Siońnia biełaruski aficyjny lider naviedaŭ dva abjekty — uzornuju škołu i ŭzornuju ciaplicu.
Vystupy byli stroha pa temie. U pieršym vypadku — pra adukacyjnuju palityku, u druhim —pra ahrarnuju.
I heta, badaj, taja sytuacyja, kali pakazalnym jość nia toje, što prahučała, a toje, što nie prahučała.
Z paniadziełka zacikaŭlenaja publika čakała reakcyi na zajavu rasiejskaha ambasadara pra mahčymaść pierakinuć u Biełaruś jadravuju zbroju dziela adkazu amerykancam.
Zhadziciesia, nia kožny dzień dziaržavie ź biaźjadravym statusam u Asnoŭnym zakonie robiać takija prapanovy. Tut nie abyścisia razvažańniami senatara Čarhinca.
Zhadajma: kali pijaraŭskija mierkavańni vymahali niejkich zajaŭ pieršaj asoby, to chadžeńnie ŭ narod było dobrym fonam. Miž inšym, sioleta ŭ sakaviku, kali elektarat zaniepakoiŭsia, što kiraŭnika doŭha nia bačna, mienavita vyjezd na fabryku harodniny byŭ skarystany dziela cełaha vejeru prahramnych zajaŭ. Najpierš, kažučy zahałoŭkam BIEŁTA, "prezydent Biełarusi adkinuŭ čutki ab svajoj surjoznaj chvarobie". Zvyš taho, prahučali, u pryvatnaści, i acenka vynikaŭ Dnia voli (pamiatajecie pra "šałudzivych ludziej"?), i — nota bene! — zapeŭnivańnie pra hatovaść i nadalej być dla Maskvy nadziejnym stratehičnym chaŭruśnikam u źviazku ź planami amerykancaŭ.
Surykaŭ, kali razabracca, mienavita heta i prapanavaŭ. Ale pijanerskaha "zaŭždy hatovy!" u adkaz nie prahučała. Nie prahučała i aficyjnaha adłupu. Ni słova pra rakiety. Usio kruciłasia vakoł tamataŭ, jakich u novaj ciaplicy možna sabrać pa 100 kh z kvadratnaha metra. Chacia pry žadańni, jak vy razumiejecie, pryvieźci z saboj aŭtobus žurnalistaŭ dy nibyta ekspromtam pahutaryć ź imi pra ŭsio nabalełaje na tle rekordnych uradžajeŭ harodniny možna było b elementarna.
Čamu jadravaja tema akazałasia takoj ślizkaj?
Raju pračytać mierkavańni Jarasłava Ramančuka — "Kali maŭčańnie jość słabaściu" dy Jurja Drakachrusta — "Jadravy cuhcvanh Alaksandra Łukašenki".
Nasamreč, vyhladaje na toje, što Maskva pastaviła ŭ sytuacyju, kali luby chod paharšaje stanovišča. A chadzić daviadziecca. Naśpiavajuć prablemy z vykanańniem handlovaha pahadnieńnia, dyj novaja bitva za adnosna tanny haz nie za harami. Nasoŭvajecca chałodny sezon z asabliva niepryjemnymi paryvami ŭschodniaha vietru.