Za admovu absłužyć biełaruskamoŭnaha klijenta supracoŭnicu «Biełtelekama» pryciahnuli da dyscyplinarnaj adkaznaści.
Incydent zdaryŭsia 12 žniŭnia. Karespandent «Našaj Nivy» Jahor Marcinovič źviarnuŭsia pa pryvatnych pytańniach u kansultacyju pa pasłuhach «Biełtelekama» (infalinija 130). Na jahony zvanok adkazała śpiecyjalistka koł-centra Viktoryja Kobrusieva.
Zrazumieć, što takoje «abstalavańnie», supracoŭnica nie zmahła i… zapatrabavała razmaŭlać ź joj na rasijskaj movie.
Svaju pazicyju jana patłumačyła tym, što rasijskaja mova — dziaržaŭnaja.
Zamiest padnačalenaj davać kansultacyju daviałosia jaje načalnicy — taja biełaruskaj movaj vałodała.
Na nastupny dzień Jahor Marcinovič źviarnuŭsia ŭ «Biełtelekam» ź piśmovaj pretenzijaj. U liście na imia hienieralnaha dyrektara Siarhieja Papkova jon paprasiŭ pryciahnuć da dyscyplinarnaj adkaznaści Viktoryju Kobrusievu, davieści da supracoŭnikaŭ praviły absłuhoŭvańnia na movie zvarota klijenta, a taksama vypracavać dla śpiecyjalistaŭ biełaruskamoŭny słoŭnik terminaŭ.
Praź miesiac ad «Biełtelekama» pryjšoŭ adkaz za podpisam Dźmitryja Daroški, hałoŭnaha inžyniera filijała Minskaj haradskoj telefonnaj sietki (tudy pretenzija była pieranakiravanaja dla razhladu).
Zhodna ź im, supracoŭnicu infalinii Viktoryju Kobrusievu vyrašana pryciahnuć da dyscyplinarnaj adkaznaści na padstavie zakona «Ab movach» -
«kiraŭniki, inšyja rabotniki dziaržaŭnych orhanaŭ i inšych arhanizacyj pavinny vałodać biełaruskaj i ruskaj movami ŭ abjomie, nieabchodnym dla vykanańnia imi svaich słužbovych abaviazkaŭ».
Praŭda, spahnańnie abranaje minimalna mahčymym — jana atrymała zaŭvahu.
Aproč taho, kiraŭnictva rastłumačyła supracoŭnikam słužby 130, što im nieabchodna absłuhoŭvać klijentaŭ na movie ich zvarota, a taksama «pavyšać svoj słoŭnikavy zapas nacyjanalnaj movy».
A voś śpiecyjalny słoŭnik vyrašana pakul nie stvarać. «Biełtelekam» zapeŭnivaje, što «adukacyja śpiecyjalistaŭ dazvalaje im u poŭnym abjomie vykarystoŭvać nacyjanalnuju movu».
