Biełarusy prosiać AAN prymusić ułady krainy vykonvać mižnarodnyja abaviazacielstvy
Hrupa biełarusaŭ, u adnosinach da jakich Kamitet AAN pa pravach čałavieka vyjaviŭ parušeńni pravoŭ, pryznanych u Mižnarodnym pakcie ab hramadzianskich i palityčnych pravach, źviarnulisia ŭ kamitet z zajavaj, jakaja zaklikaje AAN prymusić ułady vykonvać mižnarodnyja abaviazacielstvy.
U liście, nakiravanym u Kamitet ad imia achviaraŭ parušeńniaŭ pravoŭ čałavieka, pravaabaroncaŭ i hramadskich aktyvistaŭ ŭzhadvajecca, što ciaham apošnich hadoŭ Kamitet AAN pa pravach u 36 vypadkach zafiksavaŭ parušeńni pravoŭ čałavieka ŭ Biełarusi. Adnak, pa słovach zajaŭnikaŭ, nivodnaje z hetych rašeńniaŭ nie było vykanana ŭładami, choć Kanstytucyja krainy i pryznaje viaršenstva mižnarodnaha zakanadaŭstva nad nacyjanalnym.
Aŭtary zvarotu prapanavali AAN peŭnyja zachady dla vyrašeńnia situacyi. Pa-pieršaje, “abmierkavać situacyju pa vykanańni rašeńniaŭ Kamiteta AAN pa zvarotach hramadzian Respubliki Biełaruś z udziełam śpiecdakładčyka AAN pa pravach čałavieka ŭ Biełarusi pradstaŭnika Biuro pa demakratyčnych instytutach i pravach čałavieka (BDIPČ), udzielnikaŭ Zvarotu i pradstaŭnikoŭ MZS Respubliki Biełaruś”. Pa-druhoje, “stvaryć pry MZS Respubliki Biełaruś śpiecyjalnuju kamisiju z udziełam achviaraŭ parušeńniaŭ Mižnarodnaha pakta ab hramadzianskich i palityčnych pravach dla zvarotu da vykanańnia rašeńniaŭ”.
Akramia Kamiteta AAN pa pravach čałavieka list byŭ nakiravany ŭ varšaŭskaje Biuro pa demakratyčnych instytutach i pravach čałavieka, Śpiecyjalnamu dakładčyku AAN pa pravach čałavieka Respublicy Biełaruś Mikłašu Charašci i ministru zamiežnych spraŭ Respubliki Biełaruś Uładzimiru Makieju.
Siarod aŭtaraŭ zvarotu -- były sudździa Kanstytucyjnaha suda Michaił Pastuchoŭ, były staršynia Viarchoŭnaha Savieta, hienierał milicyi Miečysłaŭ Hryb, były namieśnik staršyni Homielskaha harvykankama Viktar Karniajenka, były milicyjant ź Viciebska Pavieł Levinaŭ, maci rasstralanaha Ułada Kavalova, a taksama jurysty, pravaabaroncy, palityčnyja aktyvisty.
Kamientary