«Cituškami» va ŭkrainskaj infarmacyjnaj prastory nazyvajuć maładych ludziej, jakija zajmajucca pravakacyjami padčas hramadzianskich akcyj.
«Cituški» (ukr. — «tituški») — heta zborny termin, jakim va Ukrainie ŭ apošni čas (krychu bolš za paŭhoda) abaznačajuć maładych ludziej spartyŭnaha ciełaskładu i ŭ spartyŭnych kaściumach, jakija vystupajuć u roli pravakataraŭ albo «začyščajuć» hramadzianskija akcyi.
Samo słova adbyłosia ad proźvišča spartsmiena Vadzima Cituško, jaki staŭ pravobrazam typovaha «cituški» — pravakatara. Incydent, ź jakim źviazanaja historyja termina, adbyŭsia 18 maja 2013 hoda.
U hety dzień u Kijevie prachodzili dźvie akcyi — akcyja apazicyi «Ustavaj, Ukraina!» na Safijskaj płoščy i mitynh, arhanizavany Partyjaj rehijonaŭ na Jeŭrapiejskaj płoščy.
U peŭny momant na vulicy Vialikaja Žytomirskaja pamiž pradstaŭnikami apazicyi i hrupaj maładych ludziej spartyŭnaha ciełaskładu ŭspychnuła bojka.
Hetuju bojku zdymali žurnalisty, niekatoryja ź ich — žurnalistka «5-ha kanała» Volha Śnicarčuk i fatohraf haziety «Kamiersant-Ukraina» Uładzisłaŭ Sadel — paciarpieli sami. Šerah ŚMI paviedamlaŭ, što mnohija sa «spartyŭnych» maładych ludziej u toj ža dzień pracavali na achovie mitynhu Partyi rehijonaŭ.
Fotahalereju napadu «citušak» hladzicie tut.
Pa padazreńni ŭ napadzie na žurnalistaŭ zatrymali žychara Biełaj Carkvy Vadzima Cituško, zatym milicyja vystaviła abvinavačvańnie jašče trom maładym ludziam, ich spravy abjadnali z spravaj Cituško.
2 vieraśnia rašeńniem suda maładyja ludzi byli asudžanyja ŭmoŭna.
Termin zamacavaŭsia ŭ infarmacyjnaj prastory praktyčna adrazu paśla incydentu. A ŭ lipieni 2013 hoda słova ŭvajšło ŭ anłajn-słoŭnik sučasnaj ukrainskaha movy i słenhu «Mysłovo».
Voś tłumačeńnie z słoŭnika «Mysłovo» (u pierakładzie z ukrainskaj): «Cituški — heta takija pryhožyja chłopcy spartyŭnaha ciełaskładu, jakija źjaŭlajucca tam, dzie pačynajecca praźmiernaja hramadzianskaja aktyŭnaść, dla taho, kab supakoić aktyvistaŭ. Pachodzić ad imia Vadzima Cituško — jarkaha pradstaŭnika hetaha padvida. Słova ŭžyvajecca ŭ množnym liku, pakolki cituški zdolnyja dziejničać u hrupie».
***
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary