Biełaruskija Karyby pad Vaŭkavyskam — pryhoža i niebiaśpiečna
Tut zabaroniena kupacca, ale sotni ludziej z usioj krainy jeduć za ŭražańniami. Krejdavyja karjery pad Krasnasielskam vabiać svajoj błakitnaj vadoj. Čym nie Karybskaje mora!
Krejdavyja karjery znachodziacca ŭ Vaŭkavyskim rajonie. Chacia takija ž jość i ŭ inšych miescach, tut ich najbolš. Naležać jany AAT «Krasnasielskbudmateryjały».
Kali zajści na sajt pradpryjemstva, adrazu vypłyvaje akno, u jakim papiaredžvajuć haściej pasiołka ni ŭ jakim razie nie kupacca ŭ karjerach. Bo krejdavyja karjery časta absypajucca. A taksama tamu, što ŭ vadzie kolkaść kaliformnych i termatalerantnych bakteryj pieravyšaje normu ad 60 da 100 (!) razoŭ.
Pra zabaronu znachodžańnia ŭ technałahičnaj zonie nahadvajuć i šyldy.
Ale heta nikoha nie strymlivaje. Dziasiatki mašyn možna sustreć na ŭzbočynie biełaj ad krejdy darohi. Jeduć nie tolki z Haradzienščyny, ale i ź niablizkaha Minska. Da stalicy — 270 km.
Kali źjazdžajecie z trasy da karjeraŭ, mienavita bieły koler darohi adrazu pryciahvaje ŭvahu. Spačatku zdajecca, što heta nastupstvy niejkaja technahiennaj avaryi. Nahladzieŭšysia sučasnych filmaŭ, možna nabrać u hałavu i nie takoha.
A z-za pavarotu danosicca huł, nibyta dzieści pobač lacić viertalot. Nasamreč, heta šmattonnyja vołaty BiełAZy.
Raniej davodziłasia bačyć ich vyklučna na fotazdymkach. Ale ŭ realnaści jany nie zrabili mocnaha ŭražańnia. Zdavałasia, što jany pavinny być kudy bolšymi, chacia i tak zusim nie maleńkija.
Jany jeździać, uzdymajučy chmary biełaha pyłu, jaki paśla asiadaje na aŭtamabili. Pajezdku daviadziecca zakančvać naviedvańniem aŭtamyjki.
Karjeraŭ niekalki. My adpravilisia na Karpaŭcy. Zhodna z kartami Huhła, u hetym miescy ich try.
Krasnasielskija karjery ŭvieś čas abmiarkoŭvajuć na forumach. Z hoda ŭ hod svaimi ŭražańniami ŭ internecie dzielacca tyja, chto dabraŭsia da «błakitnaj vady». Niekatoryja śćviarždajuć, što časam padjezd da ich achoŭvajuć milicyjanty: nie dajuć lehkavikam padjechać. Štrafujuć za niapravilnuju parkoŭku. Štrafujuć nibyta i za kupańnie. Tolki my nie sustreli nivodnaha milicyjanta, i nichto nie pahražaŭ nam.
Karjery roznyja. Samy błakitny i najbolš ablubavany ludźmi — pieršy. Da jaho iści z kiłamietr ad darohi. Adrazu vas sustrakaje vializny ekskavatar, a pobač ź im, u vahončyku, jość vartaŭnik.
Vartaŭnik sumna prahulvaŭsia pa vulicy, nie źviartajučy ŭvahi na turystaŭ, što pastajanna «ciakli» da karjera albo nazad. Kali jamu i treba nikoha nie puskać, to, vidać, nadakučyła papiaredžvać pra adkaznaść.
Daroha da karjera vykładzienaja bietonnymi plitami. Niekali pa ich taksama jeździli BiełAZy. Uzdoŭž darohi abrezali elektryčnaść, ale lichtary zastalisia.
Na karjery vielmi abryvisty bierah. Nie kožny rašycca spuścicca da vady.
Chacia kažuć, što dzieści dalej jość i inšy — pakaty. Pužajuć, što karjery hłybokija — da 40 mietraŭ. Ale jość miescy, dzie nie bolš za kalena.
Tolki takich mała. Bolš daviadziecca płavać, čym chadzić pa dnie.
Siudy pryjazdžajuć navat z namiotami — na niekalki dzion. Šašłyk, harełka, pieśni...
Chto nie rašajecca kupacca, prosta atrymlivaje asałodu ad pryrody.
Škada, što karjery tak i nie zrabili turystyčnymi abjektami. A pakul hetaha niama, to ŭsie naviedvajuć ich na svaje strach i ryzyku. Na žal, nie ŭsie navučylisia prybirać za saboj: śmiećcie možna sustreć paŭsiul, dzie adpačyvali niesumlennyja ludzi.
U susiednim karjery vada nie takaja błakitnaja.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym6
Kamientary