44 biełaruskija dalnabojščyki apynulisia va ŭźbiekskim «pałonie»

Uvieś hety čas jany vymušanyja žyć u kabinach svaich ža furaŭ. A tempieratura pavietra ŭ paŭdniovym miastečku navat nočču nie padaje nižej za 30 hradusaŭ. Tolki da vaśmi viečara tam pracuje prybiralnia. Toje, što naŭrad ci možna nazvać «dušam», — pa susiedstvie.

U takich umovach, dy jašče ŭ samuju śpioku, biełarusy žyvuć užo nie pieršy tydzień. 9 maja jany vyjechali va ŭźbiekski Termiez, bolš čym za 4 tysiačy kiłamietraŭ ad doma, na miažy z Afhanistanam. U punkt pryznačeńnia prybyli 20 maja. I dalej — ni ź miesca.

Dźmitryj Kavaloŭ, dalnabojščyk, pa telefonie z Termieza (Uźbiekistan): «Žyviem u mašynach, tempieratura dniom 45–48 hradusaŭ, nočču apuskajecca ŭ najlepšym vypadku da 30. Miascovaj kuchni straŭniki nie vytrymlivajuć. Svaje pradukty, što byli, užo skončylisia. Kormiać abiacańniami, što voś-voś-voś pojdzie praca. Heta pieršy raz takaja situacyja, raniej byli padobnyja, ale jany niejak vyrašalisia bolš-mienš chutka».

Hrošy ekanomiać jak mohuć. Treba telefanavać dadomu i pastajanna trymać uklučanym kandycyjanier. I padobnyja situacyi sapraŭdy byli. Minułaj zimoj biełaruskija dalnabojščyki zatrymalisia ŭsio ŭ tym ža Uźbiekistanie. Praŭda, praź niepahadź. Pustynia, što stała śniežnaj, tydzień pratrymała pry tryccacihradusnym marozie.

Roznyja pory hoda — pieravozčyk adzin i toj ža. Toje, što vyzvalić biełarusaŭ čas, dy niaprosta, pieravozčyk pryznaje. Voś na stale 44 proźviščy. Kaža, schiema pracy kiroŭcy-mižnarodnika ŭ hetym prajekcie takaja: prybyć treba ŭ Termiez, dalej pryčep z hruzam zabirajuć u Afhanistan. I jak tolki z-za miažy viartajecca svabodny pryčep, dalnabojščyk jaho zabiraje i vyjazdžaje dadomu. Adsiul pytańnie: čamu ŭvieś hety čas pustyja pryčepy nie vychodziać z Afhanistana?

Viktar Praškovič, dyrektar biełaruska-bałharskaha pradpryjemstva mižnarodnych pieravozak: «Nam składana, viadoma, mierkavać pra pryčynu prastoju, tamu što niedzie heta moža być kamiercyjnaj tajnaj našaha zakazčyka. Ale pavodle infarmacyi nie zusim aficyjnaj, jość prablema z mytnymi płaciažami ŭ našaha zakazčyka z Afhanistanam. Usio spyniena, miažu nichto nie pierasiakaje mienavita z hetaj pryčyny».

Zakazčyk, darečy, — bałharski bok. Što jon nie padzialiŭ z afhanskimi partniorami, daviedacca naŭrad ci mahčyma. U dyrektara ci to vychodny, ci to adpačynak. Situacyju ŭskładniaje i toje, što ŭ Afhanistanie niama biełaruskaha dyppradstaŭnictva. I navat pa sumiaščalnictvie tam nichto nie akredytavany. A voś pasolstva našaj krainy va Uźbiekistanie prablem nie bačyć i pra niahody ziemlakoŭ-dalnabojščykaŭ nie viedaje. Ale ŭžo, zdajecca, i pačynać vyratavalnuju apieracyju było b pozna. Pieravozčyk paabiacaŭ zaŭtra pačać vyvodzić svaje fury dadomu. Pa piać mašyn u paradku, u jakim jany kaliści zajazdžali va Uźbiekistan. A jašče dalnabojščykam abiacali dadatkovyja kamandzirovačnyja, u tym liku i za prastoj. Kali heta, viadoma, zmoža zhładzić uražańni ad zaciahnutaha vajažu.

• 0
• 0
• 0
• 0
• 0
• 0
• 0
• 0