Biełteleradyjokampanija padpisała z «Alkasar Miedyja Servis» damovu, zhodna ź jakoj z 1 studzienia 2014 h. hetaja rasijskaja kampanija budzie ŭpaŭnavažanaja ažyćciaŭlać uhody na akazańnie pasłuh pa raźmiaščeńni rekłamy ŭ efiry telekanałaŭ Biełaruskaha telebačańnia. Damovu padpisali 26 vieraśnia 2013 hoda.
Varta adznačyć, što «Alkasar Miedyja Servis» - heta afilavanaja struktura Hazprama, jaki apošnim časam vielmi aktyŭna puskaje karani ŭ Biełarusi.
U 2007 hodzie chołdynh «Hazpram-miedyja» prystupiŭ da stvareńnia na bazie «NTV-miedyja» novaj struktury, jakaja pavinnaja była skłaści kankurencyju na rasijskim rynku hrupie kampanij «Videa Internešnł» - samamu bujnomu pradaŭcu rekłamy na rasijskich miedyjnych placoŭkach.
U vyniku kampanii «NTV-miedyja» i «Alkasar» stvaryli novaha bujnoha miedyjaselera - sumiesnaje pradpryjemstva «Alkasar-miedyja», jakoje tut ža pačało pieradzieł rasijskaha rynka rekłamy. Siońnia kampanija ŭ kansorcyumie z «Hazpram Miedyja Chołdynh» ažyćciaŭlaje prodaž rekłamy na kanałach NTV i TNT, zabiaśpiečvaje rekłamny efir kanałaŭ «TB-Centr», «Źviazda», «Mir», a taksama hrupy telekanałaŭ dla spadarožnikavaha i kabielnaha viaščańnia, jakija naležać Red Media Group i telekampanii «Strym». Padraździaleńnie, jakoje zajmajecca internet-prodažami, realizuje rekłamny trafik bolš čym tryccaci sajtaŭ: internet-servisaŭ karparacyi Microsoft i placovak z puła kampanii Gazprom - Media Digital.
U 2008 hodzie hrupa «Alkasar» vyjšła na rekłamny rynak krain SND, a ciapier - i na biełaruski rynak. Reakcyi miascovych miedyjaseleraŭ na prychod novaha hulca pakul niama. Ale im sapraŭdy treba turbavacca, uličvajučy, što Hazpram prychodzić u Biełaruś surjozna i nadoŭha. Całkam vierahodna, što, pačaŭšy z adnoj z najbujniejšych rekłamnych placovak, «Alkasar Miedyja Servis» vielmi chutka padbiare pad siabie i ŭsie astatnija. Pry hetym, uličvajučy rasijskija abaroty kampanii, kankurencyju jamu na biełaruskim rynku zmohuć skłaści vielmi i vielmi niamnohija.
