Juščanka prapanoŭvaŭ Łukašenku znajści jahony radavod pad Kijevam

Alaksandr Łukašenka 18 červienia znachodzicca ŭ Kijevie. Łukašenka maje namier vyrašyć u Kijevie «padviešanaje» z 2010 hoda pytańnie demarkacyi ŭkrainska-biełaruskaj miažy, košt jakoha — kala 80 młn dalaraŭ. Niezadoŭha da vizitu Łukašenki pahutaryŭ z Kłubam hałoŭnych redaktaraŭ SND, Hruzii i Bałtyi i daŭ intervju «Iźviestijam va Ukrainie». Prapanujem jaho asnoŭnyja momanty.

— Vy idziacie šlacham, alternatyŭnym Ukrainie. Ukraina nie pradaje Rasii HTS, nie ŭstupaje ŭ JeŭrAzES, ale imkniecca ŭ ES. Jaki šlach vy ličycie bolš pravilnym?

— Ja nikoli nie čuŭ, kab Rasieja prasiła Ukrainu addać tranzitnuju trubu. Jana prasiła pradać, heta vialikaja roźnica. My taksama nie hareli žadańniem pradavać tranzitny trubapravod.

Ja nie chacieŭ jaje pradavać i dumaŭ, što nam heta daje. Dadatkovy ryčah cisku na Rasiju? My možam damovicca i damovilisia. My zabiaśpiečany pryrodnym hazam u bolšym abjomie, my majem canu vyšejšuju za rasijskuju, ale nižejšuju za «ŭkrainskuju». Heta taksama dla nas vialikaja dapamoha. Za tyja hrošy, jakija ŭžo my atrymali i jakija zekanomili, my možam pabudavać novuju trubu paralelna. ŭziać i pabudavać. Ale jana nam nie patrebna. My damovilisia i stabilna atrymlivajem haz.

My naohuł stabilna pracujem. U nas niama małočnych vojnaŭ i inšych handlovych. To tudy nas nie puskali, to siudy. Zaraz heta prajšło, i Rasieja ŭ hetym zacikaŭlenaja.

U nas faktyčna adzinaja abaronnaja prastora, adzinaja hrupoŭka ŭzbrojenych sił, biełaruskaja armija hałoŭnuju rolu hraje. Rasiejcy nam addali hetuju rolu. Dzie i što my stracili? Ništo nie zhublena, zaklučana doŭhaterminovaje pahadnieńnie, jaho nichto nie parušaje.

Ukraina nie addaje truby. Nu, moža być. Ale pačali budavać Paŭdniovy patok, Paŭnočny patok i ŭsio — ukrainskija truby zastanucca ŭ ziamli.

Moža, rasiejcy zanadta najechali na Ukrainu, heta niapravilna. Ukraina maje zanadta vialikaje samalubstva, ja viedaju heta z časoŭ armii, słužyŭ razam z ukraincami. A jašče kažuć, što ja častkova chachoł. Naša apazicyja znajšła maje karani pamiž Čarnihavam i Kijevam. Viktar Juščanka prapanoŭvaŭ mnie znajści moj radavod. A ja kazaŭ: navošta, jakaja roźnica.

Na ukraincaŭ najedzieš lišni raz, a jany na škodu sabie nie źjaduć, dyk panadkusvajuć.

Boh pradvyznačyŭ Ukrainie miesca, jano akreślena miežami. Nichto vajavać ź joj ni za Krym, ni za što inšaje nie budzie. Rasija choča narmalnych adnosin, ja heta viedaju ź pieršych vusnaŭ.

Rasija zaniepakojena tym, kab vybudavać narmalnyja adnosiny, i my chočam, kab vy byli z nami. Z ukrainskaha boku nie treba nijakich asablivych namahańniaŭ, ale krainu čakaje vyhada. Heta ž ekanamičny sajuz.

Skažy majmu siabru Nursułtanu Nazarbajevu, što heta budzie palityčny sajuz, jon zaŭtra ž ź jaho vyjdzie.

Nam nie treba zališnie abjadnoŭvacca, budavać nadździaržaŭnyja struktury. Klučavoje — heta ekanomika. Dla Kazachstana heta truby i žaleznyja darohi. Svabodnaje pieramiaščeńnie tavaraŭ važna dla ŭsich. Ad hetaha ŭkrainskaja ekanomika 10 młrd dadaść, truby budzie pastaŭlać ŭsim. Što stracić ad hetaha kraina? Zrabiła adzin krok, ubačyła, što niezaležnaści ništo nie pahražaje — chaj robić druhi. Ja tak razumieju. My vielmi zacikaŭleny ŭ tym, kab z nami była naša siastryčka słavianskaja.

— Biełaruś stała staršynioj u SND. Jak vy budziecie sadziejničać vyrašeńniu kanfliktaŭ u byłych haračych punktach?

— Ja daloki ad Prydniastroŭja, ad taho, što adbyvajecca ŭ Hruzii, Abchazii, Asiecii, ale adnojčy mianie paciahnuła akunucca ŭ hetuju prablemu. Ja niejak pryjechaŭ pa zaprašeńni svaich siabroŭ u hory da ich, pakazvali mnie ich, ja zadumaŭ temu z čysta biełaruskim padychodam. Nahorny Karabach, što jon ujaŭlaje, jak tam žyvuć ludzi, dzie pracujuć. Tam ža narmalnaha žyćcia niama. Ja zrazumieŭ, hetuju prablemu treba vyrašać. Pahavaryŭ z adnym prezidentam, z druhim. Patłumačyŭ, što situacyja takoj doŭha być nie moža. Armianie sa mnoj pahadzilisia, ź Ilchamam Alijevym ja pahavaryŭ, jon skazaŭ, što taksama nie suprać. Choć ja i nienavidžu rolu pasiarednika. Ja prapanoŭvaŭ na hetuju rolu Ukrainu, ale jany nie zachacieli.

Rasija i Azierbajdžan pavinny sieści razam i vyrašyć pytańni. Dla hetaha patrebna palityčnaja vola abodvuch prezidentaŭ. A Minskaja hrupa mocnych hetaha śvietu moža vystupić harantam.

— Va Ukrainie šmat pišuć pra vašaha małodšaha syna Mikałaja. Ci bačycie vy jaho svaim pierajemnikam i ci žadajecie jamu prezidenckaj doli?

— Ja mabyć nie dažyvu da taho času, kali moj małodšy syn zmoža zachacieć stać prezidentam. Hetyja pustyja razmovy ab pierajemnikach. Mianie pačali paprakać, što Mikałaj — moj spadčyńnik. Ale jamu jašče treba 30 hadoŭ, kab pasprabavać stać prezidentam. Ja ŭžo na hetym śviecie da taho času nie budu.

— Nie abaviazkova, moža i budziecie.

— Nu, ja viadoma chaču pažyć. Ale vy razumiejecie, pracavać prezidentam, źniščać siabie na hetaj pasadzie, kožny dzień navaročvalisia niervy na kułak i doŭha pražyć — viadoma, składana. Daj Boh, ale vy ŭjaŭlajecie hety raskład. Usio heta zvyčajnaja vydumka, pałochać ludziej. Maŭlaŭ, Łukašenka budzie pry ŭładzie, pakul Kola nie vyraście. Dumali, narod hetaha spałochajecca. Ale ŭ nas kampaktnaja kraina, narod raźbirajecca. A vas heta uschvalavała?

— Naadvarot, supakoiła, pierakanała ŭ biełaruskaj stabilnaści.

— Paprakajuć mianie i što starejšy syn choča stać prezidentam, heta bližej da iściny. Ale vy vielmi pravilna spytali, ci chaču ja synu prezidenckaj doli. Nie chaču. Vy nie ŭjaŭlajecie, što takoje prezidenctva dla majoj siamji. Ja chaču, kab maje dzieci spakojna žyli i kab u nas pałkami nie kidali.

Nichto mianie nie papraknie ŭ tym, što ja chaču, kab maje dzieci stali prezidentami. Ja, viadoma, nie zmahu ich hetaha prava pazbavić, ale starejšy kaža, što jamu chapaje majho prezidenctva.

Moj starejšy syn pracuje maim pamočnikam. Jon vierny čałaviek, nikomu nie pieraškadžaje. Jon — dadatkovaja krynica infarmacyi dla mianie. Jon prychodzić i raskazvaje baćku, što ličyć patrebnym.

U nas u Biełarusi stvorany kampaktny apieratyŭna-analityčny centr pry prezidencie, u im mienš za sto čałaviek. Jaho kantraluje moj starejšy syn. Pa zakonie jamu padkantrolnaja viarchuška śpiecsłužbaŭ. Syn pieražyvaje za baćku, prakuror razumieje, što jon padkantrolny, i sudździ razumiejuć, što padkantrolnyja. Kali hałava nie hniłaja, chvost budzie krucicca.

Ale ja nikoli nie kazaŭ synu: ja pajdu, a ty zastaniešsia.

• 0
• 0
• 0
• 0
• 0