arhanizacyj.

«Prahnozy nie supadajuć, bo my nieadekvatna aceńvajem svaje mahčymaści. Biełaruski bok zychodzić z taho, što pradukcyja, jakuju my vyrabim, znojdzie zbyt. U toj ža čas ekśpierty mižnarodnych arhanizacyj budujuć prahnozy, zychodziačy z popytu na pradukcyju. Pavieličeńnia popytu na tradycyjnyja tavary, jakija my vyrablajem, siońnia niama. Tamu zakanamierna, što składskija zapasy ŭ Biełarusi rastuć», — tłumačyć niestykoŭku aficyjnych prahnozaŭ Biełarusi z acenkami mižnarodnych arhanizacyj namieśnik staršyni Biełaruskaj navukova-pramysłovaj asacyjacyi Hieorhij Hryc.

Jak bačym na tablicy vyšej, i Suśvietny bank, i Mižnarodny valutny fond, i ciapier Minekanamraźvićcia Rasii prahnazujuć patencyjna mahčymy rost biełaruskaj ekanomiki na ŭzroŭni, nie vyšejšym za 4%.

Ekanamičny rost mohuć zabiaśpiečyć tolki pryvatniki

Zrešty, 2012 hod pakazaŭ, što navat 4-pracentnaha ekanamičnaha rostu kraina nie zaŭsiody moža dasiahnuć.

«Letaś, niahledziačy na stymulavańnie ekanamičnaha rostu, jakoje vyjaŭlałasia ŭ roście zarobkaŭ, eksparcie rastvaralnikaŭ, VUP vyras usiaho na 1,5%. Heta śviedčyć ab tym, što mahčymaści najaŭnaj ekanamičnaj madeli abmiežavanyja», — adznačaje dyrektar Daśledčaha centra IPM Alaksandr Čubryk.

Na dumku ekśpierta, siarednieterminovyja pierśpiektyvy biełaruskaj ekanomiki buduć naŭprost zaležać ad krynic ekanamičnaha rostu. Da 2011 hoda klučavoj krynicaj rostu byli emisijnyja resursy. Ciapier robicca staŭka na ekanamičny rost za košt madernizacyi dziaržpradpryjemstvaŭ.

Adnak ekanamisty aścierahajucca, što takoha kštałtu madernizacyja nie pryviadzie da pavieličeńnia tempaŭ ekanamičnaha rostu ŭ budučyni, bo, jak pakazvaje dośvied minułych hadoŭ, dziaržaŭnyja inviestycyi nie zaŭsiody prynosiać naležnuju addaču. Pavodle dadzienych Minekanomiki, abjom inviestycyj u ekanomiku ŭ 2005—2011 hh. skłaŭ 31,5 młrd dalaraŭ, a addača ŭ vyhladzie pryrostu dadadzienaj vartaści — tolki 19,2 młrd dalaraŭ.

«Biez pryciahnieńnia inviestycyj z novych krynic paskareńnie ekanamičnaha rostu vyhladaje małaimaviernym», — miarkuje Alaksandr Čubryk. Na dumku ekśpierta, adziny dziejsny sposab rostu VUP — pryciahnieńnie inviestycyj u asnoŭny kapitał z novych krynicaŭ (hałoŭnym čynam za košt raźvićcia pryvatnaha siektara).

«Pryvatnyja inviestycyi zaŭsiody pieraśledujuć addaču, pavyšeńnie pradukcyjnaści. Tamu ŭ vypadku źmieny ekanamičnaj madeli i pavieličeńnia doli pryvatnaha siektara mahčymyja bolš vysokija tempy ekanamičnaha rostu, jakija pieravyšajuć zhadanyja 4%», — pierakanany Alaksandr Čubryk.

Klučavoje pytańnie ŭ tym, jakimi tempami pryvatny siektar budzie raźvivacca ŭ Biełarusi. Kali spravy buduć iści tak, jak apošnija 15 hadoŭ, kali dziaržsiektar zachoŭvaŭ hałoŭnaje stanovišča ŭ ekanomicy, to da 2030 hoda situacyja ŭ Biełarusi mała źmienicca.

• 0
• 0
• 0
• 0
• 0
• 0
• 0
• 0