Śviatłana Aleksijevič – čaćviortaja ŭ bukmiekieraŭ na atrymańnie Nobieleŭskaj premii pa litaratury
Dźvie aŭtarytetnyja brytanskija bukmiekierskija kantory (unibet.co.uk i 888sport.com) prymajuć staŭki na atrymańnie Nobieleŭskaj premii pa litaratury.
U abodvuch śpisach nadzvyčaj vysokaje miesca zajmaje biełaruska Śviatłana Aleksijevič. U prahnozach bukmiekieraŭ jana zajmaje čaćviortaje miesca. Staŭki na jaje prymajucca z kaeficyjentam 9 da 1.
Nie tak daŭno vyjšła novaja kniha Śviatłany Aleksijevič «Čas second hand». Kniha pabačyła śviet pa-rasiejsku, pa-šviedsku, pa-niamiecku. Pa-biełarusku častka knihi vychodziła ŭ časopisie «Dziejasłoŭ». Na hetuju knihu atrymanaja vydatnaja krytyka ŭ śviecie.
Śviatłana Aleksijevič naradziłasia ŭ 1948 va ŭkrainskim Ivana-Frankoŭsku. Skončyła škołu ŭ Pietrykaŭskim rajonie.
Aŭtar dakumientalnych knih «U vajny — nie žanočaje abličča» (1985), «Apošnija śviedki» (1985), «Cynkavyja chłopčyki» i inš.
Lidziruje ž 64-hadovy japonski piśmieńnik Charuki Murakami (4 da 1). Jon papularny i ŭ Biełarusi. Murakami aŭtar takich ramanaŭ, jak «1Q84», «Kafka na plažy», «Narviežski les», «Dens, Dens, Dens», «Słuchaj pieśniu vietra». Adnak Nobieleŭskuju premiju letaś užo atrymlivaŭ aŭtar z Azii – kitajec Mo Jań.
Na druhim miescy akazałasia amierykanskaja aŭtarka Džojs Kerał Oŭts (8 da 1). Najbolš pładavity pieryjad tvorčaści piśmieńnicy pryjšoŭsia na 1960-yja. Tady jana stvaryła ramany «Ašałamlalnaje padzieńnie», «Sad radaściaŭ ziamnych», «Ich žyćci». Adzin z apošnich ramanaŭ Oŭts byŭ napisany ŭ 2000-m, nazyvaŭsia «Błandzinki», pryśviečany Mierlin Manro.
Amierykanskaja litaratura voś užo 20 hadoŭ nie atrymlivała Nobieleŭskuju ŭznaharodu.
Na trecim miescy vuhorski aŭtar Pieter Nadaš (9 da 1). Sioleta pa-biełarusku vyjšaŭ jahony raman «Kaniec adnoj siamiejnaj sahi». Praŭda, pierakład rabiŭsia nie z movy aryhinału, a polskaj.
Za Aleksijevič u śpisie akazalisia hałandziec Siejs Nooteboom, ałbaniec Ismaił Kadare, italjaniec Umbierta Eka, siryjec Adonis.
Imia łaŭreata budzie nazvana 10 kastryčnika.
Kamientary