Łukašenka i Juščanka sustrenucca ŭvosień

Pra heta ŭ sieradu na pres‑kanferencyi z nahody Dnia Niezaležnaści Ŭkrainy zajaviŭ pasoł hetaj krainy ŭ Biełarusi Ihar Lichavy.

Pavodle jaho słovaŭ, najchutčej sustreča adbudziecca adrazu paśla daterminovych parlamenckich vybaraŭ va Ŭkrainie, heta značyć u kastryčniku ci listapadzie.

«Adkryvaju vam dziaržaŭnuju tajamnicu, moj pryjezd u Biełaruś byŭ adkładzieny na ceły miesiac, bo ŭ Kijevie ŭviesnu čakali Łukašenku, i ja spadziavaŭsia sustrecca ź im jašče na Radzimie, ‑‑ skazaŭ pasoł. — Razam z tym, kab pravodzić sustrečy dvuch kiraŭnikoŭ dziaržavaŭ treba nia prosta demanstravać žadańnie da supracoŭnictva, ale jašče treba dasiahnuć vyrašeńniu kankretnych pytańniaŭ u dvuchbakovych adnosinach».

Ihar Lichavy kaža, što najbolšym jahonym hałaŭnym bolem na pasadzie pasła źjaŭlajecca pytańnie ratyfikacyi damovy ab dziaržaŭnaj miažy, a taksama źniešniaha doŭhu Ŭkrainy pierad Biełaruśsiu. «Užo dziesiać hadoŭ tamu miž našymi krainami była padpisanaja damova ab ratyfikacyi miažy. Hetaja damova była chutka ŭzhodnienaja ŭ Viarchoŭnaj Radzie, usiaho za try miesiacy. Ale biełaruski parlament nie pryniaŭ jaje da siońniašniaha dnia. Tamu ŭsie pytańni tut da biełaruskaha boku», — adznačyŭ I.Lichavy.

Što datyčyć doŭhu Ŭkrainy, to na dumku dyplamata, prablema bolš składanaja: «Jość try roznyja ličby doŭhu Ŭkrainy pierad Biełaruśsiu. My nasamreč hatovyja zapłacić dziaržaŭnyja zapazyčanaści, ale bolšuju sumu składajuć karparatyŭnyja daŭhi pačatku 1990‑ch. Treba dakładna vyznačyć, jakuju sumu my musim zapłacić dziaržaŭnaha doŭhu, ale hetaha pakul niama».

U pasła zapytalisia, ci nie źbirajecca Ŭkraina bližejšym časam uvodzić vizavy režym da biełaruskich hramadzianaŭ. Lichavy adkazaŭ, što heta stanie mahčymym tolki ŭ tym vypadku, kali Ŭkraina ŭstupić u Eŭrasajuz, a heta doŭhi praces. Razam z tym, jon padkreśliŭ, što Biełaruś užo ŭviała suprać ukrainskich hramadzianaŭ svojeasablivy vizavy režym.

«Vašy suajčyńniki svabodna mohuć znachodzicca terytoryi Ŭkrainy biez usialakaj rehistracyi na praciahu 90 sutak, ukraincy ž u Biełarusi — tolki troch, paśla čaho mahčymaja departacyja. Zhadziciesia, što heta nienarmalnaja sytuacyja, jakuju ja ciapier aktyŭna abmiarkoŭvaju ź biełaruskim MZS. Pakul što zhadžajemsia na kampramisnym varyjancie — tryccaci sutak».

Ihar Lichavy paćvierdziŭ žadańnie ŭkraincaŭ vykonvać abaviazki pierad biełaruskim bokam u pytańni pastavak elektraenerhii. Sioleta Ŭkraina pastaviła tolki 39% ad zaplanavanaj kolkaści elektryčnaści. Najpierš heta ź ciažkim klimatyčnymi ŭmovami ŭ našaj paŭdniovaj susiedcy. Taksama Ŭkraina zacikaŭlenyja ŭ tym, kab tranzytam praź Biełaruś pastaŭlać elektryčnaść u krainy Bałtyi.

«Ja viedaju, što da 2011 h. Biełaruś musić pierajści na suśvietnyja ceny na haz, Ukraina nia budzie ad jaje adstavać. Ceny buduć uvieś čas raści i dzie vierchniaja planka hetaj miažy, skazać ciažka. Rasieja nie adzinaja kraina, adkul mahčyma atrymlivać haz, jość arabski śviet, Azerbajdžan. Dziela hetaha my źbirajemsia dabudoŭvać trubapravod Adesa — Brody», — zajaviŭ Lichavy.

Jašče było zajaŭlena, što ciaham miesiacu‑dvuch u Miensku adkryjecca pradstaŭnictva kampanii «Naftahaz Ukrainy».

Bližejšym časam Ukraina źbirajecca ŭstalavać na Čarnobylskaj AES biaśpiečnyja sarkafahi, zajmacca hetym budzie adna francuskaja firma. Razam z tym, kab naŭprost patrapić z horadu Słavucič u Prypiać, treba dva razy pierasiekčy biełaruskuju miažu. Pytańnie ab sproščanym pierasiačeńni tych, chto budzie pracavać na stancyi, jašče nia vyrašanaje.

Siarod inšaha Ihar Lichavy raskazaŭ, što Ŭkraina nie źbirajecca śledam za EZ i ZŠA ŭvodzić vizavyja sankcyi suprać biełaruskich čynoŭnikaŭ. Vykazaŭ nierazumieńnie, čamu Biełaruś nie puskaje na svoj rynak «smačnuju i tannuju» ŭkrainskuju karamiel.

Naprykancy pres‑kanferencyi spadar pasoł zaklikaŭ biełarusaŭ čaściej naviedvać Ukrainu, choć «Krym sioleta pryjechaŭ u Miensk, ale ž mora nikudy nie pierajechała». Štohod Ukrainu naviedvaje 150‑200 tysiač biełaruskich turystaŭ.

• 0
• 0
• 0
• 0
• 0