1025-hodździe Chryščeńnia Rusi: milicyja budzie pracavać va ŭzmocnienym režymie

Padčas uračystaściaŭ z nahody 1025-hodździa Chryščeńnia Rusi, jakija projduć 28–29 lipienia ŭ Minsku, supracoŭniki milicyi buduć pracavać va ŭzmocnienym režymie. Pra heta paviedamili ŭ MUS Biełarusi.

Čakajecca vialiki napłyŭ ludziej (kala 50 tysiač čałaviek), jakija žadajuć ubačyć kryž apostała Andreja Pieršazvannaha, jaki dastaviać na ŭračystaści z Kijeva, ci choć by pabyvać u horadzie tym časam.

Pavodle słoŭ namieśnika načalnika hałoŭnaha ŭpraŭleńnia achovy pravaparadku i prafiłaktyki MUS Ivana Kubrakova, Minsk čakaje pałomnikaŭ z usioj Biełarusi. Tolki ŭ chresnym chodzie, jaki projdzie na praśpiekcie Pieramožcaŭ, pavodle infarmacyi Biełaruskaj pravasłaŭnaj carkvy, voźmuć udzieł prykładna 15 tysiač čałaviek.

«Da achovy hramadskaha paradku my hatovyja ŭ poŭnym abjomie, — zajaviŭ Kubrakoŭ. — Jana budzie ažyćciaŭlacca jak u miescach praviadzieńnia mierapryjemstva, tak i ŭ miescach pražyvańnia haściej. Jakich-niebudź asablivych prablem u suviazi z hetym u milicyi niama, jak i infarmacyi, jakaja b pieraškadžała praviadzieńniu ŭračystaściaŭ».

Ciapier supracoŭniki milicyi adsočvajuć situacyju ŭ susiedziaŭ, pierajmajuć vopyt kalehaŭ pa mierach zaściarohi: jak tam arhanizoŭvałasia achova hramadskaha paradku, jakija byli asablivaści, uźnikali pytańni.

Heta ŭžo nie pieršy vopyt supracoŭnictva orhanaŭ unutranych spraŭ i pravasłaŭnaj carkvy. Dapamoha ŭ achovie hramadskaha paradku ažyćciaŭlajecca padčas usich bujnych carkoŭnych śviat — na Radaŭnicu, Vialikdzień, Kalady, Rastvo, Vierbnicu i inš.

«Jak praviła, nijakich incydentaŭ pry zabieśpiačeńni achovy hramadskaha paradku ŭ miescach praviadzieńnia relihijnych mierapryjemstvaŭ nie ŭźnikaje, — pradoŭžyŭ Kubrakoŭ. — U carkvu iduć z adnoj metaj — pakłanicca Bohu. Navat kali čałaviek prychodzić u chram u stanie niekatoraha padpitku, to pavodzić siabie prystojna».

U toj ža čas uźnikajuć inšyja pytańni. Na chresny chod pryjazdžaje niamała pažyłych ludziej, i kamuści ź ich moža stać drenna. Tamu supracoŭniki milicyi, jak adznačyŭ pradstaŭnik MUS, hatovyja ŭ luby momant akazać nieabchodnuju dapamohu, dla hetaha ž dziažurać bryhady ŭračoŭ chutkaj miedycynskaj dapamohi.

Dla arhanizacyi biaśpieki buduć arhanizavany kantrolna-prapusknyja punkty, pry nieabchodnaści buduć vykarystoŭvacca mietaładetektary dla ahladu ručnoj pakłažy.

Płanujecca taksama prybyćcio vialikaj kolkaści aŭtobusaŭ. U hetaj suviazi budzie arhanizavana parkoŭka transpartnych srodkaŭ. Pra miesca raźmiaščeńnia parkovak, a taksama pra mahčymyja źmianieńni ŭ arhanizacyi darožnaha ruchu budzie dadatkova paviedamlena ŭ srodkach masavaj infarmacyi.

• 0
• 0
• 0
• 0
• 0
• 0
• 0
• 0