«Arhumienty i fakty»: Łukašenki nie stanie ŭ 2015 hodzie

Biełaruski kiraŭnik pastaviŭ krainu na miažu ekanamičnaha abvału, piša rasijskaje vydańnie.

Aryšt biełaruskimi ŭładami hiendyrektara rasijskaj kampanii «Urałkalij» Uładzisłava Baŭmhiertniera znoŭ pastaviŭ Biełaruś na miažu ekanamičnaha abvału (užo treciaha za apošnija 4 hady — uśled za abvałami 2009 i 2011 hadoŭ), a prezidencki rejtynh Alaksandra Łukašenki — pad pahrozu padzieńnia da novaha histaryčnaha minimumu, paśla jakoha jon užo nie zmoža być vybranym prezidentam u 2015 hodzie, piša Michaił Tulski, prezident rasijskaha daśledčaha centra «Palityčnaja analityka».

Prychilniki Łukašenki časta kažuć pra nibyta «ekanamičny cud» i «inavacyjny cud», jakija prademanstravała «madel Łukašenki».

Na spravie ž cudy demanstruje zusim nie ekanomika Łukašenki, a jaho falšyvaja statystyka i ahresiŭnaja prapahanda.

Zrešty, «pakazčyki» hetyja raźbivajucca ŭ puch i prach pry pieršym ža supastaŭleńni ź ličbami vytvorčaści ŭ naturalnych vieličyniach, jakija niaźmiennyja pry lubych koštach.

Tak, łukašenkaŭskaja statystyka kaža, što nibyta VUP u 2012 hodzie dasiahnuŭ 193% da ŭzroŭniu 1990 hoda, ale hałoŭny pakazčyk luboj ekanomiki — vytvorčaść elektraenierhii — zvaliŭsia z 39,5 młrd kVt/h u 1990 hodzie da 30,8 młrd kVt/h u 2012 hodzie, heta značyć składaje tolki 78% ad uzroŭniu 1990 hoda.

Pramysłovuju vytvorčaść łukašenkaŭskaja statystyka-ekvilibrystyka maluje ŭ 2012 hodzie na ŭzroŭni nibyta 258% da 1990 hoda. U naturalnym ža vyražeńni ničoha takoha i blizka niama: hałoŭny artykuł biełaruskaha ekspartu — pierapracoŭka nafty — zvaliłasia z 39,442 młn t u 1990 hodzie da 21,667 młn t u 2012 hodzie, heta značyć składaje tolki 55% ad uzroŭniu 1990 hoda.

Biełaruskaha ekspartnaha tavaru № 2 — minieralnych uhnajeńniaŭ (amal vyklučna kalijnych) — u 1988 hodzie vypuščana 6,7 młn t, a ŭ 2013 hodzie čakajecca vytvorčaść u lepšym vypadku 5,3 młn t, heta značyć na ŭzroŭni 79% ad pikavych savieckich pakazčykaŭ.

Takaja ž situacyja i ŭ budaŭniča-inviestycyjnaj śfiery: łukašenkaŭskaja statystyka kaža pra nibyta 224% da ŭzroŭniu 1990 hoda, naturalnyja ž pakazčyki demanstrujuć zusim inšuju situacyju: u 1989 hodzie pabudavana 5,650 młn m2 žylla, a ŭ 2012 hodzie — 4,487 młn m2 abo 79% da ŭzroŭniu 1989 hoda.

I kali ŭ 2009 hodzie Alaksandru Ryhoraviču ŭdałosia takim šlacham nie dapuścić padzieńnia svajho elektaralnaha rejtynhu, to na miažy 2010–2011 hadoŭ atrymałasia roŭna advarotnaje:

Łukašenka spravakavaŭ niečakana mocnuju reakcyju ŭ adkaz rasiejskich uładaŭ, jakija zamianili zanadta lhotnyja 50%-ja košty na haz, naftu i naftapradukty mienš lhotnymi i bolš nabližanymi da rynkavych (jakija ŭ pačatku 2011 hoda da taho ž jašče i vyraśli).

U vyniku tavarny deficyt źniešniehandlovaha bałansu Biełarusi vyras u 1 kvartale 2011 hoda z 1,2 da 3 młrd dalaraŭ (ź jakich 90% pryjšłosia na RF), u Biełarusi paŭstaŭ surjozny deficyt valuty, jaki jašče bolš vyras paśla krytyčnych repartažaŭ rasiejskaha TB. Vynikam staŭ abvał kursu biełaruskaha rubla da dalara ŭ 3 razy, amal taksama vyraśli i košty i, adpaviedna, źbiadnieła biełaruskaje nasielnictva.

U vyniku, u vieraśni 2011 hoda rejtynh Łukašenki ŭpaŭ, pa dadzienych NISEPD, da 20,5%, staŭšy samym nizkim za ŭsiu 17-hadovuju historyju vymiareńnia rejtynhu Łukašenki. Paśla hetaha, viadoma, Łukašenka zapanikavaŭ i pahadziŭsia pradać «Biełtranshaz» «złym rasiejskim aliharcham» navat tańniej taho koštu, jaki jon da abvału nazyvaŭ «mocna zanižanym» i «rabaŭnickim».

Paśla taho, jak Rasieja atrymała «Biełtranshaz», jana ŭ pačatku 2012 hoda źniziła dla Biełarusi košt na naftu na 10%, a na haz — na 28%, realnaja ž źnižka była jašče vyšej, tak jak suśvietnyja košty nafty i haz znoŭ vyraśli na 10–20%.

Uvohule, Rasieja znoŭ stała pradavać Biełarusi naftu prykładna na 45%, a haz — na 50% tańniej suśvietnych koštaŭ. Pry hetym na miažy 2012–2013 hadoŭ Rasija znoŭ paniziła košty na naftu i haz dla Biełarusi na 3–5%. U vyniku handlovy bałans z deficytnaha staŭ praficytnym, situacyja ŭ ekanomicy stała naładžvacca, zarpłaty i piensii stali nabližacca da taho ŭzroŭniu, jaki byŭ da abvału.

Ciapier ža ekanomika Biełarusi znoŭ zabarachliła:

kali ŭ 1 paŭhodździ 2012 hoda ŭ Biełarusi byŭ tavarny praficyt źniešniaha handlu (ekspart pieravyšaŭ impart) ŭ 1,9 młrd dalaraŭ, to ŭ 1 paŭhodździ 2013 hoda jon źmianiŭsia tavarnym deficytam u 1,7 młrd, pryčym usio bolš narastajučym: u 1 kvartale impart pieravyšaŭ ekspart na 0,6 młrd, a ŭ 2 kvartale — užo na 1,1 młrd. ekspart biełaruskich tavaraŭ zvaliŭsia z 25,3 młrd u 1 paŭhodździ minułaha hoda da 19,2 młrd u 1 paŭhodździ hetaha abo na 24%. U hetaj situacyi navat chitraja łukašenkaŭskaja statystyka vymušanaja pakazvać spad u pramysłovaści ŭ 6–10% u traŭni-lipieni i VUP na 0,5% u 2 kvartale (da tych ža pieryjadaŭ minułaha hoda) — realny spad, viadoma, jašče bolš.

U hety raz, padobna, paŭtorycca varyjant 2011 hoda, kali «biaskryŭdnaja» hulnia «ŭ vajnu» pryviała da surjoznych ekanamičnych sankcyj z boku Rasiei, vynikam jakich staŭ abvał u 3 razy jak biełaruskaha rubla, tak i rejtynhu Łukašenki.

Spačatku mlavy kanflikt Łukašenki z «Urałkalijem» užo pryvioŭ da prykmietnaha padzieńnia cenaŭ na kalijnyja ŭhnajeńni, jakija źjaŭlajucca druhim paśla naftapraduktaŭ artykułam biełaruskaha ekspartu (7%) i dachodaŭ biełaruskaha biudžetu (10%):

kali ŭ minułym hodzie biełaruskija vytvorcy pradavali jaho ŭ dalokaje zamiežža pa 742 dalaraŭ za tonu, to ŭ hetym hodzie — pa 638, pryčym dla kitajcaŭ zroblenaja jašče vialikaja źnižka — da 593 dalaraŭ.

Paśla kanfliktu ž Łukašenki z «Urałkalijem» analityki zahavaryli pra źnižeńnie koštu da 270–300 dalaraŭ!

Rasspažyŭnahlad zahavaryŭ pra zabaronu ekspartu biełaruskaj małočnaj pradukcyi (6% biełaruskaha ekspartu, ź jaho 75–80% idzie ŭ Rasieju), Raśsielhasnahlad — pra zabaronu biełaruskaha miasa (3% biełaruskaha ekspartu, ź jaho 96–97% idzie ŭ Rasieju). Narešcie, «Transnafta» zajaviła pra skaračeńnie pastavak nafty ŭ Biełaruś na 25%, a ekspart naftapraduktaŭ i nafty heta ŭžo 34% biełaruskaha ekspartu! I heta, padobna, tolki pačatak: zajavy z patrabavańniem admianić aryšt kiraŭnika «Urałkaliju» užo zrabili i rasijski MZS i Administracyja prezidenta RF.

Možna tolki zdahadvacca jaki vielizarny ŭron paniasie biełaruskaja ekanomika, kali Kreml uklučyć usie mahčymyja «miery ŭździejańnia» dziejańniaŭ Łukašenki ŭ dačynieńni da «Urałkalija».

Naprykład, pakul Minfin RF nie admaŭlajecca ad pradastaŭleńnia Biełarusi čarhovaha kredytu ŭ 440 młn. dalaraŭ, a moža ž i admovicca: bo źniešniaja pazyka Biełarusi ŭžo dasiahnuła 16 młrd. dalaraŭ i naŭradci kraina ŭ stanie ich addać…

Paśla ŭsich «mier uździejańnia» z boku Rasiei jašče bolš pavialičycca deficyt handlovaha bałansu Biełarusi, jaki raście i biez taho.

A za im niepaźbiežna rušyć uśled i novy abvał biełaruskaha rubla i, jak śledstva, novaje źbiadnieńnie nasielnictva Biełarusi, jakoje pryviadzie da padzieńnia rejtynhu Łukašenki da novaha histaryčnaha minimumu ŭ 10–15%, paśla jakoha jamu budzie ŭžo nie padniacca vyšej za 25% da vybaraŭ prezidenta 2015 hoda, a heta budzie aznačać niepaźbiežnaje paražeńnie.

Apytanka

• 0
• 0
• 0
• 0
• 0
• 0
• 0
• 0