Śpiecsłužby stvaryli svaje «pravaabarončyja» arhanizacyi?

U Bruseli i Strasburhu źjaŭlajucca nieviadomyja pravaabarončyja arhanizacyi ź Biełarusi «Vidać, heta Ministerstva zamiežnych spraŭ nakiroŭvała», — raskazvajuć u adnoj z takich pravaabarončych arhanizacyj pra vizit u Strasburh.

Niečakanaje adkryćcio zrabiła dla siabie pravaabaronca Alena Tankačova: naša hramadzianskaja supolnaść našmat bahaciejšaja, čym joj padavałasia! Adkryćcio heta jana zrabiła padčas niadaŭniaha vizitu ŭ Strasburh na pasiadžeńnie Parłamienckaj asamblei Rady Jeŭropy:

«Adnym z pradstaŭnikoŭ u ramkach hetaj hrupy byŭ spadar, jaki pradstaŭlaŭsia pravaabarončaj arhanizacyjaj «Public association for protection of human rights».

Jakaja, pavodle jaho słoŭ, bolš za 10 hadoŭ ažyćciaŭlaje svaju dziejnaść na bazie Bresckaha dziaržaŭnaha ŭniviersiteta i, nibyta, u hetuju arhanizacyju abjadnanyja pradstaŭniki akademičnaj supolnaści — vykładčyki prava i inšych humanitarnych dyscyplin».

Zdajecca, ni pra hetuju arhanizacyju, ni pra jaje dziejnaść nikoli ničoha nie było čuvać.

Navat Google nie dapamoh vypravić hetuju niedarečnaść! Heta nie było b dziŭna, aburajecca Tankačova, kali b pravaabarončaja arhanizacyja była dziaržaŭnaj. Ale Alaksiej Traćciakoŭ, jaki pradstaŭlaŭ «Public association», śćviardžaje, što jany — niedziaržaŭnyja.

Adnak Jeŭraradyjo znajšło ŭ Breście i hetu nieviadomuju «Public association for protection of human rights», i jaje kiraŭnika. Im apynuŭsia vykładčyk Bresckaha ŭniviersiteta imia Puškina Ivan Kotlar. Jana sapraŭdy isnuje z 1996 hoda. A što da aktyŭnaści…

Ivan Kotlar: «Pakul jana (arhanizacyja) zajmajecca tym, što sadziejničaje vykładańniu, adukacyi ŭ halinie pravoŭ čałavieka.

Dapamahaje pravodzić kanfierencyi, sieminary, jakija štohod prachodziać u našym univiersitecie».

Ale ž arhanizacyja — respublikanskaja! I voś niekalki miesiacaŭ tamu, paśla čarhovaha pieraabrańnia na pasadu kiraŭnika hetaj «pravaabarončaj» arhanizacyi, Kotlar prymaje valavoje rašeńnie:

«Pryniataje rašeńnie zrabić arhanizacyju paŭnavartasnaj — kab jana zajmałasia i jurydyčnaj abaronaj, i infarmacyjnymi spravami…»

Śćviardžaje, što ideja hetaja pryjšła jamu ŭ hałavu biez padkazki zboku. Vidać, pieršym krokam na šlachu takoj rearhanizacyi i stała prysutnaść pradstaŭnika «Public association» u Strasburhu. Ale čamu heta byŭ nie kiraŭnik arhanizacyi, a čałaviek, jakoha zusim niadaŭna ŭviali ŭ arhkamitet?

Ivan Kotlar: «Nu, heta nie ad nas, ja nie viedaju — vidać, heta Ministerstva zamiežnych spraŭ jaho nakiroŭvała…».

Źjaŭleńnie na pasiadžeńni Rady Jeŭropy nikomu nie viadomaj «pravaabarončaj» arhanizacyi Tankačova źviazvaje z pošukam jeŭračynoŭnikami «kampramisnaj pradstaŭlenaści na placoŭcy biełaruskaj hramadzianskaj supolnaści».

Alena Tankačova: «Budziem najbližejšym časam śviedkami taho, što buduć źjaŭlacca pradstaŭniki iłžehramadskich arhanizacyj ź iłžemetami, i my pavinny być da hetaha hatovyja».

Samaje aburalnaje, tłumačyć svaju reakcyju pravaabaronca, što jany «chavajucca» za niedziaržaŭnaść: niachaj by kazali praŭdu, što jany pradstaŭniki praŭładnych arhanizacyj, i ščyra adstojvali ŭ dyskusijach pazicyju režymu.

• 0
• 0
• 0
• 0
• 0
• 0
• 0
• 0