Da kanca hoda ŭ terytaryjalnych centrach sacyjalnaha absłuhoŭvańnia nasielnictva Maskoŭskaha i Pieršamajskaha rajonaŭ Minska adkryjuć dva adździaleńni dzionnaha znachodžańnia dla pažyłych ludziej na 50 miescaŭ.
Pra heta paviedamiła namieśnik staršyni kamiteta pa pracy, zaniataści i sacyjalnaj abaronie Minharvykankama Iryna Dudka na pres-kanfierencyi ŭ Minsku 1 kastryčnika.
Pažyłych ludziej, rastłumačyła Dudka, «možna budzie pakinuć u adździaleńni dzionnaha znachodžańnia, jak u dziciačym sadku, a viečaram zabrać damoŭ».
Im zabiaśpiečać prafiesijny dohlad, dla dastaŭki płanujecca vykarystoŭvać słužbu sacyjalnaha taksi. Prymać u adździaleńni dzionnaha znachodžańnia buduć tolki dziejazdolnych pažyłych ludziej, pieralik miedycynskich supraćpakazańniaŭ raspracoŭvajecca. Płata za pasłuhu budzie nievialikaja, nie bolšaja, čym za znachodžańnie ŭ dziciačym sadku, skazała Dudka.
Jana padkreśliła, što adździaleńni dzionnaha znachodžańnia dla pažyłych dazvolać im žyć u siamji, nie hublać suviaziaŭ z rodnymi. Heta vielmi važna, skazała Dudka, bo «siamju pažyłomu čałavieku nie zamienić ništo».
Kab ablehčyć dohlad pažyłych ludziej u siemjach, kamitet pa pracy, zaniataści i sacyjalnaj abaronie Minharvykankama prapanoŭvaje sacyjalnuju pieradyšku, heta značyć mahčymaść pakinuć pažyłoha čałavieka na adzin-dva miesiacy ŭ internacie na płatnaj asnovie. Košt pasłuhi — 2 młn. 990 tysiač rubloŭ. U hetu sumu ŭvachodzić płata za piacirazovaje charčavańnie, pražyvańnie i miedycynski dohlad na praciahu miesiaca. «Takaja sacyjalnaja pieradyška dazvalaje tym, chto dahladaje pažyłych ludziej, pajechać u adpačynak, u kamandziroŭku», — adznačyła Dudka.
U Minsku, padkreśliła jana, pažyłyja ludzi aktyŭna karystajucca sacyjalnymi pasłuhami na damu, pasłuhami siadziełki, «popyt na jakija pieravyšaje prapanovu».
