Aściarožna: razvod, ci Čamu raspadajucca biełaruskija siemji

U studzieni-mai 2013 hoda na kožnyja 1000 šlubaŭ u našaj krainie prychodziłasia 609 razvodaŭ, hod tamu — 835 razvodaŭ!

AAN vyśvietliła, što za apošnija paŭstahodździa kolkaść razvodaŭ u krainie padvoiłasia, a dla kožnaj čaćviortaj niezamužniaj 40-hadovaj žančyny niama nivodnaha volnaha mužčyny adpaviednaha vieku.

Horšaja situacyja vymaloŭvajecca tolki ŭ susiedniaj Rasii, jakaja pa kolkaści razvodaŭ zajmaje pieršaje miesca. Čamu my apynulisia na druhim, i jak dalej z hetym žyć?

Usio psujuć hrošy?

Dacent kafiedry sacyjałohii BDU Śviatłana Burava adznačaje, što, pavodle daśledavańniaŭ, isnuje 5 hałoŭnych pryčyn, jakija pryvodziać da surjoznych kanfliktaŭ pamiž mužam i žonkaj. Pieršaja i samaja hałoŭnaja — prablemy z hrašyma, na druhim miescy — adsutnaść uzajemaparazumieńnia. Dalej iduć razychodžańni ŭ vychavańni dziaciej, raźmierkavańnie pobytavych abaviazkaŭ i złoŭžyvańnie ałkaholem.

Žančyny čaściej padajuć na razvod, ale jany zvyčajna i tryvajuć da apošniaha. Žonki sychodziać tady, kali pavodziny muža stanoviacca nievynosnymi. Jany, u adroźnieńni ad mužčyn, redka sychodziać z adnych adnosinaŭ u novyja.

«Zakon nie vyznačaje, pa jakich pryčynach možna raźvieścisia, — zaŭvažaje Śviatłana Burava. — U Kodeksie ab šlubie i siamji jość tolki ahulnaje ŭkazańnie, što «šlub skasoŭvajecca, kali sudom budzie ŭstanoŭlena, što dalejšaje sumiesnaje žyćcio muža i žonki i zachavańnie siamji stali niemahčymymi».

Zhodna z statystykaj, u Biełarusi za 1990—2007 hady tracina paraŭ raźvialisia ŭ pieršyja 5 hod šlubu. Viek ustupleńnia ŭ šlub taksama źmianiŭsia: kali ŭ pačatku 2000-ch dla mužčyn jon byŭ roŭny 24 hadam, a dla žančyn — 22,5, to ciapier jon pavialičyŭsia na 2 hady ŭ tych i druhich.

Takim čynam, sučasnyja biełarusy ženiacca paźniej, a razvodziacca raniej za svaich papiarednikaŭ. Asnoŭnaja pryčyna — źmiena roli siamji ŭ sučasnym hramadstvie.

Usio psujuć fieministki?

Sacyjołah Burava adznačaje, što seksualnaja revalucyja praciahvaje karennym čynam źmianiać ujaŭleńni ludziej pra seksualnaść i mižpołavyja adnosiny.

Hiendarnyja roli pačynajuć pieraasensoŭvać. U žančyn, jakija ŭsio jašče adčuvajuć prablemu «padvojnaha pracoŭnaha dnia» (adzin za hrošy va ŭstanovie, a druhi doma biaspłatna), źmianiajucca ŭjaŭleńni ab raźmierkavańni abaviazkaŭ u siamji. Mnohija ź ich, asabliva vysokaadukavanyja, chočuć, kab chatnija spravy byli abaviazkam nie tolki žančyny, ale i mužčyny. I heta spraviadliva, tamu što žančyny siońnia źjaŭlajucca čaściakom takimi ž «karmilcami» siamji, jak i mužčyny.

«Hiendarna afarbavanaj pracy ŭ siamji stanovicca ŭsio mienš i mienš, — kamientuje situacyju siamiejny psichołah Volha Andrejeva. — Nacisnuć na tuju ž knopku pralnaj mašyny moža i mužčyna. Tamu ciapier u siamji zastalisia dźvie asnoŭnyja funkcyi: zadavolvańnie indyvidualnych patrebaŭ (emacyjnych, seksualnych) i hadavańnie dziaciej.

Sacyjalnaja situacyja źmianiłasia. U ŚMI kažuć, što, maŭlaŭ, rujnujucca tradycyjnyja kaštoŭnaści, ich treba adnaŭlać... Ale ničoha tam užo nie adnoviš. Hetyja tradycyjnyja kaštoŭnaści zaraz nikomu nie patrebnyja, tamu što jany nie adpaviadajuć času. Heta nie značyć, što ludziam nie patrebnaja siamja. Prosta stvarać jaje buduć dla inšych metaŭ».

Usio psujuć ehaisty?

Śpiecyjalisty adznačajuć, što siońnia maładyja ludzi ŭsio bolš i bolš schilnyja da narcysizmu. Vynikam takich pavodzin źjaŭlajecca nie tolki niežadańnie prystasoŭvacca da pažadańniaŭ i intaresaŭ muža ci žonki, ale i zapavolenaść u pytańniach naradžeńnia dziaciej.

«Na pieršaje miesca ludzi staviać nie intaresy hramadstva, nie intaresy siamji, a svaje ŭłasnyja, — kanstatuje psichołah Andrejeva. — Ja dumaju, hety praces idzie pa ŭsim śviecie. I tamu siońnia čałaviek adčuvaje prava šukać asabistaje ščaście. Intaresy siamji jon pastavić na druhoje ci treciaje miesca.

U mianie jość svaje dumki nakont pryčyny takich pavodzinaŭ. Była Druhaja suśvietnaja vajna, jakaja patrabavała ad ludziej vialikich achviaraŭ. A paśla pryjšło asensavańnie taho, što žyćcio ŭsiaho adno i treba pažyć troški dziela siabie. Heta naturalny adkat paśla luboj vialikaj vajny — u bok narcysizmu. Ludzi zaraz chočuć bolš vysokaha ŭzroŭniu žyćcia ŭ roznych halinach. Tamu siońnia razmaŭlać pra samaachviaravańnie nie maje sensu».

Usio psujuć infantylnyja junaki?

U dadatak da narcysizmu na postsavieckaj prastory nazirajecca i vielmi vysoki ŭzrovień infantylnaści maładych.

Pry jakich umovach farmirujecca infantylnaja asoba? Kali šmat apieki ŭ siamji. «Heta toje, što ŭ nas nazyvajecca hipierapieka, — apisvaje situacyju Volha Andrejeva. — Tata zvyčajna aktyŭnaha ŭdziełu ŭ vychavańni nie biare, jon zvyčajna albo na pracy, albo na kanapie pierad televizaram. U našaj kultury luboŭ da dziciaci vyražajecca praz hipierapieku. Bolš za toje, šmat mam ź dziacinstva dajuć ustanoŭku svaim dočkam, što tyja pavinny jak maha chutčej vyjści zamuž i naradzić dzicia. Vartaść žančyny ŭ nas vymiarajecca nie piersanalnymi jakaściami, a tym faktam, ci znachodzicca jana ŭ šlubie, nakolki paśpiachova jana vybudavała znosiny z mužčynam».

Časam u niebahatych siemjach možna nazirać cikavuju situacyju: kali dziaŭčynka raście, biudžet siamji pieraraźmiarkoŭvajecca na karyść jaje harderoba. Mama ŭžo apranajecca horš, za saboj amal nie sočyć, a dačce nabyvajuć novyja spadnicy, tufli na vysokich abcasach. U 35 hadoŭ idzie tak zvanaja «vybrakoŭka mam». Zatoje dačka nie zmoža paśla papraknuć, što, maŭlaŭ, jana była drenna apranutaja i tamu nie zmahła znajści sabie mužčynu.

U kachańnia niama vyprabavaŭčaha terminu

Takim čynam, ciapier siemji stvarajucca dla taho, kab zadavolić emacyjnyja i seksualnyja patreby i kab uzhadavać dziaciej. U adroźnieńnie ad savieckaha času, dzie para ŭtvarałasia ŭ tym liku i dla ekanamičnaj stabilnaści partnioraŭ.

Zrazumieła, u šlubie mohuć być takija prablemy, jakija vyrašyć niemahčyma. Naprykład, u ludziej roznyja žyćciovyja kaštoŭnaści.

«Kožny čałaviek upeŭnieny ŭ svaich kaštoŭnaściach i za ich hatovy stajać da kanca, — kaža psichołah. — Ci, naprykład, palityčnyja pohlady. Kali adbyvajucca niejkija značnyja palityčnyja padziei, jany štoraz raskołvajuć nie tolki krainu, ale i siemji. Heta taksama nievyrašalny kanflikt. Ci kali adzin choča emihravać, druhi — zastacca. Adzin partnior maje patryjarchalnyja ŭstanoŭki, a inšy maje svaje ŭłasnyja ambicyi i dasiahnieńni.

Kali zakachanyja ludzi pačynajuć adnosiny, jany šukajuć toje, što ich jadnaje, a nie toje, što adroźnivaje. I nie śpiašajucca hetuju temu abmiakoŭvać, bo bajacca, što šlub nie adbudziecca. Asabliva bajacca hetaha dziaŭčaty. Jany ŭpeŭnienyja, što kachańnie robić cudy, i kali mužčyna jaje kachaje, to zmoža šmat z čym prymirycca. Ale zrazumieła, što heta nie tak».

Śpiecyjalisty ličać, što niama nijakich terminaŭ, paśla jakich adrazu možna ŭstupać u šlub i nie bajacca za svaje adnosiny. Niamiecki psichaterapieŭt Biert Chielinhier kaža, što samaje hałoŭnaje pamiž mužčynam i žančynaj adbyvajecca ŭ pieršyja 15 chvilin znajomstva, a paśla ŭžo pastupova farmirujucca ŭsie patrebnyja pryviazanaści. Heta štości čaroŭnaje, i dla taho, kab zakachanaść adbyłasia, patrebnaja idealizacyja partniora.

Ale žyć čałaviek vymušany nie z prydumanym ideałam, a z realnaj asobaj. Tamu dla taho, kab paźbiehčy niepryjemnych siurpryzaŭ, varta ŭsio z partnioram jak śled abmierkavać. I tolki paśla prymać rašeńnie nakont šlubu.

Tak zvanaha vyprabavaŭčaha terminu ŭ adnosinaŭ niama, tamu nie varta čakać momantu, kab z upeŭnienaściu skazać, što ciapier možna žanicca i šlub budzie doŭhim dy ščaślivym. U hetaj spravie, na žal, nichto nie daje nijakich harantyj.

Piać pryčyn razvodaŭ:

• prablemy z hrašyma

• adsutnaść uzajemaparazumieńnia

• razychodžańni ŭ vychavańni dziaciej

• raźmierkavańnie pobytavych abaviazkaŭ

• złoŭžyvańnie ałkaholem.

• 0
• 0
• 0
• 0
• 0
• 0
• 0
• 0