Nieba zamiest vina — jak čałaviek u Čerykavie ažyćciaviŭ svaju maru

Na spabornictvach pa avijamadelavańni viaskovyja chłopcy stanoviacca čempijonami Biełarusi. Majučy vyklučny arhanizacyjny talent u pracy ź dziećmi, Siamion Panizoŭcaŭ u Čerykavie zdoleŭ stvaryć svaju sapraŭdnuju škołu avijamadelnaha sportu…

70-hadovy Panizoŭcaŭ amal 40 hadoŭ žyćcia addaŭ pracy z moładździu ŭ Čerykaŭskim pałacy pijanieraŭ. Heta adziny biełaruski rajcentr, dzie jość svaja «małaja avijacyja».

1993

Jahonaje žyćcio rezka źmianiłasia ŭ 1993 hodzie. Ad momantu stvareńnia ruchu BNF Siamion Panizoŭcaŭ bačyŭ siabie tolki ŭ hetaj arhanizacyi. U toj hod jon pryvioz u Čerykaŭ Zianona Paźniaka, na toj čas deputata Viarchoŭnaha Savieta. Paśla sustrečy z palitykami ŭ miascovym domie kultury miascovyja žychary bolš nie ŭsprymali Siamiona Panizoŭcava jak nastaŭnika i hurtkoŭca, jon staŭ dla ich «pryncypovym apazicyjanieram». Pałova horada imkniecca ź im parazmaŭlać, šukaje parady. Ale ŭłada nie choča navat čuć jahonaje imia. Była b mahčymaść, to vykreśliła b z pamiaci.

Praciahvaŭ u padvale

U 2006 hodzie Panizoŭcaŭ uklučyŭsia ŭ kampaniju adzinaha kandydata ad demakratyčnych siłaŭ. I ŭ tym ža hodzie na čerykaŭskim kardadromie asoby, jakija dahetul zastajucca nieviadomymi, zrezali abarončuju sietku. Heta značyła, što madelam samalotaŭ bolš niama dzie lotać, bo paloty ŭ horadzie zabaronienyja. A zaadno i Siamiona Panizoŭcava prosta zvolnili z doma dziciačaj tvorčaści. Jaho vykinuli z pasady, jakoj jon pryśviaciŭ amal usio svajo žyćcio.

Siamion Siamionavič akazaŭsia čałaviekam vielmi čułym da svaich vychavancaŭ, u sercach jakich raspaliŭ maru lotać. Kab nie akazacca ŭ ich vačach zdradnikam, šeść hod tamu jon abstalavaŭ majsterniu ŭ padvale zvyčajnaj piacipaviarchoŭki. Mienavita adtul pačaŭ svoj šlach Siarhiej Sokałaŭ — čempijon Biełarusi 2012 hoda, a sioleta kursant Minskaha dziaržaŭnaha vyšejšaha avijacyjnaha kaledža sa śpiecyjalizacyjaj «bieśpiłotniki».

Heta raniej avijamadelavańnie ličyłasia dziciačaj zabaŭkaj, a siońnia jano stanovicca pierśpiektyŭnaj prafiesijaj. Bo faktyčna źjaŭlajecca kanstrujavańniem prymityŭnych bieśpiłotnych aparataŭ.

Nieba paklikała

Siarhiej Sokałaŭ vyrablaŭ tajmiernyja madeli (z ruchavikom unutranaha spalvańnia). Jamu nie treba tłumačyć, što takoje hlisada ci tanhaž — usio raspavioŭ Panizoŭcaŭ jašče ŭ 8-ym kłasie. Vajskovaje VNU atrymała ŭžo padrychtavanaha admysłoŭca.

Jašče adzin panizoŭcaŭski vychavaniec Saša Staravojtaŭ u hetym hodzie skončyŭ 9 kłasaŭ dyj pastupiŭ u licej. Na adkrytym čempijanacie Respubliki Biełaruś pa avijamadelnym sporcie siarod junijoraŭ «Sokały Biełarusi — 2013» jon staŭ pieramožcam, padrychtavaŭšy madel z humavym ruchavikom. U mienskim niebie jamu nie było roŭnych, i junijorski kubak adkrytaha pieršynstva RB staŭsia jahonym trafiejem. Darečy, na spabornictva jon pryjechaŭ užo ŭ statusie trochrazovaha čempijona vobłaści.

Adkryŭ viaskovym chłopcam darohu

Saša Staravojtaŭ — były navučeniec Rečyckaj siaredniaj škoły. Heta asobnaja tema.

Rečyca — depresiŭnaja vioska, što mieścicca pasiaredzinie pamiž Čerykavam i Kryčavam. Try razy na tydni chłopiec jeździŭ za dziesiać kiłamietraŭ u rajcentr, kab u zvyčajnym padvale zajmacca samalotami. Adnahodki śmiajalisia z Sokałava i Staravojtava, ličyli «batanami», bo ani cyharety ź imi nie vypališ, ani vina nie papješ. I jany nie pieršyja, raspaviadaje Siamion Panizoŭcaŭ: «Pamiataju, Kościa Pankoŭ na rovary jeździŭ ź Jazior na zaniatki ŭ avijamadelny hurtok, kab zaniać svaje hałavu i ruki lubimaj spravaj».

Siarhiej Sokałaŭ — čempijon Respubliki 2012.

Kościa Pankoŭ paźniej skončyć Vybarhskaje viertalotnaje vučylišča. I takich prykładaŭ proćma.

Vypuskniki avijavučelniaŭ rabili karjery dyj nikoli nie zabyvali pra svajho pieršaha nastaŭnika. Pryjechaŭšy na adpačynak, pieršy ich vizit zaŭždy byŭ da Panizoŭcava.

Sokałaŭ i Staravojtaŭ nie pieršyja, ale, na žal, apošnija. Siamion Panizoŭcaŭ bolš nie budzie nabirać sabie novych vychavancaŭ u padvalnuju majsterniu. Niama ŭmovaŭ… Napeŭna, u Čerykavie bolš nie budzie takoha hurtka, a značyć nie budzie i čempijonaŭ. Miesca avijacyi pakrysie zajmaje tannaje vino. Ale heta časova. Na jahonaje miesca pryjduć novyja Panizoŭcavy, jakija buduć słužyć niebu.

• 0
• 0
• 0
• 0
• 0
• 0
• 0
• 0