Rasijskaje MZS zajaviła, što Rajan Fohł pavinien pakinuć krainu jak maha chutčej. Jaho abviaścili piersonaj non hrata.
Rasieja zajaviła, što vyšle z krainy supracoŭnika ambasady ZŠA ŭ Maskvie Rajana Krystafera Fohła, jakoha padazrajuć u sprobie zaverbavać supracoŭnika rasiejskich specsłužbaŭ.
Ministerstva zamiežnych spraŭ Rasiei abviaściła, što spadar Fohł pavinien pakinuć krainu jak maha chutčej. Jaho abviaścili personaj non hrata.
«Padobnyja pravakacyjnyja dziejańni ŭ duchu „chałodnaj vajny“ nie spryjajuć umacavańniu ŭzajemnaha davieru», — zajavili u MZS Rasiei.
Raniej rasiejskaja Federalnaja słužba biaśpieki paviedamiła, što zatrymała ŭ Maskvie supracoŭnika CRU: «U noč z 13 na 14 traŭnia orhany kontrvyviedki FSB Rasiei pry sprobie viarboŭki supracoŭnika adnoj z rasiejskich specsłužbaŭ zatrymali kadravaha supracoŭnika CRU ZŠA Fohła Rajana Krystafera, jaki pracuje pad prykryćciom pasady treciaha sakratara palityčnaha adździeła pasolstva ZŠA ŭ Maskvie», — havorycca ŭ paviedamleńni FSB Rasiei.
Pradstaŭnik ambasady ZŠA admoviŭsia kamentavać hetuju infarmacyju. Paźniej u suviazi z hetym zatrymańniem ambasadara ZŠA ŭ Rasiei Majkła Makfoła vyklikali ŭ MZS krainy dla tłumačeńniaŭ.
Pavodle FSB, u zatrymanaha supracoŭnika pasolstva vyjavili specyjalnyja techničnyja srodki, piśmovyja instrukcyi dla rasiejskaha hramadzianina, jakoha pavinny zaverbavać, bujnuju sumu hrošaj i srodki dla źmieny źniešnaści, — paviedamlaje VVS.
Kamientary