Alaksandr Łukašenka ličyć niedapuščalnym palityzavać pracesy ŭ raźvićci AEP. Ab hetym jon zajaviŭ siońnia na sustrečy z premjer-ministram Kazachstana Sierykam Achmietavym.
«Što datyčycca Kazachstana, my z vami i z Rasijaj užo stvaryli, ja spadziajusia, vielmi pierśpiektyŭnuju arhanizacyju, jakaja dapamoža i dziaržavam, i ludziam, što žyvuć u hetych krainach. Ja absalutna zhodny z Nursułtanam Nazarbajevym, što ni ŭ jakim razie nielha palityzavać pracesy ŭ hetaj arhanizacyi, - skazaŭ Alaksandr Łukašenka. - Dy my i nie śpiašajemsia, spakojna vyrašajem tyja prablemy, jakija siońnia jość. Kali my ich vyrašym, tady, sapraŭdy, nie vystaŭlajučy niejkija aharodžy, možam ruchacca dalej, asvojvajučy novyja pracesy i vyrašajučy novyja prablemy, jakija buduć uźnikać».
Razam z tym Alaksandr Łukašenka adznačyŭ, što AEP u jaje ciapierašnim vyhladzie ŭžo daje vyniki, u tym liku ŭ płanie pavieličeńnia abjomaŭ dvuchbakovaha supracoŭnictva. Tak, pa vynikach 2012 hoda tavaraabarot pamiž Biełaruśsiu i Kazachstanam skłaŭ amal $1 młrd. «My kaliści maryli ab hetym, a siońnia jon užo jość», - zaŭvažyŭ Łukašenka.
U svaju čarhu Sieryk Achmietaŭ skazaŭ, što na 29 maja ŭ Kazachstanie zapłanavana praviadzieńnie sustrečy na vyšejšym uzroŭni ŭ ramkach Adzinaj ekanamičnaj prastory, na jakoj buduć abmierkavany pracesy intehracyi, što intensiŭna raźvivajucca. Jon zhadziŭsia ź mierkavańniem, što spačatku nieabchodna «pabudavać pieršy pavierch» u hetaj intehracyi, a potym paśladoŭna i pastupalna ruchacca dalej.
