Paśla čarhovaha administracyjnaha aryštu vyjšaŭ na volu były palitźniavoleny Uładzimier Jaromienak.
Hetym razam aktyvist adbyvaŭ piacisutkavaje pakarańnie nibyta za parušeńnie preventyŭnaha nahladu. La turemnaj bramy mienskaha Centru izalacyi pravaparušalnikaŭ jaho sustrakali žonka, siabry, adnadumcy, paviedamlaje radyjo «Svaboda».
16 vieraśnia Jaromienka i inšaha eks-palitźniavolenaha Vasila Parfiankova zavočna asudzili pa adnolkavym artykule — parušeńnie preventyŭnaha nahladu.
Adnak za sutki da vyzvaleńnia Parfiankova z turmy na Akreścina zabraŭ učastkovy milicyjant. Dahetul nieviadoma, dzie Parfiankoŭ znachodzicca zaraz, ale jość źviestki, što jon prymusova vyviezieny ŭ lekava-pracoŭny prafilaktoryj.
Jak nahadvajuć pravaabaroncy, na Jaromienka i Parfiankova byli zaviedzienyja kryminalnyja spravy za parušeńnie preventyŭnaha nahladu.
Jaromienak byŭ asudžany da 3 miesiacaŭ aryštu i musiŭ pačać adbyvać pakarańnie paśla razhladu kasacyjnaj skarhi.
Spravu Parfiankova sud tak i nie razhledzieŭ, ale pravaabaroncy nia vyklučajuć, što zamiest paŭhoda aryštu jaho vyrašana pratrymać hod u «prafilaktoryi».
Jaromienak i Parfiankoŭ byli fihurantami kryminalnaj spravy ab masavych biesparadkach u Miensku ŭ dzień prezydenckich vybaraŭ 19 śniežnia 2010 hodu.
Jaromienak byŭ asudžany na 3 hady pazbaŭleńnia voli ŭ kalonii ŭzmocnienaha režymu, Parfiankoŭ — na 4 hady pazbaŭleńnia voli ŭ kalonii strohaha režymu. U žniŭni 2011-ha abodva byli vyzvalenyja na padstavie prezydenckaha ŭkazu ab pamiłavańni.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym1
Kamientary