Try abzacy ad unijackaha śviatara.
Voś Pieršaje prykazańnie, tak jak my čytajem jaho ŭ Knizie Vychadu: «Ja HOSPAD, BOH TVOJ, (…) CHAJ NIE BUDZIE Ŭ CIABIE INŠYCH BAHOŬ PIERAD ABLIČČAM MAIM. NIE RABI SABIE KUMIRA I NIJAKAJ VYJAVY TAHO, ŠTO NA NIEBIE ŬHARY, I ŠTO NA ZIAMLI ŬNIZIE, I ŠTO Ŭ VADZIE NIŽEJ ZIAMLI…» (VYCH 20, 2-4). Pra jakich idałaŭ, kumiraŭ havorka? Va ŭsie časy takimi idałami rabilisia hrošy, ułada, pierabolšanaje dahadžeńnie ciełu. Zaŭvažcie, kali łaska, što ŭsie hetyja rečy: hrošy, ułada i cieła — nie jość sami pa sabie hrešnymi, adnak złoŭžyvańnie imi viadzie nas da hrachu.
Jość taksama i inšyja rečy, na jakija źviartaje našuju ŭvahu pieršaje prykazańnie. A mienavita na pasłuchmianaść aŭtarytetu Carkvy. Hrašyć toj viernik, jaki admaŭlajecca pryznavać aŭtarytet Carkvy ŭ halinie viery i marali. Vielmi časta možna sustreć tych, chto kaža: «Ja chryścijanin, ale ja nie liču patrebnym chadzić kožnuju niadzielu ŭ chram», abo «Ja vieru ŭ Boha, ale ja nie liču patrebnym vykonvać usie zapaviedzi», abo «Ja katolik, ale vieru ŭ reinkarnacyju», «Ja chryścijanin, ale miarkuju, što abort — nie hrech», abo «Ja pravasłaŭny, ale ja nie liču patrebnym chadzić da spoviedzi»… Bačym, što va ŭsich pieraličanych situacyjach čałaviek abapirajecca na svoj ułasny aŭtarytet i ihnaruje navuku Carkvy! Navuka ž Carkvy abapirajecca na Adkryćcio Božaje i chryścijanski vopyt bolš čym dvuch tysiačahodździaŭ, abapirajecca na Śviatoje Piśmo i Śviatoje Padańnie (Tradycyju), na aŭtarytet nastupnikaŭ Apostała Piatra. Kali ŭsio heta zhadvajem, to chočacca zadać rytaryčnaje pytańnie: na što vyšejzhadanyja ludzi abapirajuć svoj aŭtarytet, na 20 ci 70 hadoŭ vopytu svajho ŭłasnaha žyćcia?
My, biełarusy, ličym svaju krainu tradycyjna chryścijanskaj. Adnak čamu hetaje pierakanańnie nijak nie ŭpłyvaje na našaje žyćcio ŭ hramadstvie? Kali čałaviek vieryć, to jon imkniecca pavodzić siabie pavodle svajoj viery. Adnak ža bačym, što ŭ našym hramadstvie šmat prablemaŭ, jakija śviedčać chutčej pra toje, što ludzi ŭ Boha nie vierać. Heta i prablema abortaŭ, i ałkahalizmu, i ŭsialakija zababony. Heta aznačaje, što bolšaść biełarusaŭ, choć i havorać pra siabie jak pra chryścijanaŭ, svaimi ŭčynkami hetamu piarečać. Na praktycy takija ludzi — ateisty.
Kamientary