U Minsku prajšła viečaryna, pryśviečanaja 70-hodździu paetki Niny Maciaš
20 vieraśnia ŭ Centralnaj navukovaj biblijatecy imia Ja.Kołasa NAN Biełarusi prajšła sumiesnaja viečaryna ź Dziaržaŭnym muziejem historyi biełaruskaj litaratury «Ščaślivaj dolu nazavi…», pryśviečanaja 70-hodździu z dnia naradžeńnia paetki, pierakładčycy, hramadskaj dziajački Niny Maciaš.
Da imprezy adździełam redkich knih i rukapisaŭ biblijateki padrychtavana mini-vystava «Ahmień jaje dušy».
«Heta vielmi cikavy i niezvyčajny čałaviek, vydatnaja paetka, jakaja zrabiła vialiki ŭniosak u raźvićcio biełaruskaj litaratury i hramadskaj dumki, — raskazała BiełaPAN zahadčyk adździeła navukovaj aśviety Dziaržaŭnaha muzieja historyi biełaruskaj litaratury Lidzija Šahojka. — U studenckija hady, kali Nina Maciaš vučyłasia ŭ Instytucie zamiežnych movaŭ, jana trapiła ŭ avaryju, z-za čaho była prykutaja da invalidnaha kresła.
Ale aptymistka pa natury, jana svaim prykładam pakazała, jak treba žyć u samych składanych, zdajecca, nievierahodnych abstavinach.
Da tvorčaści Niny Maciaš u Dziaržaŭnym muziei historyi biełaruskaj litaratury my ŭžo źviartalisia ŭ krasaviku minułaha hoda, kali ŭ nas adkryvałasia vystava „Apiakunki paetyčnych niabiosaŭ“, dzie byli pradstaŭlenyja dzieviać paetak druhoj pałovy XX stahodździa.
U dzień naradžeńnia hetaj vydatnaj paetki jaje słova budzie hučać nie tolki tut, ale i na jaje radzimie ŭ Biełaaziorsku, dzie siońnia prachodzić śviata „Babina leta“. Mienavita Nina Maciaš była jaho zasnavalnicaj, i tudy vypraviłasia vialikaja delehacyja piśmieńnikaŭ, jakija viedali Ninu Jazepaŭnu, siabravali ź joj».
Nina Maciaš naradziłasia 20 vieraśnia 1943 hoda ŭ vioscy Nivy Biarozaŭskaha rajona Bresckaj vobłaści. Skončyła Minski dziaržaŭny piedahahičny instytut zamiežnych movaŭ.
Łaŭreat fiestyvalu «Bieraściejskaja zorka-98», Litaraturnaj premii imia Arkadzia Kulašova, zasłužanaja dziajačka mastactvaŭ Biełarusi. U litaraturnaj skarboncy piśmieńnicy siem zbornikaŭ paezii, 15 knih pierakładaŭ z francuzskaj, niamieckaj, polskaj, ukrainskaj.
Dziakujučy Ninie Maciaš biełaruskija čytačy paznajomilisia z tvorčaściu Žana Aliŭje, Žorža Simianona, Antuana de Sient-Ekziupiery, Visłavy Šymborskaj i inšych.
Siem knižak padrychtavała piśmieńnica dzietkam, napisała niekalki telescenaryjaŭ i pjes dla teatra. Nie stała Niny Maciaš 19 śniežnia 2008 hoda.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary