AHP zapytaje ŭ Hienprakuratury, chto finansavaŭ budaŭnictva Pałaca Niezaležnaści

Abjadnanaja hramadzianskaja partyja padrychtavała zvarot u Hienieralnuju prakuraturu Biełarusi pa pytańni krynicaŭ finansavańnia budaŭnictva Pałaca Niezaležnaści ŭ Minsku.

Pra heta paviedamiŭ lidar partyi Anatol Labiedźka 18 kastryčnika na pres-kanfierencyi ŭ Minsku.

Nahadajem, 17 kastryčnika Alaksandr Łukašenka padčas sustrečy sa studentami Mahiloŭskaha dziaržaŭnaha ŭniviersiteta imia A.Kulašova zajaviŭ, što ŭ budaŭnictva Pałaca Niezaležnaści ŭ Minsku nie ŭkładziena nivodnaha rubla biudžetnych srodkaŭ.

Pavodle słoŭ Labiedźki, 29 žniŭnia AHP atrymała adkaz na svoj zapyt ź Ministerstva finansaŭ nakont budaŭnictva abjekta «Administracyjny budynak na terytoryi ŭ miežach vulicy Arłoŭskaj — praśpiekta Pieramožcaŭ — raki Śvisłač». «Adkaz nas poŭnaściu nie zadavoliŭ, ale ź jaho vynikaje, što budaŭnictva viadziecca 50 na 50 z respublikanskaha biudžetu i biudžetu Minska», — paviedamiŭ Labiedźka.

U adkazie ź Ministerstva finansaŭ zaznačajecca, što budaŭnictva abjekta ŭklučana ŭ Dziaržaŭnuju inviestycyjnuju prahramu na 2012 hod i finansujecca «na asnovie roŭnadolevaha ŭdziełu srodkaŭ respublikanskaha biudžetu i biudžetu horada Minska». 

Taksama ŭ adkazie paviedamlajecca: «U 2013 budaŭnictva abjekta ažyćciaŭlajecca ŭ adpaviednaści z ukazam prezidenta ad 14 sakavika 2013 № 126 «Ab zaćviardžeńni Dziaržaŭnaj inviestycyjnaj prahramy na 2013» paralelna z raspracoŭkaj prajektna-kaštarysnaj dakumientacyi, jak heta praduhledžana zadańniem na prajektavańnie abjekta, zaćvierdžanym staršynioj Minskaha harvykankama. Uličvajučy paralelnaje viadzieńnie budaŭnictva abjekta z raspracoŭkaj prajektna-budaŭničaj dakumientacyi, kančatkovy košt abjekta vyznačajecca zakazčykam».

Jak paviedamiŭ Labiedźka, 4 vieraśnia AHP vyrašyła adpravić zapyt na adras Minharvykankama, kab daviedacca, «čamu budaŭnictva Pałaca Niezaležnaści ci rezidencyi prezidenta, jak tam napisana, viadziecca za košt minčan».

Pavodle słoŭ lidara partyi, adkaz na hety list pakul nie atrymany, chacia ŭžo zakončyŭsia adviedzieny na razhlad zvarotu miesiačny termin.

«Siońnia my źvierniemsia da Hienieralnaha prakurora, jakomu prapanoŭvajem vystupić arbitram, chto manić — Ministerstva finansaŭ ci Alaksandr Łukašenka», — zajaviŭ Labiedźka.

Palityk miarkuje, što budaŭnictva Pałaca Niezaležnaści, a taksama źviazanyja z hetym zajavy źjaŭlajucca prajavaj karupcyjnaści ciapierašniaj ułady.

«Biełarusi patrebny svabodnyja vybary. Tolki ŭ hetym vypadku vybarščyki zmohuć kantralavać biudžetnyja raschody, toje, jak čynoŭniki rasparadžajucca hrašami padatkapłacielščykaŭ», — skazaŭ Labiedźka.

U lipieni 2012 hoda ahienctva Minsk-Novosti paviedamlała ab karekciroŭcy raschodaŭ na inviestycyjnuju prahramu Minska na 2012 hod. U pryvatnaści, paviedamlałasia, što «dla ŭźviadzieńnia administracyjnaha budynka pamiž vulicaj Arłoŭskaj i praśpiektam Pieramožcaŭ budzie dadatkova vydzielena 50 młrd. rubloŭ».

• 0
• 0
• 0
• 0
• 0
• 0
• 0
• 0