Suśvietny lidar pa vytvorčaści piersanalnych kampjutaraŭ, kitajskaja Lenovo, surjezna razhladaje mahčymaść kupli kanadskaha vytvorcy smartfonaŭ BlackBerry.
Praŭda, uhoda moža sarvacca praz palityčnyja pieraškody.
Pavodle dadzienych amierykanskaha dziełavoha vydańnia The Wall Street Journal, pradstaŭniki Lenovo padpisali pahadnieńnie ab nievydavańni, kab mieć mahčymaść aznajomicca sa stanam spravaŭ niekali najbujniejšaha suśvietnaha vytvorcy smartfonaŭ. Navat kali baki damoviacca ab uhodzie, jaje jašče treba budzie ŭchvalić kanadskamu ŭradu.
Atrymańnie takoj uchvały pad vialikim pytańniem - ciapierašni ŭrad Kanady sfarmavali kansiervatary, jakija niehatyŭna staviacca da zamiežnych inviestycyj u stratehična važnyja pradpryjemstvy. Smartfony BlackBerry vykarystoŭvajuć sotni tysiač dziaržsłužboŭcaŭ u Kanadzie i ZŠA, uklučajučy kiraŭnika Biełaha doma Baraka Abamu.
Chutčej za ŭsio addać taki aktyŭ kitajcam u Atavie nie zachočuć.
Mahčyma, Lenovo daviadziecca damaŭlacca ab kupli asobnych padraździaleńniaŭ BlackBerry - u hetym vypadku kanadskija čynoŭniki mohuć być bolš pamiarkoŭnyja.
Spravy ŭ BlackBerry iduć niavažna ŭžo nie pieršy hod, kankuravać z iPhone i Android robicca ŭsio składaniej. Jak paviedamlałasia niadaŭna, menedžment razhladaje mahčymaść prodažu kampanii Google, Intel, SAP ci adnamu z bujnych azijackich vytvorcaŭ smartfonaŭ.
Patencyjnyja pakupniki BlackBerry zacikaŭlenyja ŭ pieršuju čarhu ŭ jaje aktyvach. Kampanija vałodaje servisam i technałohijaj BBM dla abmienu imhniennymi paviedamleńniami, jaki aceńvajuć u 3-4,5 miljarda dalaraŭ, a taksama patentnym partfielem ahulnym koštam 2-3 miljardy. Tym nie mienš, mahčymyja partniory BlackBerry staviacca da ŭhody z aściarohaj, bo aktyvy kampanii mohuć mocna patańnieli: u minułym miesiacy vytvorca daŭ spravazdaču pra amal miljardnyja straty i śpisańni niepradadzienych smartfonaŭ Z10.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary