Pinskim mižrajonnym adździełam Śledčaha kamiteta praciahvajecca rasśledavańnie kryminalnaj spravy, raspačataj pa fakcie śmierci małaletniaha pacyjenta ŭ Pinskaj centralnaj balnicy.
Jak paviedamiŭ aficyjny pradstaŭnik upraŭleńnia Śledčaha kamiteta pa Bresckaj vobłaści Rusłan Makaruk, z pryciahnieńniem vysokakvalifikavanych śpiecyjalistaŭ vyvučajecca spraŭnaść i adpaviednaść narmatyŭnym patrabavańniam miedycynskaha abstalavańnia balnicy. Pravodzicca taksama šerah składanych ekśpiertnych daśledavańniaŭ, šyroki kompleks apieratyŭna-śledčych mierapryjemstvaŭ, skiravanych na ŭstanaŭleńnie sapraŭdnych akaličnaściaŭ i pryčyn trahiedyi.
Pavodle słoŭ Makaruka, śledčy praciahvaje pracu na miescy zdareńnia. Ustanoŭlenyja asoby piersanału, jakija akazvali miedycynskuju dapamohu dziciaci. Vyvučajucca pytańni svoječasovaści i pravilnaści akazańnia mieddapamohi; najaŭnaści abo adsutnaści parušeńniaŭ mietodyk i narmatyŭna-pravavych aktaŭ; pryčynna-śledčaj suviazi pamiž dziejańniami jakich-niebudź asob i śmierciu dziciaci.
12 kastryčnika prykładna ŭ 20.00 u Pinskuju centralnuju balnicu byŭ dastaŭleny dvuchhadovy chłopčyk z dyjahnazam «inšarodnaje cieła ŭ bronchach».
U pryjomnym pakoi chłopčyka ahledzieli ŭračy, paśla čaho była pryznačana apieracyja, jakaja pravodziłasia ŭ apieracyjnym adździaleńni, dzie ŭ toj ža dzień dzicia pamierła.
Pinskim mižrajonnym adździełam Śledčaha kamiteta pa fakcie śmierci małaletniaha dziciaci ŭ lačebnaj ustanovie była raspačata sprava na padstavie č. 2 art. 162 Kryminalnaha kodeksa (nienaležnaje vykanańnie prafiesijnych abaviazkaŭ miedycynskim rabotnikam, jakoje paciahnuła pa nieaściarožnaści śmierć pacyjenta).
Padčas pieršapačatkovaj pravierki byli apytanyja miedycynskija rabotniki, jakija akazvali dapamohu dziciaci, svajaki małaletniaha, ahledžana cieła chłopčyka. Vyniatyja dźvie pacierki.
Nahadajem, u 2009 hodzie pa hetym ža składzie złačynstva (č. 2 art. 162 KK) byli asudžanyja troje daktaroŭ Ivacevickaj centralnaj rajonnaj balnicy, z-za nieprafiesijnych dziejańniaŭ jakich pamierła małaletniaje dzicia. Sud pryhavaryŭ kožnaha z uračoŭ da troch hadoŭ pazbaŭleńnia voli z umoŭnym nievykarystańniem pakarańnia terminam na dva hady. Akramia taho, dvoje ź ich byli pazbaŭleny pravy zajmacca miedycyjnskaj dziejnaściu: adzin na try hady, druhi — na dva.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary