Dva hady kałonii za stralbu pa voknach žyłoha doma atrymaŭ žychar Pinska
Za niezakonny abarot ahniastrelnaj zbroi, bojeprypasaŭ i chulihanstva asudžany 28-hadovy žychar Pinska, jaki nidzie nie pracuje.
Jak paviedamiła BiełaAPAN namieśnik načalnika adździeła prakuratury Bresckaj vobłaści Alena Leščanka, raniej nieadnarazova sudzimy mužčyna nabyŭ u nieŭstanoŭlenaj asoby vyrablenuju samarobnym sposabam hładkastvolnuju karotkastvolnuju ahniastrelnuju zbroju, prydatnuju dla stralby vintovačnymi patronami, a taksama 133 patrony roznaha kalibru i pryznačeńnia.
Usie hetyja pradmiety jon zachoŭvaŭ u kvatery pa miescy žycharstva.
15 studzienia prykładna ŭ 23.50 pinčanin u stanie ałkaholnaha apjanieńnia z akna svajoj kvatery z chulihanskich namieraŭ zrabiŭ nie mienš jak adzin vystrał pa voknach raźmieščanaha nasuprać žyłoha doma. U vyniku tam byli raźbity dva škła ŭ adnoj z kvater.
Praź dźvie hadziny "strałka" zatrymali supracoŭniki milicyi pa miescy žycharstva i kanfiskavali ŭ jaho zbroju i patrony.
16 krasavika sud Pinskaha rajona i horada Pinska pryznaŭ mužčynu vinavatym pavodle č. 2 art. 295 i č. 1 art. 339 Kryminalnaha kodeksa i pryhavaryŭ da dvuch hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach strohaha režymu. Zabranuju ŭ jaho zbroju i bojeprypasy pa rašeńni suda kanfiskavali.
"Padčas sudovaha pasiadžeńnia abvinavačvany ŭkazaŭ, što ŭ hety dzień jon pasvaryŭsia sa svajoj dziaŭčynaj, vypiŭ i vyrašyŭ pastralać", — dapoŭniła Leščanka.
Pavodle jaje słoŭ, mužčyna abskardziŭ pryhavor i prasiŭ pryznačyć pakarańnie, nie źviazanaje z pazbaŭleńniem voli, matyvujučy raskajańniem va ŭčynienym, pakryćciom uronu paciarpiełym, a taksama tym, što ŭ jaho jość zavinavačanaść pa kamunalnych płaciažach.
4 červienia sudovaja kalehija pa kryminalnych spravach Bresckaha abłasnoha suda adchiliła skarhu pinčanina, pakinuŭšy vierdykt suda pieršaj instancyi bieź źmianieńnia. Jon nabyŭ zakonnuju moc.
Jak adznačyła Leščanka, raniej hety hramadzianin siem razoŭ byŭ sudzimy. Dvojčy jamu pryznačałasia pakarańnie ŭ vyhladzie pazbaŭleńnia voli.
Kamientary