 Nasta Azarka |  Ivan Šyła |
Sudy nad nacyjanalnymi aktyvistami: Naści Azarcy — 1 młn 240 tys. štrafu, školniku Ivana Šyłu pryznali vinavatym, ale vynieśli tolki papiaredžańnie. Advakat Maryjana Simaška na sudzie: Chacia ja nia maju prava rabić pramych acenak, ale liču dziejnaść «Maładoha Frontu» karysnaj dla Biełarusi, i jana budzie praź niejki čas aceniena naležnym čynam. Prakuror: nie pieratvarajcie zvyčajnuju spravu ŭ palityčnuju. My sudzili b tut navat siabra niezarehistravanaha tavarystva chamiačkoŭ.
U aŭtorak 4 vieraśnia ŭ Niaśvižy j Salihorsku adbylisia sudy nad udzielnikami patryjatyčnaha ruchu moładzi, biełaruskamoŭnymi Ivanam Šyłam i Nastaj Azarkaj.
Niaśviž, 9.45: Kala sudu źbirajucca ludzi, jakija pryjechali padtrymać Nastu Azarku. Siarod ich — Siarhiej Panamaroŭ z Klecku, Pavał Krasoŭski z Žodzina, Aleś Michalevič ź Miensku. Usiaho kala 15 čałaviek.
Dziažuryć kala sudu j hrupa BT z žurnalistam Dzianisam Balšakovym, jaki prasłaviŭsia repartažami z Płoščy (pra šprycy i pornačasopisy).
Vielmi šmat milicyi j supracoŭnikaŭ u cyvilnym. Jany ci nie na kožnym rahu vulicy. Pryježdžych, što kirujucca da sudu, nie chavajučysia «viaduć» ad patrula da patrula.
Niaśviž, 10.01: Pačaŭsia sud. Padtrymać Nastu pryjšli kala 20 čałaviek. Proźvišča sudździ — Dunajeva.
Salihorsk, 10.01: Dla sudu nad salihorskim aktyvistam Ivanam Šyłam u miascovym rajonnym sudzie vyłučyli samuju vialikuju zalu, na 60 čałaviek. Ale jana ci nie na pałovu zapoŭnienaja ludźmi, u jakich miascovyja žychary paznajuć sacyjalnych pedahohaŭ miascovych škoł.
Padrymać Ivana pryjechali viadomyja palityki j pravaabaroncy, siarod ich — Aleś Bialacki (pravaabaronca), Valer Uchnaloŭ (PKB), Anatol Labiedźka (AHP), Valancin Stefanovič (pravaabaronca). Sabralisia moładzievyja aktyvisty z Salihorsku j inšych haradoŭ. Jany abiacajuć pravodzić akcyju padtrymki pad voknami sudu.
Salihorsk, 10.14: Ivan Šyła chadajničaŭ, kab z zali byŭ vydaleny nieviadomy čałaviek, jaki zdymaŭ pasiedžańnie na kameru. Sudździa chadajnictva zadavoliła, j čałaviek z kameraj pakinuŭ zalu.
Ivan zajaviŭ, što nie razumieje rasiejskaj movy. Tamu ŭ pracesie ŭdzielničaje pierakładčyca ź biełaruskaj.
Salihorsk, 10.26: Pad budynkam Salihorskaha sudu sabrałosia kala 60‑70 čałaviek. Ich ščylna abstupiŭ AMAP, u moładzi siłaj adabrali raściažku. Da sudu padjechali try milicejskija aŭtobusy.
Moładź skanduje «Svabodu!», «Žyvie Biełaruś!»
 Fota Radyjo Svaboda. Pahladzieć fotarepartaž. |
Salihorsk, 10.31: Žorstki razhon moładzi ŭ Salihorsku.
Akcyja padtrymki moładzi kala rajonnaha sudu ŭ Salihorsku žorstka razahnanaja. Tych, chto mieŭ choć jakuju symboliku, znački, pachapali j kinuli ŭ aŭtazaki. Astatniaja moładź pasprabavała zastupić darohu aŭtobusu, tady pačałosia źbićcio j novyja zatrymańni.
Niaśviž, 10.37: Kala budynku sudu znachodziacca kala 25 čałaviek, jakim nie chapiła miesca ŭ zali.
Salihorsk, 10.39: Ivan Šyła prapanavaŭ sudździ adrazu abvieścić prysud, biaź lišnich farmalnaściaŭ. U spravie fihurujuć materyjały prasłuchoŭvańnia telefonnych razmoŭ Ivana.
Salihorsk, 10.46: Ivan Šyła admoviŭsia davać pakazańni. Sud zasłuchaje pakazańni, jakija Ivan davaŭ u časie śledztva.
Salihorsk, 11.27: U pracesie abvieščany pierapynak na 15 chvilin. Dapytali śviedkaŭ — troch supracoŭnikaŭ milicyi. Jany skazali, što Ivan Šyła vyviešvaŭ raściažki, raspaŭsiudžvaŭ ulotki. Adnak bahata śviedkaŭ nie źjavilisia. Ciapier sudździa vyrašaje, ci možna razhladać spravu dalej biaź ich udziełu.
Niaśviž, 11.57: Dapytali śviedak. Ciapier idzie razhlad piśmovych materyjałaŭ spravy. Siarod prysutnych la sudu — Alaksiej Janukievič, Uładzimier Łabkovič. U maci Nasty Azarki kvietki ŭ rukach.
Niaśviž, 12.35: Abjaŭleny pierapynak u pracesie na 10 chvilin. Užo zasłuchanyja śviedki j razhledžanyja materyjały spravy.
Adnym z dokazaŭ pa spravie źjaŭlajucca razdrukavanyja hutarki, interviju z roznych internet‑sajtaŭ, a taksama nalepačnyja i razdatačnyja materyjały z zhadvańniem «Maładoha frontu»
Na sudzie prysutnyja pradstaŭniki pasolstvaŭ ZŠA i Słavakii.
Kala sudu zatrymanyja fotakarespandent Uładzimier Hryzin i niezaležny žurnalist Siarhiej Sys.
Da tych, chto pryjechaŭ padtrymać Nastu, dałučylisia Enira Branickaja i Juraś Hubarevič.
Maci Nasty Azarki śviedčyć, kab zastacca ŭ zali. Karespandentu NN jana zmahła acharaktaryzavać toje, što adbyvajecca, tolki adnym słovam: «Ciažka».
Salihorsk, 12.47: I ŭ Salihorsku ŭ jakaści dokazaŭ vystupajuć razdrukoŭki z sajtaŭ i vyrazki z hazet u dadatak da telefonnych prasłuchoŭvańniaŭ.
Salihorsk, 13.10: Abvieścili pierapynak na 30 chvilin. Byli dapytanyja dadatkovyja śviedki, začytanaja charaktarystyka z škoły. Da sudu padjechali Vincuk Viačorka, Viačasłaŭ Siŭčyk, Pavał Sieviaryniec.
Niaśviž, 13.10: Praces praciahvajecca. La sudu źbirajucca ludzi ź biełymi j čyrvonymi kvietkami. Pradstaŭnik prakuratury prosić u jakaści pakarańnia Naście Azarcy 500 bazavych adzinak.
Niaśviž, 13.35: Prakuror nastojvaŭ na tym, što skład złačynstva dakazany: ahitacyja za arhanizacyju, paklop na BRSM, udzieł u pasiedžańniach niezarehistravanaj arhanizacyi, vyviešvańnie raściažak. Ale z ulikam dobrych charaktarystyk z škoły j pracy prosić abmiežavacca štrafam.
Advakat Halijeŭ zajaviŭ, što artykuł, pa jakim sudziać Nastu, nie adpaviadaje sučasnamu zakanadaŭstvu j patrebny tolki peŭnym asobam u Biełarusi. Skazaŭ, što nia moža być składu złačynstva va ŭdziele ŭ arhanizacyi, jakaja maje kulturnickija, adukacyjnyja mety, što takaja arhanizacyja musiła b być padtrymanaja dziaržavaj, i zaklikaŭ spynić spravu.
Azarka ŭ apošnim słovie skazała, što pryznaje svaju pamyłku, što hulała ŭ dziciačyja hulni, skakała vyšej hałavy. Ale zajaviła, što nia spynić dziejnaści j budzie pracavać u tym samym rečyščy nadalej, i budzie damahacca, kab arhanizacyju zarehistravali.
Salihorsk, 14:34 Jak paviedamiŭ Vincuk Viačorka, ciapier u RUUSie Salihorsku znachodziacca zatrymanyja raniej aktyvisty, jakija čakajuć dalejšych krokaŭ z boku milicyi. Heta Franak Viačorka i Aleś Kalita z «Moładzi BNF» i spadar Jasievič z «Maładoha Frontu».
Vincuk Viačorka ciapier idzie ŭ RUUS, kab vyśvietlić los zatrymanych i addać pieradaču.
Niaśviž, 14:40 Praz dvaccać chvilin Naście Azarcy budzie vyniesieny prysud. Nahadajem, što prakuror paprasiŭ 500 bazavych vieličyniaŭ (bolš za 15 młn rubloŭ).
Salihorsk, 14:43 Abvieščany čarhovy pierypanak.
Byli začytanyja pakazańni śviedkaŭ, jakich nie było na sudzie, prademanstravanyja "rečdokazy": aŭdyjokasety, kampakt-dyski, paviazki, znački «Małady Front». Baćka Ivana Šyły, jak aficyjny pradstaŭnik niepaŭnaletniaha Ivana Šyły, admoviŭsia davać charaktarystyku synu.
Salihorsk, 14:51 . Na vulicy, la budynku sudu, staić kala 50 čałaviek. U asnoŭnym heta moładź u sakołkach «Małady Front», niekatoryja trymajuć partrety Źmitra Daškieviča, hukajuć lozunhi salidarnaści. Milicyjantaŭ kala sudu 20 čałaviek, jany ŭsio filmujuć na videa.
Pavodle acenak prysutnych, prysud Ivanu Šyłu siońnia moža być nia vyniesieny: jašče navat nie pačynalisia sudovyja sprečki.
Niaśviž, 15:07. Naści Azarcy vyniesieny prysud: 40 bazavych adzinak (1 młn 240 tysiačaŭ) štrafu.
Niaśviž, 15:20. Na vychadzie z sudu Naści Azarcy padaryli kvietki, jana ź siabrami sfatahrafavałasia na hanku sudu. «Ja čakała, što prysud budzie našmat bolš žorstki, — kaža Nasta. — I da hetaha sudu rychtavałasia, jak da ispytu. I ja liču, što my vytrymali hety ispyt — i ja, i ŭsie tyja, chto mianie padtrymlivaŭ».
Salihorsk, 15:22 Udakładnieny śpis zatrymanych u Salihorsku: Aleś Kalita, Franak Viačorka, Źmicier Chviedaruk, Źmicier Jasievič, Viktar Dzienisievič. Im admovilisia brać pieradačy.
U sudzie pačalisia sudovyja sprečki.
Salihorsk, 15:41 Prakuror zapatrabavaŭ asudzić Šyłu biez pryznačeńnia pakarańnia.
Salihorsk, 15:52. Try chviliny tamu zatrymanyja Illa Šyła, Dzianis Karnoŭ, Kasia Halickaja, Alaksiej Šein, Kryścina Samojłava, Andruś Tyčyna. Tym časam raniejšym zatrymanym dazvolili pieradać pieradaču.
15:55 Advakat prosić apraŭdać Ivana.
16:07 Sud nad zatrymanymi siońnia ranicaj u Salihorsku moładzievymi aktyvistami projdzie zaŭtra, 5 vieraśnia.
16:24 Prysud Ivanu Šyłu budzie vyniesieny ŭ 17:45.
Advakat Maryjana Simaška zaznačyła padčas sprečak, što niama nivodnaha pramoha dokazu ŭdziełu Ivana ŭ Maładym froncie. Jana taksama zajaviła, što chacia nia maje prava rabić pramych acenak, ale "ličyć dziejnaść MF pazytyŭnaj i karysnaj dla Biełarusi, i jana budzie praź niejki čas aceniena naležnym čynam".
Paśla apošniaje słova ŭziaŭ Ivan Šyła. Jon napačatku adznačyŭ, što siońnia na sud pryjechała šmat ludziej ź Miensku i ź inšych haradoŭ Biełarusi, jakija mieli na mecie pravieści mirnuju akcyju padtrymki, ale jany byli razahnanyja i suprać ich prymieniena siła. «Siońnia sudziać nie kankretna mianie, siońnia sudziać usich, chto nia zhodny z hetaj systemaj. Siońnia adbyvajecca sud nad hramadzianskaj abyjakavaściu. Heta ŭsio adbyvajecca z maŭklivaj zhody ŭsich nas, navat tych, chto prysutničaje ŭ zali, i hetaja nienarmalnaść aburaje. Hramadztva nia moža i nie pavinna dazvalać uładam takija sudziliščy», - skazaŭ Ivan Šyła.
Prysud stanie viadomym a 17:45. Prakuror, nahadajem, paprasiŭ asudzić Ivana biez pakarańnia. Heta jon patłumačyŭ tym, što Ivan niepaŭnahadovy, tamu nia moža być kinuty ŭ turmu abo na chimii. Pakolki jon nidzie nie pracuje, jon taksama nia moža być aštrafavany. Prakuror taksama pieraściaroh, kab nie pieratvarali "zvyčajnuju spravu" ŭ palityčnuju. My navat sudzili b tut siabru niezarehistravanaha tavarystva chamiačkoŭ.
17:00
Litaralna tolki što pad Salihorskam zatrymali mašynu, u jakoj kiravalisia ŭ horad Pavał Sieviaryniec, Barys Harecki i Aleś Halijeŭ. Zatrymali kiroŭcu, astatnim udałosia skiravacca dalej.
18:15
Ivana Šyłu pryznali vinavatym, ale vynieśli pieraściarohu.
18:20
Ludzi — kala 60 čałaviek, — śpiavajučy «Mahutny Boža», iduć da Salihorskaha RUUS, dzie znachodziacca zatrymanyja siońnia pad ścienami sudu moładzievyja aktyvisty.
Napieradzie kalony Pavał Sieviaryniec i dvoje bratoŭ Šyłaŭ.
Dajšoŭšy da budynku RUUS, jany niekatory čas pastajali pad jaho ścienami -- budynak byŭ ačepleny milicyjaj - i razyšlisia.
Zaŭtra, napeŭna, projduć sudy nad zatrymanymi siońnia moładzievymi aktyvistami.
