Sieviaryniec: Papiaredzili, što nijakaj sustrečy kala kamiendatury nie dapuściać
Palitviazień vychodzić na svabodu 19 kastryčnika.
19 kastryčnika, vyzvalajecca z «chimii» palitviazień, sustaršynia partyi BCHD Pavał Sieviaryniec. Palitviazień apavioŭ karespandentu «Svabody», jak prajšoŭ apošni dzień «chimii».
«Na składzie ja ŭžo tydzień jak nie pracuju, zvolniŭsia, tamu ŭvieś čas znachodžusia ŭ kamendatury. Siońnia biehaŭ, padpisvaŭ apošnija papiery i kančatkova rychtavaŭ rečy da adjezdu.
Zdajecca, paśpieŭ usim, kamu treba było, napisać listy ci pazvanić. Taksama ŭžo składzieny kalandar sustreč i kantaktaŭ na budučyniu — kožny dzień na šmat času napierad raśpisany.
Tut na Pružanščynie ŭ mianie źjaviłasia šmat siabroŭ — ź imi sustrakaŭsia, kab raźvitacca. Siońnia ŭviečary jašče da mianie pryjeduć miascovyja vierniki. Taksama budziem raźvitvacca», — paviedamiŭ Pavał Sieviaryniec.
Pavał viedaje, što zaŭtra niedzie kala 9 hadziny ranicy jamu vydaduć daviedku ab vyzvaleńni i z kamendatury jon z rečami pojdzie da KPP.
«Admysłova vyklikaŭ načalnik kamendatury i papiaredziŭ, što kala budynku samoj kamendatury nijakich uračystych sustrečaŭ nie dazvolać, navat nie prapuściać siudy padyści. Što tut budzie šmat milicyi, u tym liku DAI. Raźličvaju, što da 10 ranicy ŭžo budu kala KPP zusim volnym čałaviekam. Tam i sustreniemsia ź siabrami i žurnalistami», — skazaŭ Pavał Sieviaryniec.
Pavodle palitviaźnia, kab sustreć jaho z «chimii», u Kuplin pryjedzie čałaviek 30–40 biez uliku žurnalistaŭ.
Pavał Sieviaryniec byŭ aryštavany ŭ Miensku paśla mitynhu pratestu suproć falšavańnia prezydenckich vybaraŭ 19 śniežnia 2010 hodu i asudžany za ŭdzieł u zabureńniach na 3 hady «chimii».
Pakarańnie adbyvaje ŭ speckamendatury vioski Kuplin Pružanskaha rajonu Bieraściejskaj vobłaści. Pakolki 5 miesiacaŭ Pavał Sieviaryniec znachodziŭsia ŭ SIZA KDB, dzie adzin dzień ličycca za dva, a potym dva miesiacy byŭ doma ŭ Viciebsku, čakajučy nakiravańnia na «chimiju», jahony termin zakančvajecca nie 19 śniežnia, a 19 kastryčnika.
«Adnak paśla vyzvaleńnia ja jašče 2 hady budu na prafilaktyčnym uliku, ź mianie nia budzie źniataja sudzimaść. Heta lahčej, čym nahlad, nia treba adznačacca, ale pry novym złačynstvie heta ličycca abstavinami, jakija abciažarvajuć vinu.
Taksama ciaham 2 hadoŭ ja budu pazbaŭleny prava abiracca, navat u miascovyja saviety», — patłumačyŭ Pavał Sieviaryniec svoj budučy status.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary