U Mahilovie 23-hadovy ŭdzielnik hrupy «Stop-padatak» u sacyjalnaj sietcy «UKantakcie» Anton Kascoŭ abvinavačvajecca ŭ parušeńni arhanizacyi i praviadzieńnia masavaha mierapryjemstva.
Jak paviedamiŭ BiełaPAN Kascoŭ, u hrupie «Stop-padatak», jakaja źjaviłasia jak adhalinavańnie hrupy «Stop-strach», abmiarkoŭvałasia mahčymaść praviadzieńnia 27 śniežnia druhoj akcyi pratestu aŭtamabilistaŭ suprać uviadzieńnia padatku na dopusk aŭtamabilaŭ da ruchu. Dniom 24 śniežnia da jaho damoŭ pryjechaŭ namieśnik načalnika Kastryčnickaha RAUS, jaki zapatrabavaŭ ad maładoha čałavieka vydalić z sacyjalnaj sietki ŭsiu hrupu.
Kascoŭ, pavodle jaho słoŭ, nie moh hetaha zrabić, bo źjaŭlaŭsia nie stvaralnikam hrupy, a tolki jaje ŭdzielnikam.
Małady čałaviek vydaliŭ z hrupy ŭsie svaje zapisy, pra što paźniej piśmova infarmavaŭ kiraŭnictva Kastryčnickaha RAUS. «Ja pajechaŭ u RAUS. Pa darozie źviazaŭsia z čałaviekam ź inšaha horada, i jon hetu hrupu vydaliŭ. Ja pryjšoŭ, skazaŭ, što hrupa vydalena, ale jany ŭsio adno skłali na mianie pratakoł ab administracyjnym pravaparušeńni na padstavie častki 1 artykuła 23.34 KoAP», — paviedamiŭ aktyvist.
Pavodle słoŭ Kascova, zatym supracoŭniki milicyi razam ź im pajechali da jaho damoŭ i zabrali naŭtbuk, skłaŭšy pratakoł. «U čaćvier jany pry mnie adkryjuć naŭtbuk, kab pahladzieć maju pierapisku, u tym liku ŭ hrupie», — skazaŭ jon.
Aktyvist śćviardžaje, što toje, u čym jaho abvinavačvajuć, jon rabiŭ śviadoma, vykazvajučy svaju hramadzianskuju pazicyju suprać novaha transpartnaha padatku, jaki ŭvodziać ułady.
«Ja nie škaduju, što ŭziaŭ udzieł u hrupie «Stop-padatak», — zajaviŭ jon.
Sankcyja častki 1 artykuła 23.34 KoAP praduhledžvaje papiaredžańnie ci štraf u pamiery da 30 bazavych vieličyń (da 3,9 młn. rubloŭ), ci administracyjny aryšt.
