«Košt urada» — interaktyŭny partał, na jakim skancentravana infarmacyja ab dachodach i vydatkach biełaruskaha siektara dziaržkiravańnia.
«Biełaruskaja statystyka zabłytanaja i schavanaja ŭ nietrach dziaržaŭnych sajtaŭ. Na sajcie «Košt urada» my pasprabavali pradstavić hetuju infarmacyju ŭ zrazumiełym vyhladzie z dapamohaj infahrafiki i tablic», — kaža kiraŭnik prajekta Uładzimir Kavałkin.
Na sajcie sabranaja infarmacyja ab dachodach i vydatkach dziaržavy z 2009 pa 2013 hod. Na hałoŭnaj staroncy ŭstalavany ličylnik dziarždoŭha i doŭha ŭ pieraliku na žychara.
A z dapamohaj ličylnika «Za što my płacim?» taksama možna daviedacca, kolki nasamreč atrymlivaje dziaržava. Tak akazvajecca, što hipatetyčny biełarus, jaki nie pje i nie kuryć i «na ruki» atrymlivaje 500 dalaraŭ štomiesiac, ź jakich vydatkoŭvaje 400 (u tym liku, naprykład, 25 dalaraŭ za kamunalnyja pasłuhi), u vyhladzie tych ci inšych vypłataŭ addaje za dziaržpasłuhi 361 dalar.
«Heta značyć, što za 8-hadzinny pracoŭny dzień vy pracujecie na siabie 4 hadziny 16 chvilin i na apłatu pasłuh dziaržavy 3 hadziny 44 chviliny», — paviedamlaje ličylnik.
«U našaj maładoj sacyjalna-aryjentavanaj dziaržavie dziaržava atrymlivaje amal 50% dachodaŭ čałavieka. Heta ličba składajecca, u pryvatnaści, ź piensijnych adličeńniaŭ i apłaty pasłuh ŽKH, bo, u adroźnieńnie ad mnohich kapitalistyčnych krain, biełarusy nie mohuć samastojna vybirać apieratara pasłuh ŽKH ci piensijny fond — jany pradastaŭlajucca dziaržavaj», — kaža Kavałkin.
«Biełaruskaja statystyka — składanaja i pakutuje ad zvyšahrehacyi infarmacyi. Pry hetym statystyčnyja dadzienyja źbirajucca ŭ adekvatnym, tabličnym vyhladzie, a spažyŭcam dastaŭlajucca niezrazumieła ŭ jakim vyhladzie. Naprykład, u raźvićcio sportu ŭklučany i vydatki na budaŭnictva ŭsialakich ladovych pałacaŭ. I hetyja ličby nijak nie dyfierencyjavanyja. Kali b daviedacca, kolki hrošaj idzie na pałacy, a kolki na sam sport, dumaju, ličby atrymalisia b šakujučymi», — zaŭvažyŭ ekanamist Siarhiej Čały, jaki prysutničaŭ na prezientacyi.
Kavałkin paviedamiŭ, što padobnyja sajty pracujuć šmat u jakich jeŭrapiejskich krainach. U Hruzii, naprykład, hrošy na taki prajekt vydatkavała dziaržava. Ciapier i biełarusy zmohuć ubačyć, u kolki im abychodzicca ŭrad i navat razdrukavać kvitok z kankretnymi ličbami.
