Vystupajučy 29 kastryčnika na forumie «Tradycyi. Moładź. Budučynia» ŭ Minsku, Łukašenka prapanavaŭ abviaścić 2015 Hodam moładzi.
2015 hod jon nazvaŭ vyznačalnym u historyi krainy (u hetym hodzie ŭ Biełarusi pavinny prajści čarhovyja prezidenckija vybary).
«Heta budzie vielmi niaprosty hod, ja heta kažu biez usialakaha padtekstu. Hety hod budzie vyznačać budučyniu našaj krainy pa mnohich-mnohich napramkach. I jak vy vyrašycie ŭ hety hod, chaj tak i budzie, heta budzie dla vas», — cytuje Łukašenku dziaržaŭnaje ahienctva BIEŁTA.
Jon zaklikaŭ moładź pryvivać sabie imunitet da razburalnych radykalnych idejałohij.
«Našaj krainie samy čas pierapynić sumnuju tradycyju minułaha stahodździa — razburać da rešty i kožnyja try dziesiacihodździ pačynać usio budavać z nula. I mienavita moładź pavinna skazać tut svajo słova, nazaŭždy pryviŭšy sabie imunitet da razburalnych radykalnych idejałohij «, — skazaŭ kiraŭnik dziaržavy.
Na dumku Łukašenki, «ništo tak nie niebiaśpiečna dla maładoj niezaležnaj krainy, jak unutranyja svarki i zvady», jakija viaduć «da hałoŭnaj niebiaśpieki, jakaja padpilnoŭvaje lubuju maładuju nacyju, — da radykalnych idejaŭ revalucyj i ŭzrušeńniaŭ.
«I choć maładości zaŭsiody ŭłaściva patrabavać radykalnaj łomki i nieadkładnych pieramienaŭ, ja zaklikaju vas zadumacca nad urokami historyi. Ci prynosili ŭzrušeńni kamu-niebudź ščaście? Nie, jany nieśli z saboj tolki błytaninu ŭ rozumach, biady i razruchu. I nikoli, padkreślivaju, nikoli nie abychodzilisia biez kryvi», — skazaŭ kiraŭnik dziaržavy.
Jon zaklikaŭ RHA «Biełaruski respublikanski sajuz moładzi» (BRSM) bolš nacelvać moładź na samarealizacyju u rodnaj krainie. Pavodle słoŭ Łukašenki, u pracy z maładymi dziaržava abapirajecca na BRSM jak na pieradavy atrad, jaki abjadnoŭvaje amal paŭmiljona čałaviek.
«My absalutna nie chavajem taho, što stavim pierad BRSM ideałahičnyja i palityčnyja zadačy. Ale hetyja zadačy źviazanyja nie ź pieratvareńniem jaho členaŭ u čyich-niebudź «jastrabaŭ» ci «sokałaŭ».
A pierš za ŭsio — z farmiravańniem z maładych ludziej patryjotaŭ našaj krainy. I vy nie zmožacie papraknuć mianie ŭ tym, što ja kazaŭ: biarycie dubiny, biarycie kamień i idzicie ŭ kahości kidajcie. Ja ŭsio žyćcio, budučy prezidentam, staraŭsia źbierahčy moładź ad hetaha», — zajaviŭ Łukašenka.
Adznačyŭšy, što moładzievy forum prachodzić u novym Pałacy niezaležnaści, kiraŭnik dziaržavy nazvaŭ jaho simvałam biełaruskaj dziaržaŭnaści.
Łukašenka padkreśliŭ, što budynak pabudavany siłami biełaruskich śpiecyjalistaŭ z ajčynnych materyjałaŭ i źjaŭlajecca ŭvasableńniem taho, na što zdolnyja biełarusy.
