22 lipienia aktyvist «Maładoha frontu» Uładź Jaromienak aznajomiŭsia z kryminalnaj spravaj, jakuju zaviali suprać jaho pavodle artykuła ab parušeńni praviłaŭ prafiłajaktyčnaha nahladu.
«Aznajomilisia z advakatam sa spravaj. U spravie roznyja dakumienty, u tym liku pratakoły, jakija skłali milicyjanty pavodle maich nibyta parušeńniaŭ nahladu. Ustalavanych sudom parušeńniaŭ tolki dva, a astatnija — toje, što ličyć milicyja parušeńniami. Ź imi ja niazhodny, i advakat vykłała našy zaŭvahi ŭ skarzie. My źviarnuli ŭvahu na toje, što spravu rasśledavali ŭ hetak zvanym „chutkim režymie“ — usiaho za 15 dzion, miž tym jak zaviedzienaja jana była jašče ŭ traŭni. Čamu? Heta taksama padstava dla skarhi. Zaraz spravu pieradaduć u prakuraturu, i kali nie pryznačyć paŭtornaha rasśledavańnia, to sprava pojdzie ŭ sud. Ale kali heta moža adbycca, mnie nieviadoma», — skazaŭ Ŭładź Jaromienak.
Pavodle Uładzia Jaromienka, śledčy ŭziaŭ u jaho padpisku pra niavyjezd, što aktyvist ličyć biessensoŭnym zachadam. «Ja ž i biez taho pavodle ŭmovaŭ nahladu nie mahu vyjazdžać nikudy biez dazvołu milicyi».
U 2011 hodzie Ŭładź Jaromienak byŭ asudžany na 3 hady źniavoleńnia za ŭdzieł u padziejach 19 śniežnia 2010 hoda, u tym ža hodzie byŭ pamiłavany Alaksandram Łukašenkam.
Za ŭdzieł u šerahu akcyjaŭ salidarnaści z palitviaźniami Uładź na pačatku 2012 hoda atrymaŭ hod prafiłaktyčnaha nahladu, termin jakoha potym byŭ praciahnuty jašče na paŭhoda. Letaś i sioleta jaho niekalki razoŭ sadzili «na sutki» ŭ izalatar na Akreścina z nadumanych, jak ličać pravaabaroncy, pryčyn.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary