25 žniŭnia 60 hadoŭ spaŭniajecca piśmieńniku, historyku Uładzimiru Arłovu. Napiaredadni svajho dnia naradžeńnia jon padzialiŭsia z "Našaj Nivaj" svaimi praviłami žyćcia..
• U žančynach caniu ŭsio, što ŭ ich jość.
• U mužčynach — viernaść samomu sabie.
• U sabie mnie najbolš padabajecca zaciataść. Najmienš — jana ž, kali pierachodzić peŭnuju miažu.
• Maje nastaŭniki — drevy na bierazie Luchava: dva duby, volcha i jasień. Pobač ź imi stajaŭ klon, ale ŭ toj hod, kali była apieracyja na sercy, u dreva trapiła małanka i jano zahinuła. Sioleta ja pasadziŭ pobač ź jahonym «nadmahillem» dva maładyja kloniki.
• Ci jość u mianie vučni? Dakładna viedaju, što byli, kali paŭhoda vykładaŭ historyju ŭ škole.
• Jeŭrazijski šlach pryviadzie ŭ nacyjanalny niabyt. Baču Biełaruś u Jeŭrasajuzie, ale heta niablizkaja budučynia.
• Ciažka, kali ciabie nichto nie kachaje. Trahična, kali nikoha nie kachaješ sam.
• Jak zavajavać žančynu? Isnuje takaja formuła: ździvić, spałochać, naśmiašyć. Ja ŭ jaje nie vieru. Na naša mužčynskaje ščaście žančyny nastolki roznyja, što šukać univiersalny recept zavajovy, dalikatna kažučy, naiŭna.
• Paśla 2008 hoda starajusia słuchacca daktaroŭ i pju štodzionnuju žmieńku lekaŭ. Na dziasiatym dziasiatku Česłaŭ Miłaš pisaŭ, što rabiŭ toje samaje, i zhadvaŭ siabroŭ, jakija z paradaŭ miedykaŭ tolki śmiajalisia. Adnak pračytać tyja słovy metra siabry ŭžo nie mahli.
• Lubimaja strava — u zaležnaści ad hadziny dnia, pary hoda, ad taho, chto jaje hatavaŭ. Moža być prosta aŭsianka ź miodam. Draniki z roznymi dadatkami i prybambasami. Baranina ŭ razmaitych «ipastasiach», prykładam, baranovaja smažanka pad čarnaślivam, jakuju jaduć karol i piśmieńnik u «Ordenie Biełaj Myšy».
• Lubimy napoj — suchoje čyrvonaje vino, pažadana z Novaha Śvietu: kalifarnijskaje, aŭstralijskaje, arhiencinskaje, čylijskaje...Kali pju paŭdniovaafrykanskaje, ujaŭlajucca luboŭnyja hulni lvoŭ u savańnie. Časam doŭhimi zimovymi viečarami pad bieł-čyrvona-biełaje sała mahu sabie dazvolić staroj dobraj staradarožskaj. Štodzionny ž ulubiony napoj — amal čyfiravaha macunku harbata z małakom.
• Dobraja litaratura — heta taja, jakuju cikava čytać i jakaja prymušaje strapianucca ciabie samoha, absalutna niečakana naradžajučy asacyjacyi, siužety, dyjałohi...Apošni prykład — raman Žuze Eduardu Ahuałuzy «Pradaviec minułaha».
• Čytaju i pieračytvaju zaŭsiody niekalki knih. Zaraz padydu da stała i pieraliču. Biblija. «Cynamonavyja kramy» Bruna Šulca. «...I cudy i strachi» Volhi Babkovaj. Śviežy numar «Inostrannoj litieratury», dzie znajšoŭ dyjałohi Adolf Bijoja Kasaresa z Borchiesam. Ale hałoŭnaja nastolnaja kniha — taja, jakuju pišu. Pišu ad ruki, a pierapisvać pierasiadu da kampjutara.
• Najlepšych siabroŭ užo daŭno niama. Ja napisaŭ pra ichnija roznyja, ale adnolkava trahičnyja losy ŭ knizie «Imiony Svabody». Hienadź nie viarnuŭsia z Afhanistana. Valera zahinuŭ na minskaj vulicy pad kołami mašyny hienprakurora.
• Kali nie ŭ Biełarusi, to chacieŭ by žyć u Anhlii, ale, spadziajusia, da hetaha nie dojdzie.
• Z kino hladžu najpierš kłasiku druhoj pałovy XX stahodździa. Niadaŭna jašče raz pahladzieŭ «Akupacyju» Andreja Kudzinienki i jahonuju «Masakru».
• Nielha prabačyć adračenieńnie svajho i addanuju słužbu tym, chto jaho niščyć.
• Kali kiepski nastroj, to ja płavaju. U mietafizičnym sensie taksama.
• Bajusia nie paśpieć.
• Dziaciej treba vychoŭvać svaim prykładam i dobrymi knihami.
***
Uładzimir Arłoŭ
Naradziŭsia ŭ 1953 u Połacku. Piśmieńnik, historyk. Skončyŭ histfak BDU. Pracavaŭ u haziecie «Chimik», vydaviectvie «Mastackaja litaratura», časopisie «Krynica». Aŭtar bolš dvaccaci knih prozy, paezii, eseistyki. Razam z mastakom Źmitrom Hierasimovičam ukłaŭ knihu «Kraina Biełaruś». Žanaty, maje dvuch synoŭ.
